އައްޑޫސިޓީގައި ކުރިއަށްދާ އަޟްހާ އީދުގެ ކުޅިވަރުތައް ނިންމާލުމުގެ ގޮތުން މިރެޔާއި މާދަމާ ރޭ ހަވާ އަރުވާ ގޮތަށް ނިންމައިފި އެވެ.
އަޟްހާ އީދުގެ ހަރަކާތްތައް ފޯރިއާއި އެކު އައްޑޫ ސިޓީގެ އެކި އަވަށްތަކުގައި ކުރިއަށްދާއިރު، މިރޭ ހަވާ އަރުވަނީ މަރަދޫގައެވެ. އައްޑޫ ސިޓީ ކައުންސިލްއިން އިންތިޒާމްކޮށްގެން މަރަދޫގައި ކުރިއަށްދާ މެއިން އިވެންޓްތަކުގެ ތެރޭގައި ހިމެނޭ ވައު ދެމުމުގެ މުބާރާތް ނިންމާލުމަށްފަހު ވަނަތައް ހޮވާ އިނާމް ދިނުމަށްފަހު ހަވާ އެރުވުން އޮންނާނެ އެވެ.
ހަވާ އެރުވުމުގެ މިހަރަކާތަކީ މަރަދޫގައި ކުރިއަށްގެންދިޔަ ކުޅިވަރުތައް ނިންމާލުމުގެ ގޮތުން ކުރިއަށްދާ ހާއްސަ އިވެންޓެކެވެ. މަރަދޫގައި ހަވާ އެރުވުން އޮންނާނީ މަރަދޫ ބަނދަރު ސަރަހައްދުގައެވެ.
މީގެ އިތުރުން އައްޑޫސިޓީގެ އެކި އަވަށްތަކުގައި ކުރިއަށްދާ އިވެންޓްތަކުގެ އެންމެ ފަހުގެ ހަރަކާތެއްގެ ގޮތުގައި ޖުލައި އެއްވަނަ ދުވަހު ބާއްވާ "ފަންނާނުންގެ ޝޯވ" އާއެކު ހަވާ އެރުވުން ވެސް އޮންނާނެ އެެވެ. ހިތަދޫގައި ހަވާ އެރުވުން އޮންނާނީ ސިޓި ސްކެއަރގަ އެވެ.
ފަންނާނުންގެ ޝޯވްގައި ގިނަ އަދަދެއްގެ ފަންނާނުން ބައިވެރިވާއިރު ރާއްޖެއިން ބޭރުގެ މަޝްހޫރު ލަވަކިޔުންތެރިންވެސް ބައިވެރިވާނެ ކަމަށް މައުލޫމާތުލިބެއެވެ.
