މިހާރު އައްޑޫގައި ހިނގާ އެންމެ މުހިންމު މަސައްކަތަކީ ބަނދަރުގެ މަސައްކަތް: ޝުއާއު
28 ޖޫން 2023 | ބުދަ 13:25ފޭދޫއާއި ހިތަދޫ ބަނދަރުގެ މަސައްކަތް އެއީ އާއްމުންގެ އުންމީދުތަކާ ވަރަށް ބޮޑަށް ގުޅިފައި ހުރި މަޝްރޫއުތަކެއް
އައްޑޫ ސިޓީ ކައުންސިލްގެ ޑެޕިއުޓީ މޭޔަރު، މުހައްމަދު ޝުއާއު
މިހާރު އައްޑޫގައި ހިނގާ އެންމެ މުހިންމު މަސައްކަތަކީ ބަނދަރުގެ މަސައްކަތް ކަމަށް، އައްޑޫ ސިޓީ ކައުންސިލްގެ ޑެޕިއުޓީ މޭޔަރު މުހައްމަދު ޝުއާއު ވިދާޅުވެއްޖެއެވެ.
އޭނާ މިފަދައިން ވިދާޅުވީ ރާއްޖެ ޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުންނެވެ.
އޭނާ ވިދާޅުވީ އައްޑޫގައި ބަލައިލި ކޮންމެ ދިމާއަކުން ފެނިގެން ދަނީ ތަރައްގީގެ މަޝްރޫއުތައް ކަމަށެވެ. އަދި ފޭދޫއާއި ހިތަދޫ ބަނދަރުގެ މަސައްކަތް އެއީ އާއްމުންގެ އުންމީދުތަކާއި ވަރަށް ބޮޑަށް ގުޅިފައިވާ މަޝްރޫއުތައް ކަމަށް ޝުއާއު ވިދާޅުވިއެވެ. އެގޮތުން މިދިޔަ މެއި މަހުގެ ތެރޭގައި ފޭދޫ ބަނދަރު އެކްސްޓެންޑްކުރުމުގެ މަސައްކަތް ހަވާލުކޮށްފައި ވާކަމަށާއި، އެމްޓީސީސީން އެ މަސައްކަތް ވަރަށް އަވަހަށް ފަށާނެކަަމަށް އޭނާ ވިދާޅުވިއެވެ. ޝުއާއު އިތުރަށް ވިދާޅުވީ، ހިތަދޫގެ ބަނދަރުގެ ޝަކުވާއަކީވެސް ގިނަ ދުވަސްތަކެއް ވަންދެން ހައްލު ނުކުރެވި އޮތް މައްސަލައެއް ކަަމަށެވެ. އެކަމަށް ހައްލު ގެނައުމަށް 150 މިލިއަން ރުފިޔާއާ ހަމައަށް އިތުރަށް ފައިސާ ޚަރަދުކޮށްގެން ހިތަދޫ ބަނދަރުގެ މަސައްކަތް ކުރުމަށް ހަމަޖެހިފައިވާކަމަށް އޭނާ ވިދާޅުވިއެވެ. އެ މަސައްކަތް ނިމުމަކީ އެންމެންނަށް ލިބޭނެ އުފަލެއް ކަމަށް ޝުއާއު ވަނީ ވިދާޅުވެފައެވެ.
މީގެ އިތުރުން ޒުވާނުންނަށްޓަކައި ވަރަށް ގިނަ މަސައްކަތްތައް ކުރަމުންދާ ކަމަށް އޭނާ ވިދާޅުވިއެވެ. އެގޮތުން ވޮލީ ކޯޓާއި، ފުޓްސަލް ދަނޑު ފަދަ ތަންތަން އައްޑޫގެ އެކި އަވަށްތަކުގައި އަޅަމުންދާކަމަށާއި، އެއީ ޒުވާނުން އެދެމުން އައި ކަންކަން ކަމަށް ޝުއާއު ވިދާޅުވިއެވެ. ހަމައެހެންމެ ޒުވާނުންގެ ކުރިއެރުމަށް އިތުރު މަސައްކަތްތައް ވެސް ކުރެވެމުން ދާކަމަށާއި ޒުވާނުންނަށް ވަޒީފާގެ ފުރުސަތު ހޯދައިދިނުމަށާއި ބާރުވެރިކުރުވުމަށް ވެސް މަސައްކަތްތައް ކުރިއަށް ދާ ކަމަށް ޝުއާއު ވިދާޅުވިއެވެ.
