އަލިފާނުގެ ހާދިސާތަކުގައި ލިބުނު ގެއްލުންތަކަށް އެހީގެގޮތުގައި 1 މިލިއަނަށްވުރެ ގިނަ ރުފިޔާ ފޯރުކޮށްދީފި
މި އަހަރުގެ މިހާތަނަށް ހިނގި އަލިފާނުގެ ހާދިސާތަކުގައި 08 ރަށެއްގެ 08 ގެއަކަށް ބޮޑެތި ގެއްލުންތަކެއް ލިބިފައިވޭ
މީގެ ކުރިން ހިނގާފައިވާ އަލިފާނުގެ ހާދިސާއެއް ހިނގި ތަނެއްގައި ސިފައިން ހަރަކާތްތެރިވަނީ
މިއަހަރުގެ މިހާތަނަށް ހިނގި އަލިފާނގެ ހާދިސާތަކުގައި ލިބުނު ގެއްލުންތަކަށް އެހީގެ ގޮތުގައި 1 މިލިއަނަށްވުރެ ގިނަ ރުފިޔާ، އެހީގެ ގޮތުގައި ފޯރުކޮށްދީފައިވާކަމަށް، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)އިން ބުނެފިއެވެ.
ބުރާސްފަތި ދުވަހު އެންޑީއެމްއޭއިން ވަނީ 2023 ވަނަ އަހަރުގެ މިހާތަނަށް ހިނގި އަލިފާނުގެ ހާދިސާތަކުގައި ލިބުނު ގެއްލުންތަކަށް އެހީ ފޯރުކޮށްދެވިފައިވާ ގޮތުގެ ތަފާސްހިސާބު އާއްމުކޮށްފައެވެ.
އެންޑީއެމްއޭއިން ބުނީ 2023 ވަނަ އަހަރުގެ މިހާތަނަށް ހިނގި އަލިފާނުގެ ހާދިސާތަކުގައި 08 ރަށެއްގެ 08 ގެއަކަށް ބޮޑެތި ގެއްލުންތަކެއް ލިބިގެން އެ އޮތޯރިޓީއަށް ރިޕޯޓުކޮށްފައިވާކަމަށެވެ. އަދި އަލިފާނުގެ ހާދިސާގެ ސަބަބުން ލިބުނު ގެއްލުންތަކުން އަރައިގަތުމަށް އެހީގެ ގޮތުގައި އެފަރާތްތަކަށް ޖުމްލަ އެއް މިލިއަން އެއްލައްކަ ފަންސަވީސް ހާސް ނުވަސަތޭކަ ސާޅީސް ރުފިޔާ، ފަސްދޮޅަސް ލާރި (1،125940.60) އެހީގެ ގޮތުގައި ފޯރުކޮށްދީފައިވާ ކަމަށެވެ.
މި 8 ރަށަކީ؛ ރ. އުނގޫފާރު، ސ. ފޭދޫ، ހދ. މަކުނުދޫ، ހދ. ނެއްލައިދޫ، ސ. ހިތަދޫ، ހއ. ފިއްލަދޫ، ގދ. ގައްދޫ އަދި އއ. ތޮއްޑޫއެވެ. އެގޮތުން އުނގޫފާރަށް 86،630 ރުފިޔާ، ސ. ފޭދޫއަށް 179،400 ރުފިޔާ، މަކުނުދޫއަށް 160،441.6 ރުފިޔާ، ނެއްލައިދޫއަށް 35،655 ރުފިޔާ، ސ. ހިތަދޫއަށް 19،1640 ރުފިޔާ، ފިއްލަދޫއަށް 223،872 ރުފިޔާ، ގދ. ގައްދޫއަށް 81281.6 ރުފިޔާ، އަދި ތޮއްޑޫއަށް 163،020 ރުފިޔާ ވަނީ ދީފައެވެ.
މި ހާދިސާތަކުގައި 17 ފަރާތަކަށް ވަގުތީ ބޯހިޔާވަހިކަމާއި އަންނައުނާއި ކައްކައި ކެވޭނެ އިންތިޒާމް ހަމަޖައްސައިދެވުނު ކަމަށް އެންޑީއެމްއޭއިން ބުނެއެވެ.
އެންޑީއެމްއޭއިން ބުނީ ވޭތުވެދިޔަ 5 އަހަރަށް ބަލާއިރު، އަލިފާނުގެ ހާދިސާތަކުގައި ގެދޮރަށް ބޮޑެތި ގެއްލުންތަކެއް ލިބިގެން ރިޕޯޓުކޮށްފައިވާ މިންވަރު ވަނީ އިތުރުވެފައި ކަމަށެވެ. އެގޮތުން 2019ގައި 14 ހާދިސާ، 2020ގައި 8 ހާދިސާ، 2021ގައި 16 ހާދިސާ، 2022ގައި 65 ހާދިސާ އަދި 2023ގެ ޖޫން މަހާ ހަމައަށް 31 ހާދިސާ ރިޕޯޓުކޮށްފައިވާކަމަށް އެންޑީއެމްއޭއިން ބުނެއެވެ.
އެންޑީއެމްއޭއިން ބުނީ ވޭތުވެދިޔަ 5 އަހަރު ހިނގާފައިވާ އަލިފާނުގެ ހާދިސާތަކުގައި ގެއްލުން ލިބުނު ފަރާތްތަކަށް ''ކާރިސާތަކުގައި އެހީ ދިނުމުގައި ގެންގުޅޭ މިންގަނޑު''ގެ ދަށުން، ނަވާރަ މިލިއަން ތޭވީސްހާސް އެއްސަތޭކަ ސާޅީސް ހަތަރު ރުފިޔާ، ނަވާވީސް ލާރި އެހީގެ ފޯރުކޮށްދީފައިވާކަމަށެވެ.
މީގެ އިތުރުން އަލިފާނުގެ ހާދިސާތައް އަތޮޅު ތެރެއިން ރިޕޯޓުކުރާ މިންވަރުވެސް އިތުރުވަމުންދާކަން އެފަރާތުން ފާހަގަކުރެއެވެ.
އަލިފާނުގެ ހާދިސާތަކުން ރައްކާތެރިވުމަށް އަޅަންޖެހޭ ސަލާމަތީ ފިޔަވަޅުތައް އެޅުމާއި، ގޭސް އަދި ކަރަންޓު ބޭނުން ކުރުމުގައި ރައްކާތެރިވުމާއި، ގޯތި ގެދޮރާއި އަގުބޮޑު މުދަލުގެ އިތުރުން ވިޔަފާރިތައް އިންޝުއަރެންސް ކުރުމަށްވެސް އެންޑީއެމްއޭއިން އިލްތިމާސްކޮށްފައިވެއެވެ.
