ދޯންޏެއް އަޑިއަށް ގޮސްފައިވާތީ ދަތުރުކުރާއިރު ސަމާލުވުމަށް އިލްތިމާސްކޮށްފި
އިތާފުށި ރިސޯޓުގެ ހުޅަނގުދެކުނުން 8 ނޯޓިކަލް މޭލު ބޭރުން ދޯންޏެއް އަޑިއަށްގޮސްފައިވޭ
ޕޮލިސް ލޯންޗެއް
މިހާރު ރާއްޖެއަަށް ކުރަމުންދާ ވިއްސާރައިގެ ސަބަބުން އިތާފުށި ރިސޯޓުގެ ހުޅަނގުދެކުނުން 8 ނޯޓިކަލް މޭލު ބޭރުން ދޯންޏެއް އަޑިއަށްގޮސް، ދެފެންދޭތެރޭ އޮޔާދާތީ ދަތުރުވެރިން ސަމާލުވުމަށް އެމްއެންޑީއެފުން އިލްތިމާސްކޮށްފިއެވެ.
އެމްއެންޑީއެފުން ބުނީ މި ދޯނި އޮޔާ ދަނީ އިރުދެކުނަށް ވާގޮތަށްކަމަށެވެ. ވީމާ މި ސަރަހައްދުން ދަތުރުކުރައްވާ ފަރާތްތަކުން، ޚާއްޞަކޮށް ރޭގަނޑު އެ ސަރަހައްދުން ދަތުރުކުރާ ފަރާތްތަކުން މިކަމަށް ސަމާލުވުމަށް ވަނީ އިލްތިމާސްކޮށްފައެވެ.
އަޑިއަށް ގޮސްފައިވަނީ މާލެއިން ފުރައިގެން އދ. މަހިބަދޫއަށް ދަތުރުކުރި ދޯންޏެކެވެ. އެހާދިސާ ހިނގާފައިވަނީ ބުދަ ދުވަހުގެ ރޭ އެވެ. ފުލުހުން ބުނީ "ރިކާޑޯ" ނަމަކަށް ކިޔާ މުދާ އުފުލާ ދޯންޏެއް އަލިހުރަސް ކަނޑަށް އަޑިއަށްދާކަމުގެ މައުލޫމާތަކާ ގުޅިގެން އދ ފުލުހުންގެ ލޯންޗު އެ ސަރަހައްދަށް ގޮސް އެ ދޯނީގައި ތިބި 8 މީހުން ފުލުހުންގެ ލޯންޗަށް ނެގިކަމަށެވެ. ދޯނީގައި ތިބި އެންމެންގެ ހާލުވެސް ރަނގަޅު ކަމަށް ފުލުހުން ބުނެއެވެ. މިކަމާ ގުޅިގެން އެމްއެންޑީއެފުން ބުނީ، ބުދަ ދުވަހުގެ ރޭ 20:50ގައި އެ ދޯނީގައި ތިބި އެންމެން މަހިބަދޫއަށް ގެންގޮސްފައިވާ ކަމުގެ މައުލޫމާތު ލިބިފައިވާކަމަށެވެ.
މި ހާދިސާގައި އެ ދޯނި ވަނީ އެއްކޮށް އަޑިއަށް ގޮސްފައެވެ.
