ތުރެޑްސް އުފެއްދި މައްސަލާގައި މެޓާއާ ދެކޮޅަށް ދައުވާކުރާނެކަމަށް ޓްވިޓަރއިން ބުނެފި
30 މިލިއަނަށްވުރެ ގިނަ މީހުން ވަނީ ތުރެޑްސް ބޭނުންކުރަން ފަށާފައި
ޓްވިޓަރއާއި ތުރެޑްސް
ތުރެޑްސް އުފެއްދި މައްސަލާގައި މެޓާ ކުންފުންޏާ ދެކޮޅަށް ދައުވާކުރާނެކަމަށް ޓްވިޓަރއިން ބުނެފިއެވެ.
ޓްވިޓަރގެ ވަކީލު އެލެކްސް ސްޕިރޯ، ފޭސްބުކްގެ ސީއީއޯ މަރކް ޒަކަބަރގްއަށް ފޮނުވި ސިޓީއެއްގައި ވަނީ، ޓްވިޓަރއާ ދާދި އެއްގޮތް ސިފަތަކެއް އެކުލެވޭގޮތަށް މެޓާ ކުންފުނިން ތުރެޑްސް އުފެއްދުމާ ގުޅިގެން ދައުވާކުރާނެކަމަށް ބުނެފައެވެ.
މެޓާ ކުންފުނިން ތުރެޑްސް ލޯންޗްކޮށްފައިވަނީ ބުދަ ދުވަހުއެވެ. މިހާތަނަށް އައިއިރު މުޅި ދުނިޔެއިން 30 މިލިއަނަށްވުރެ ގިނަ މީހުން ވަނީ ތުރެޑްސް ބޭނުންކުރަން ފަށާފައެވެ. ސްޕިރޯ ފޮނުވި ސިޓީގައި ވަނީ، ޓްވިޓަރގެ ކުރީގެ މުވައްޒަފުން ހަޔަރ ކޮށްގެން މެޓާއިން އެއާ އެއްގޮތް ޕްލެޓްފޯމެއް ހެދިކަމަށެވެ. އެގޮތުން މި މުވައްޒަފުންނަކީ މިހާރުވެސް ޓްވިޓަރގެ ވިޔަފާރިއާ ގުޅުންހުރި މުހިންމު އަދި ސިއްރު މައުލޫމާތުތަކަކަށް ވާސިލުވުމުގެ ފުރުސަތު ފަހިވެފައިވާ މުވައްޒަފުންކަމަށް ބުނެފައިވެއެވެ.
މި ސިޓީގައި އިތުރަށް ބުނެފައިވަނީ މިއީ ޓްވިޓަރގެ އިންޓަރލެކްޗުއަލް މުދަލެއްކަމަށާއި، މެޓާއިން ޓްވިޓަރގެ ވިޔަފާރިއާ ގުޅުންހުރި ސިއްރު އަދި މުހިންމު މައުލޫމާތުތައް ބޭނުންކުރުން ވަގުތުން ހުއްޓާލުމަށެވެ. މި ސިޓީއާ ގުޅޭގޮތުން ސްޕިރޯ އަދި ވަކި އެއްޗެއް ނުބުނެއެވެ.
މިކަމާ ގުޅޭގޮތުން މެޓާގެ ސްޕޯކްސްޕަރސަން އެންޑީ ސްޓޯން ކުރި ތުރެޑްސް ޕޯސްޓެއްގައި ބުނެފައިވަނީ، ޓްވިޓަރގެ ކުރީގެ އެއްވެސް މުވައްޒަފަކު ތުރެޑްސްގެ އިންޖިނިއަރިންގ ޓީމުގައި ނުހިމެނޭކަމަށެވެ.
މީގެއިތުރުން، ރޮއިޓަރސްއަށް މައުލޫމާތު ދެމުން ޓްވިޓަރގެ ކުރީގެ މުވައްޒަފުން ބުނެފައިވަނީ، ތުރެޑްސްގައި ޓްވިޓަރގެ ކުރީގެ މުވައްޒަފަކު މަސައްކަތްކުރަމުން އަންނަކަން އެނގިފައިނުވާކަމަށެވެ.
ޓްވިޓަރގެ ވެރިޔާ، މަޝްހޫރު މަހުޖަނު އީލޯން މަސްކު ޓްވިޓަރގައި މިކަމާ ގުޅޭގޮތުން ޕޯސްޓްކޮށްފައިވާ ޚަބަރަކަށް ކުރި ރިޕްލައިގައި ބުނެފައިވަނީ، ވާދަކުރުން ރަނގަޅުކަމަށާއި ނަމަވެސް މަކަރުހެދުން ރަނގަޅު ނޫންކަމަށެވެ.
ޓްވިޓަރގައި ބޭނުންކުރެވޭ ބައެއް ފީޗަރތައް ތުރެޑްސްގައެއް ނުހިމެނެއެވެ. އެގޮތުން ކީވޯރޑްސް ބޭނުންކޮށްގެން ސަރޗްކުރުމާއި ޑައިރެކްޓް މެސެޖް ކުރުން އަދި ހިމަނާފައެއް ނުވެއެވެ.
