ހަފީޒުގެ ގައިގައި ޖެހުނު ސައިކަލު ދުއްވަން އިން މީހާގެ ބަންދަން 15 ދުވަސް
4 ޖުލައި 2023 | އަންގާރަ 16:07އުމުރުން 22 އަހަރުގެ މި މީހާ އަތުގައި ލައިސަންސެއް ނޯވޭ
އެކްސިޑެންޓުގައި އަނިޔާވި އަލީ ހަފީޒް
އަޟްޙާ އީދު ދުވަހުގެ ފަތިހު މާލޭގައި ހިނގި ނުރައްކާތެރި އެކްސިޑެންޓުގައި ސައިކަލް ދުއްވަން އިން މީހާގެ ބަންދަށް 15 ދުވަސް ކްރިމިނަލް ކޯޓުން ޖަހައިފިއެވެ.
މިއެކްސިޑެންޓުގައި ސައިކަލް ދުއްވަން އިން މީހާ، ކޯޓު އަމުރެއްގެ ދަށުން ހައްޔަރުކުރީ ހޯމަ ދުވަހުއެވެ. އެއަށްފަހު އަންގާރަ ދުވަހު އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަސް ޖަހައިދީފައިވާކަމަށް ފުލުހުން ބުނެއެވެ. އުމުރުން 22 އަހަރުގެ މި މީހާ އަތުގައި ލައިސަންސް ނޯންނަކަމަށް ފުލުހުން ބުނެއެވެ. ސައިކަލު ދުއްވި މީހާ ހައްޔަރުކުރުން ފަސްވެގެން މީހުންގެ ފާޑުކިޔުންތައް ފުލުހުންނަށް އަމާޒުވެފައިވާއިރު، އެކަމާ ގުޅޭގޮތުން ފުލުހުން ބުނެފައިވަނީ އޭނާ ހައްޔަރުކުރުން ފަސްކުރީ އޭނާއަށްވެސް އެކްސިޑެންޓްގައި ބޮޑެތި އަނިޔާތަކެއް ލިބިފައިވުމާއެކު، ފަރުވާދެމުން ދާތީކަމަށެވެ.
މި އެކްސިޑެންޓުގައި އަނިޔާވެގެން ފަރުވާދެމުން އަންނަނީ ގައުމީ ޔުނިވަސިޓީގެ ލެކްޗަރަރ އަލީ ހަފީޒްއަށެވެ. ހަފީޒް އެކްސިޑެންޓުވެފައިވަނީ ހީނާމާގޭ ޕާކިންގ ޒޯނު ކައިރީގައި ހުންނަ މިސްކިތުން ފަތިސް ނަމާދުން ނިމިވަޑައިގެން ނުކުންނެވިތަނާއެވެ. މަންޒަރު ދުށް މީހުން ބުނާގޮތުގައި ސައިކަލު ދުއްވާފައި އައީ ވަރަށް ބާރަށެވެ. އަދި ހަފީޒުގެ ގައިގައި ސައިކަލު ޖެހުމުން އޭނާ ވަރަށް ދުރަށް ވިއްސައިގެން ދިޔަކަމަށް ބުނެފައިވެއެވެ.
އެކްސިޑެންޓްވުމާއެކު ހަފީޒް އޭޑީކޭއަށް ގެންގޮސް އައިސީޔޫގައި ފަރުވާދީފައިވާއިރު އިތުރު ފަރުވާއަށް އަންގާރަ ދުވަހު އޭނާ ވަނީ އިންޑިޔާއަށް ގޮސްފައެވެ. ހަފީޒްގެ ހާލު ދެރަކަމުން ކޮމަރޝަލް ފްލައިޓެއްގައި ރާއްޖެއިން ބޭރަށް ނުގެންދެވޭތީ ބޭރަށް ގެންގޮސްފައިވަނީ އެއަރ އެމްބިއުލާންސެއްގައެވެ.
