ދުވާލެއްގެ މައްޗަށް ކިޔޭ ޓްވީޓުތަކުގެ އަދަދު ލިމިޓުކޮށްފި

ޓްވިޓަރ ބޭނުންކުރާ މީހުންނަށް ދުވާލެއްގެ މައްޗަށް ކިޔޭ ޓްވީޓުތަކުގެ އަދަދު ލިމިޓުކޮށްފިއެވެ.

މިކަން ހާމަކޮށްފައިވަނީ ޓްވިޓަރގެ ވެރިޔާ އަދި މަހުޖަނު، އިލޯން މަސްކު ކުރެއްވި ޓްވީޓެއްގައެވެ.

މަސްކު ވިދާޅުވީ ބައެއް މީހުން ޓްވިޓަރގެ ބޭނުން ނަހަމަގޮތުގައި ހިފަމުންދާތީ ދުވާލެއްގެ މައްޗަށް ފެންނާނެ ޓްވީޓުތައް ލިމިޓުކޮށްފައިވާކަމަށެވެ.

މިގޮތުން ވެރިފައިކޮށްފައިވާ އެކައުންޓުތަކަށް ދުވާލެއްގެ މައްޗަށް ފެންނާނީ 6،000 ޓްވީޓު ކަމަށް އޭނާ ވިދާޅުވިއެވެ. އަދި ވެރިފައިނުކުރާ އެކައުންޓުތަކަށް ދުވާލަކު 600 ޓްވީޓު ފެންނާނެ ކަމަށާއި، އަލަށް ހަދާފައިވާ، ވެރިފައި ނުކުރާ އެކައުންޓުތަކަށް ދުވާލެއްގެ މައްޗަށް ފެންނާނީ 300 ޓްވީޓު ކަމަށް މަސްކު ވިދާޅުވިއެވެ.

މިއީ ވަގުތީ ބަދަލެއްކަން މަސްކު ވަނީ ފާހަގަކުރައްވާފައެވެ. މި އަދަދުތައް ކުރިއަށްއޮތްތަނުގައި އިތުރުވާނެކަމަށް މަސްކު ވިދާޅުވިއެވެ.

މިގޮތުން ވެރިފައި ކޮށްފައިވާ އެކައުންޓުތަކަށް ދުވާލެއްގެ މައްޗަށް ފެންނަ ޓްވީޓުތައް 8،000ށް އިތުރުކޮށް، ވެރިފައިނުކުރާ އެކައުންޓުތަކަށް ދުވާލަކު 800 ޓްވީޓު އަދި، އަލަށް ހަދާފައިވާ ވެރިފައި ނުކުރާ އެކައުންޓުތަކަށް ދުވާލެއްގެ މައްޗަށް ފެންނަ ޓްވީޓުތައް 400އަށް އިތުރުވާނެ ކަމަށް މަސްކު ވިދާޅުވިއެވެ.