އައްޑޫ ބިން ހިއްކުން: މަރަދޫ، މަރަދޫފޭދޫގެ ބިން ހިއްކާ ނިންމާލައިިފި
މިއީ އިންޑިއާގެ އެގްޒިމް ބޭންކުގެ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީއެއް
އައްޑޫ ސިޓީ ބިން ހިއްކުން
އައްޑޫ ސިޓީ ބިން ހިއްކުމުގެ ބިޔަ މަޝްރޫއު ކުރިއަށްދާއިރު، ޒޯން އެކެއްގައި ހިމެނޭ މަރަދޫ، މަރަދޫފޭދޫގެ ބިން ހިއްކާ ނިންމާލައިިފި އެވެ.
އައްޑޫ ޑިވެލޮޕްމަންޓް ޕްރޮޖެޓުން ހާމަކޮށްފައިވާ ގޮތުގައި މަރަދޫ އަދި މަރަދޫ ފޭދޫގައި ހިއްކަން ހަމަޖެހިފައިވާ 76 ހެކްޓަރުގެ މަަސައްކަތް ނިމިފައިވާ ކަމަށާއި މިހާރު ތައްޔާރުވަމުންދަނީ ހިތަދޫ ޒޯން 2ގެ ބިން ހިއްކުމުގެ މަސައްކަތް ފެށުމަށެވެ. މަރަދޫ އަދި މަރަދޫ ފޭދޫގެ 76 ހެކްޓަރުގެ ބިން ހިއްކުމުގެ މަސައްކަތް އެއްކޮށް ނިންމާލުމަށް ގާތްގަނޑަކަށް 3 ހަފްތާ ވަނީ ހޭދަވެފައެވެ.
މިމަޝްރޫއުގެ ދަށުން ޖުމްލަ 228 ހެކްޓަރުގެ ބިން ހިއްކުމަށް ހަމަޖެހިފައިވެ އެވެ.
އައްޑޫން ބިން ހިއްކަނީ ރިސޯޓު ތަރައްގީ ކުރުމަށާއި ގެދޮރުގެ މަޝްރޫތައް ހިންގުމުގެ އިތުރުން ވިޔަފާރި ބޭނުންތަކަށް ހާއްސަކޮށްގެން ކަމަށާއި ބިން ހިއްކަނީ ހިތަދޫ އާއި ހުޅުދޫ/މީދޫގެ އިތުރުން މަރަދޫ އާއި މަރަދޫފޭދޫ އިންނެވެ. އަދި ރިސޯޓު ހިންގަން މުޅިން އަލަށް ފަސް ރަށެއް އުފެއްދުމަށް ނިންމާފައިވެ އެވެ.
އައްޑޫ ސިޓީން ބިން ހިއްކުމަށް ރޭވިފައިވާ ގޮތް:
* ހިތަދޫން 90 ހެކްޓަރުގެ ބިން
* މަރަދޫ / މަރަދޫފޭދޫން 76 ހެކްޓަރުގެ ބިން ހިއްކުން
* ހުޅުދޫމީދޫން 3 ހެކްޓަރުގެ ބިން
* ހުޅުމީދޫ ކައިރީގައި ޓޫރިޒަމަށް ހާއްސަކޮށްގެން ފަސް ހެކްޓަރުގެ ދެ ރަށް ހިއްކުން
* ޓޫރިޒަމަށް ހާއްސަކޮށްގެން 3 ހެކްޓަރުގެ ތިން ރަށާއި 3.3 ހެކްޓަރުގެ ދެ ރަށް ހިއްކުން
މިއީ އިންޑިއާގެ އެގްޒިމް ބޭންކުގެ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން ކުރިއަށްގެންދާ މަޝްރޫއަކަށްވާއިރު، މިމަޝްރޫއުއަށް 70-75 މިލިއަން ޑޮލަރު ހަރަދު ވާނެ ކަމަށް ލަފާކުރެވެއެވެ. އަދި އައްޑޫ ބިން ހިއްކުމުގެ މަސައްކަތް އަންނަ އޯގަސްޓް އަދި ސެޕްޓެމްބަރު ހިސާބުގައި އެއްކޮށް ނިންމާލެވޭނެކަމަށް އައްޑޫ ސިޓީ ކައުންސިލުން ބުނެއެވެ.
މަރަދޫ އަދި މަރަދޫ-ފޭދޫގެ ބިން ހިއްކައި ނިމުމާއެކު މިހާރު ހިތަދޫ ޒޯން 2 ބިން ހިއްކުމުގެ މަސައްކަތް ވެން އޫޑް ކުންފުނިން ވަނީ ފަށާފައެވެ. ހިތަދޫ ޒޯން 2 އަކީ ހިތަދޫ ޕޯޓް ލިމިޓެޑުގެ ދެކުނުން ހިއްކާ ސަރަހަދު ކަމަށްވާއިރު، މި ސަރަހައްދުން 40 ހެކްޓަރު ބިން ހިއްކަން ވަނީ ހަމަޖެހިފައެވެ.
