މާދަމާގެ ޖަލްސާއަކީ އިދިކޮޅުން އެދިގެން ކަމެއް ހާސިލްކުރަން ބާއްވާ ޖަލްސާއެއް - އަސްލަމް

ބުރާސްފަތި ދުވަހަށް އެޖެންޑާކޮށްފައިވާ ޖަލްސާއަކީ، އިދިކޮޅު މެންބަރުންގެ އެދުމުގެ މަތިން ޖަލްސާއެއް ބާއްވައިދޭނެކަމަށް މަޖިލީހުގެ ރައީސް ވިދާޅުވެ ބާއްވަވާ ޖަލްސާއެއްކަމަށް، އެމްޑީޕީ ޕާލަމެންޓްރީ ގްރޫޕުގެ ލީޑަރު މުހައްމަދު އަސްލަމް ވިދާޅުވެއްޖެއެވެ.

ބުރާސްފަތި ދުވަހުގެ ޖަލްސާގައި އެޖެންޑާކޮށްފައިވަނީ މަޖިލީހުގެ ދާއިމީ ކޮމިޓީތަކުގައި، ސިޔާސީ ޕާޓީތަކާއި ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރައްވާނެ ނިސްބަތަށް ގެނެވޭ ބަދަލާމެދު ބަހުސްކުރުމެވެ. އަދި ބަހުސަށްފަހު, މަޖިލީހުގެ ދާއިމީ ކޮމިޓީތަކުގައި މެންބަރުން ހިމެނިވަޑައިގަންނަވާނެ ގޮތަށް އިސްލާހު ހުށަހެޅުއްވުމަށް މެންބަރުންނަށް މުއްދަތެއް ދިނުމަށްފަހު، ހުށަހަޅުއްވާ އިސްލާހަށް އިސްލާހު ހުށަހެޅުއްވުމަށް ފުރުސަތު ދ،ީ އެގޮތުން ހުށަހަޅުއްވާ އިސްލާހުތަކަށް ވޯޓަށް އެހުން ހިމެނެއެވެ. އަދި މަޖިލީހުގެ ދާއިމީ ކޮމިޓީތަކުގައި، ސިޔާސީ ޕާޓީތަކާއި ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރައްވާނެ ގޮތާމެދު ގޮތެއް ނިންމެވުން އޮންނާނީ ދެން އޮންނަ މަޖިލީހުގެ ޖަލްސާއެއްގައި ކަމަށް ބުނެފައިވެއެވެ.

Advertisement

ކުއްލިގޮތަކަށް އެޖެންޑާކޮށްފައިވާ ޖަލްސާއާ ގުޅޭގޮތުން، މަޖިލީހުގެ މެޖޯރިޓީ ލީޑަރު އަދި އެމްޑީޕީގެ ޕީޖީ ލީޑަރު މުހައްމަދު އަސްލަމް "ރާއްޖެއެމްވީ" އަށް ވިދާޅުވީ، ބުރާސްފަތި ދުވަހުގެ ޖަލްސާގެ އެޖެންޑާއަކީ އޭނާގެ މަޖިލީހުގެ ހަޔާތުގައި ދުށް އެންމެ ހެއްވާ އެޖެންޑާ ކަމަށެވެ. އަދި އެއްދުވަހު ހުށަހަޅާފައި އަނެއްދުވަހު ވޯޓަށް އަހަން ދުވަހަކުވެސް މަޖިލީހުން އެޖެންޑާ ކޮށްފައި ނުވާކަމަށާއި، މަޖިލީހުގެ ފްލޯރއަށް މައްސަލަ ގެނައުމުން މަޖިލިސް ފްލޯރއިން މައްސަލަ ނިންމާނެ ކަމަށެވެ. އަދި މަޖިލީހުގެ ރައީސް ހިތްޕުޅަށް އަރާހާ ގޮތަކަށް ކަންތައް ކުރައްވާތީ ވަރަށް ދެރަ ކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ ދައުރު ނިންމަން ޖަލްސާއެއް ބާއްވަނީ ނޫންކަމަށާއި، ހަމަ ޖަލްސާއެއް ބާއްވާފައި، ކަމެއް ކުރިކަން ދެއްކުމަށް ޖަލްސާއެއް އެޖެންޑާކުރައްވާފައި ވާކަމަށެވެ. މަޖިލީހުގެ ގަވާއިދު އިސްލާހުކުރުމަށް މައްސަލައެއް ހުށަހަޅާފައި ވާނެކަމަށާއި، އެ މައްސަލަ އެޖެންޑާ ނުކުރަންވީ ސަބަބެއް އޮތްތޯ އޭނާ ވަނީ ސުވާލު އުފައްދަވާފައެވެ. އިތުބާރުނެތް ކަމުގެ މައްސަލަތައްވެސް ހުށަހަޅާފައިވާ ކަމަށާއި، އެހެނިހެން މައްސަލަތައްވެސް އެޖެންޑާ ނުކޮށް އެބަހުރިކަން ފާހަގަކުރައްވައި އަސްލަމް ވިދާޅުވީ، އެއިން އެއްވެސް މައްސަލައެއް އެޖެންޑާކޮށްފައި ނެތްކަމަށެވެ.

އަސްލަމް ވިދާޅުވީ ބުރާސްފަތި ދުވަހުގެ ރިޔާސަތު ބަލަހައްޓަވާ ބޭފުޅެއް އެނގިވަޑައިނުގަންނަވާ ކަމަށެވެ. އަދި މަޖިލީހުގެ ރައީސް ނިންމަވާ ކަމެއްގެ ގޮތުގައި އެކަން އޮންނައިރު، މަޖިލީހުގެ ރައީސް މުހައްމަދު ނަޝީދު އިންނަވަން ބޭނުންފުޅުނުވާނަމަ، ފައްޓަވާފައި އެހެންބޭފުޅަކާ ހަވާލުކުރެއްވިދާނެ ކަމަށެވެ. އެހެންނަމަވެސް އެހެން ބޭފުޅަކާ ފައްޓަވަން ހަވާލެއް ނުކުރެއްވޭނެ ކަމަށެވެ. އަދި މި ޖަލްސާގައި އެމްޑީޕީގެ ފަރާތުން ހުށަހެޅުމެއް ހުށަހަޅާނެތޯ ނިންމާނީ ޕީޖީ ބައްދަލުވުމުން ކަމަށާއި، ހެނދުނު 8 ޖަހާއިރު ޕީޖީ ބައްދަލުވުމެއް އޮންނާނެ ކަމަށެވެ.