ރެއާލް މެޑްރިޑުން ޓޮނީ ކްރޫސްގެ އެއްބަސްވުން ޖޫން 2024އާ ހަމަޔަށް އިތުރުކޮށްފިއެވެ.

މިދިޔަ ހަފުތާގައި 113 މިލިއަން ޕައުންޑަށް, ޖޫޑް ބެލިންހަމް ސޮއިކޮށް ނިންމާލުމަށްފަހު، މެޑްރިޑްގެ މިޑްފީލްޑްގެ ޖާގަތަކަށް ވާދަވެރިކަން ބޮޑުނަމަވެސް ކްރޫސް ހިފަހައްޓަން އެ ޓީމުން ބޭނުންވާއިރު، އޭނާ މިހާރު ވަނީ އާ އެއްބަސްވުމެއްގައި ސޮއިކޮށްފައެވެ. މެޑްރިޑުން މިކަން ހާމަކޮށްފައިވަނީ މިދިޔަ ބުދަ ދުވަހު "ދަ ސްޓޯރީ ކޮންޓިނިއުސް" ކެޕްޝަނާއެކުއެވެ.

ބަޔާން މިއުނިކުން 2014 ވަނަ އަހަރު މެޑްރިޑާ ގުޅުނު ކްރޫސް ވަނީ އޭގެ ކުރީ އަހަރު ބަޔާންއާއެކު ޗެމްޕިއަންސް ލީގު ކާމިޔާބުކޮށްފައެވެ. އޭގެ ފަހުން ޔޫރަޕްގެ ފުޓްބޯޅައިގެ އެންމެ ބޮޑު ތަށި، ހަތަރު ފަހަރެއްގެ މަތިން ރެއާލް މެޑްރިޑާއެކު ހޯދީ އެ ކްލަބުގެ އެންމެ ކާމިޔާބު ދުވަސްތަކުގައެވެ.

ކްރޫސް ވަނީ ސްޕެނިޝް ލީގާއި ކަޕު ތިން ފަހަރެއްގެ މަތިން ކާމިޔާބުކޮށް، މެޑްރިޑާއެކު ފަސް ފަހަރު ކްލަބް ވޯލްޑް ކަޕްވެސް ކާމިޔާބުކޮށްފައެވެ.

މެޑްރިޑްގައި ހޭދަކުރި ނުވަ ސީޒަނުގައި ކްރޫސް ވަނީ 417 މެޗު ކުޅެ، އެ ޓީމުގެ މިޑްފީލްޑްގެ އެންމެ މުހިންމު އެއް ކުޅުންތެރިޔާއަށް ވެފައެވެ.