ކައި ހަވާޓްޒް އާސެނަލްއަށް

67.5 މިލިއަން ޕައުންޑުގެ އެއްބަސްވުމެއްގެ ދަށުން ޗެލްސީގެ ފޯވާޑް ކައި ހަވާޓްޒް ގެނައުމުގެ މަސައްކަތް އާސެނަލުން ނިންމައިފިއެވެ.

ޖަރުމަނުގެ އިންޓަނޭޝަނަލް ކުޅުންތެރިޔާ އާސެނަލްއާއެކު ދިގު މުއްދަތުގެ އެއްބަސްވުމެއްގައި ސޮއިކޮށްފައިވާއިރު، މިއީ އާސެނަލްއިން ޓްރާންސްފާ ބާޒާރުގައި ސޮއިކުރި ފުރަތަމަ ކުޅުންތެރިޔާއެވެ.

އާސެނަލްގެ ކޯޗު މިކޭލް އާޓެޓާ ބުނީ ހަވާޓްޒްއަކީ ފެންވަރު ރަނގަޅު ކުޅުންތެރިއެއް ކަމަށާ، އޭނާއަކީ ވަރަށް ހުނަރުވެރި ކުޅުންތެރިއެއް ކަމަށެވެ. އަދި އޭނާއަކީ ޓީމުގެ މެދުތެރެއަށް އިތުރު ބާރެއް ގެނެސްދީ، ކުޅުމަށް ތަފާތު ގެނެސްދޭނެ ކުޅުންތެރިއެއްކަމަށެވެ.

2020 ވަނަ އަހަރު ޕްރިމިއާ ލީގުގެ ކުލަބަށް 62 މިލިއަން ޕައުންޑަށް ބަދަލުވުމުގެ ކުރިން އޭނާ ކުޅެފައިވަނީ ޖަރުމަނުގެ ލެވަކޫސަންއަށެވެ. 2021 ވަނަ އަހަރު ޗެމްޕިއަންސް ލީގު ފައިނަލުގައި މެންޗެސްޓާ ސިޓީ ކައިރިން މޮޅުވި ލަނޑު ޗެލްސީއަށް ޖަހައިދިނީ ހަވާޓްޒްއެވެ.

ހަވާޓްޒް ޗެލްސީން ވަކިވެފައި މިވަނީ ވެސްޓް ލަންޑަންގެ ކުލަބުގެ ވެރިޔާ ޓޮޑް ބޮއެލީ އައު ކޯޗު މައުރީސިއޯ ޕޮޗެޓީނޯ ގެނައުމުގެ ކުރިން އެ ކުލަބުގެ ސްކޮޑުގެ ސައިޒު ކުޑަކުރަން މަސައްކަތް ކުރަމުން ދަނިކޮށެވެ. އެންގޯލޯ ކާންޓޭ، ކުލިބާލީ، މެންޑީ އަދި ލޮފްޓަސް ޗީކް ޓީމު ދޫކޮށްލާފައިވާއިރު ޒިޔެކް، ޕުލިސިޗް އަދި މައުންޓުވެސް މިހާރު ޓީމު ދޫކޮށްލުމާ ވަރަށް ގާތެވެ.

ބެލެވޭ ގޮތުގައި ހަވާޓްޒް އާސެނަލްގެ ޖާޒީގައި ފުރަތަމަ ނުކުންނާނީ އޮގަސްޓު 12 ވަނަ ދުވަހު ނޮޓިންހަމް ފޮރެސްޓާ ދެކޮޅަށެވެ.