ދެމަފިރިއެއްގެ ހިތުލޯބިން ބިނާވެގެން އައީ ތަރިކައިގެ ގަނޑުވަރެއް

ކަނޑު ބޯޓުފަހަރު ދުއްވުމުގައި އެއީ މާހިރެއްނަމަވެސް، އަލާ ޖަމާލުގެ ހިތުލޯބި ޖެހިފައި އޮންނަނީ ގަދީމީ، އާސާރީ ތަކެއްޗަށެވެ. ހަޔާތުގެ ބައިވެރިޔާ، މޫނާ އަލްއަވަދުލީއަކީ ވެސް ހަމަ އެ ކަހަލަ މީހެކެވެ. މިސްރުގެ ވެރިރަށް ގާހިރާގައި ޖަމާލުގެ ދެމަފިރިން ދިރިއުޅެމުންދާ ގެއަށް ބަލައިލުމުން، އެކަމުގެ ހެތްކަކަށް ފުދެއެވެ. އެއީ އަގު ބޮޑު އެތައް ރައުސުލްމާލެއް ހުރި ދާރުލްއާސާރެކެވެ. މިދިޔަ 37 އަހަރު ދުވަހު، ދުނިޔޭގެ އެކި މަންޒިލްތަކަށް އެ ދެމަފިރިން ކުރި ދަތުރުތަކުގައި އެއްކުރި އެތައް ސާމާނަކުން މުއްސަނދިކޮށްފައިވާ ދާރުލްއާސާރެކެވެ.

ޖަމާލްއާއި މޫނާގެ ޕްރައިވެޓް ދާރުލްއާސާރުގައި ހުރި ބައެއް ތަކެއްޗަކީ އެމީހުންގެ މައިންބަފައިންގެ ކިބައިން ވާރުތަވި ތަކެއްޗެވެ. އެ މީހުންނަކީވެސް އާސާރީ ތަކެއްޗަށް ލޯބިކުރި ބައެއް ކަމުން، އެއް ޖީލުން އަނެއް ޖީލަށް އާސާރުތައް ފޯރުކޮށްދިނީއެވެ.

މަދުން ނޫނީ ނުފެންނަ އެތައް ތަރިކައެއް އެ ދާރުލްއާސާރުގައި މިއަދު އެބަހުއްޓެވެ. 1890ގެ އަހަރުތަކަށް ތާރީޚު ޖަހައިލެވޭ ވަށިގަނޑުތަކާއި، އެންމެ އިހުގެ އޮމެގާ އަތުކުރީ ގަޑިއާއި، ފަރުގައި ބަހައްޓާ ގަޑިތަކުގެ އިތުރުން، އެކި ޒަމާންތަކުން ފާހަގަކުރެވޭ ކުރެހުންތަކުން، ޖަމާލުގެ ގޭތެރެ ފަޅުފިލުވައިދެއެވެ. މިއިން ކޮންމެ އެއްޗަކާ ގުޅިފައިވާ ޚާއްސަ ވާހަކައެއްވެސް އޮވެއެވެ. ވިލާތާއި އިރުމަތީ ބައްރާއި އެފްރިކާ ސަރަހައްދުން 50ށްވުރެ ގިނަ ގައުމުގެ އާސާރުތަކުން ޖަމާލާއި މޫނާގެ ގަނޑުވަރު ވިދައި ބަބުޅައެވެ.

އާއިލީގޮތުން ވާރުތަވަމުން ދާ މި ކަމުގައި، ޖަމާލާއި މޫނާގެ ފިރިހެން ދަރިފުޅުވެސް ވަނީ ރަނގަޅަށް ބަނދެވިފައެވެ. މުހައްމަދު އަލާ ޖަމާލްވެސް، ތާރީޚީ އާސާރުތަކަށް ލޯބިކުރެއެވެ.

1860ގެ އަހަރުތަކުގައި މިސްރުން މަޝްހޫރުވި އިސްމާއީލް ޕާޝާގެ މިލްކިއްޔާތުގައި ހުރި ގަދީމީ ޕިއާނޯއެއް ކުޅެލުމަކީ، މުހައްމަދުގެ ހިތަށް އިންތިހާ ހަމަޖެހުން ގެނުވާ ކަމެކެވެ.

އާއިލީގޮތުން ވާރުތަވަމުން އަންނަ ކަމެއްގެ އިތުރުން، ތާރީޚީ ތަރިކައަށް މިހާރަށްވުރެ ޚާއްސަ ސަމާލުކަމެއް ދިނުމަކީ ގައުމީ ފެންވަރެއްގައި ކުރަންޖެހޭ ކަމެއް ކަމަށާއި، ފަންނުވެރިންނާއި ފަންނުވެރިންގެ މަސައްކަތްތައް ބަލައިގަތުމަށް މިސްރުން އަދިވެސް އިތުރު މަސައްކަތްތަކެއް ކުރަންޖެހޭކަމަށް މޫނާ ގަބޫލުކުރެއެވެ.