އައްޑޫގެ ބިން ހިއްކުމުގެ އަމަލީ މަސައްކަތް ކުރުމަށް ސަރުކާރުން ހަވާލުކޮށްފައިވަނީ ނެދަލޭންޑްސްގެ ވެން އޫޑް ޑްރެޖިން އާއެވެ. އައްޑޫ ބިން ހިއްކުމުގެ މަޝްރޫއާއި ހިއްކާ ސަރަހައްދު ހިމާޔަތް ކުރުމަށް 1.3 ބިލިއަން ރުފިޔާ ހަރަދު ކުރުމަށް ނިންމާފައިވާއިރު، މިމަޝްރޫއުގެ މަސައްކަތާ އެކު އައްޑޫގެ ތަރައްޤީގެ މާސްޓަރ ޕްލޭނަށް ބޭނުންވާ ގިނަ ކަންކަން ފުރިހަމަވެގެންދާނެ އެވެ.
ސަރުކާރުން ބުނެފައި ވަނީ ތަރައްގީގެ ބޮޑެތި މަޝްރޫއުތަކާ އެކީ އައްޑޫ ބަދަލުވެގެން ދާނީ ހަގީގީ ފުރިހަމަ ސިޓީއަކަށެވެ.
އައްޑޫސިޓީ މަރަދޫ އަދި މަރަދޫ ފޭދޫ އަވަށުގެ ބިން ހިއްކުމުގެ ޢަމަލީ މަސައްކަތް ފަށާފައިވަނީ މިމަހުގެ 3 ވަނަ ދުވަހުއެވެ. މިމަސައްކަތް ރަސްމީކޮށް ފަށްޓަވައި ދެއްވީ ރައީސުލްޖުމްހޫރިއްޔާ އިބްރާޙީމް މުހައްމަދު ސާލިޙުއެވެ.
ރައީސް ސާލިޙު ވިދާޅުވީ އަައްޑޫގެ ތަރައްޤީގެ މަގު ފެންނަން ފަށައިފި ކަމަށާއި، މިއީ އުންމީދުން ފުރިފައިވާ މުސްތަގުބަލެއް ކަމަށެވެ. އަދި އައްޑޫ ސިޓީގެ މަގުތައް ހެދުމާއި، ބަނދަރުތައް ތަރައްޤީކުރުމާއި، އެއަރޕޯޓް ތަރައްޤީ ކުރުމާއި, ބިން ހިއްކުމާއި، އިތުރު ގިނަގުނަ މަޝްރޫޢުތަކަކީ، އައްޑޫ ސިޓީ އިޤްތިޞާދީ މައި މަރުކަޒަކަށް ބަދަލުކޮށްލާނެ މަޝްރޫޢުތަކެއް ކަމަށްވެސް ރައީސް ވިދާޅުވި އެވެ.
މަރަދޫ އަދި މަރަދޫ ފޭދޫ ބިން ހިއްކުމުގެ މަސައްކަތް ނިމިގެން ދިޔައިރު، މިމަސައްކަތް ފެށުމަށް ބޭއްވި ރަސްމިއްޔާތުގައި އައްޑޫސިޓީގެ މޭޔަރު އަލީ ނިޒާރު ވަނީ އަންނަ އޯގަސްޓް މަހު ބިން ބޭނުން ކުރާނެ ގޮތުގެ ލޭންޑް ޔޫޒް ޕްލޭން ހެދުމުގެ މަސައްކަތް އޯގަސްޓް މަހު ފަށާނެ ކަމަށް ބުނަފައެވެ. އަދި މި އަހަރު ނިމުމުގެ ކުރިން ބިން ޕްލޭންކޮށްގެން މަރަދޫ އާއި މަރަދޫފޭދޫގެ ރައްޔިތުންނަށް ބިން ބޭނުން ކުރުމަށްޓަކައި ހުށަހަޅަން ޖެހޭ ހުށަހެޅުންތައް ހުށަހަޅައި މަސައްކަތް ފެއްޓުމަށް ހުޅުވައިލާނެ ކަމަށްވެސް މޭޔަރު ވިދާޅުވިއެވެ.
އައްޑޫގެ ތަރައްޤީއަށް ބޮޑެތި ބަދަލުތަކެއް ގެނައުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. މި ބަދަލުތަކާއެކު އައްޑޫ އަކީ ސަރަޙައްދީ އިޤްތިޞާދުގެ މައި ހަބަކަށް ބަދަލުވެ، އޭގެ އެތަކެއް ފައިދާތަކާއި މަންފާއެއް ރައްޔިތުންނަށް ލިބިގެންދާނެ ކަމަށް ސަރުކާރުން ބުނެ އެވެ.
