މަޖިލީހުގެ ގަވާއިދުގެ މައްސަލަ ހޯމަ ދުވަހަށް އެޖެންޑާ ކޮށްދޭނެކަމަށް މަޖިލީހުގެ ރައީސް ވިދާޅުވިކަމަށް އެ އިދާރާއިން އަންގާފައިވާކަމަށް، އެމްޑީޕީ ޕީޖީ ގްރޫޕުގެ ލީޑަރު މުހައްމަދު އަސްލަމް ވިދާޅުވެއްޖެއެވެ.

އަންގާރަ ދުވަހުގެ ހަވީރު އެމްޑީޕީ ޕީޖީ ގްރޫޕުގެ ފަރާތުން ރައްޔިތުންގެ މަޖިލީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އަސްލަމް ވިދާޅުވީ، މަޖިލީހުގެ ގަވާއިދަށް ގިނަ ބަދަލުތަކެއް ގެނައުމަށް މަޖިލީހަށް ހުށަހަޅުއްވާފައިވާކަމަށެވެ. މިގޮތުން މަޖިލީހުގެ ރައީސާއި ނައިބުރައީސްގެ އިތުބާރު ނެތްކަމުގެ މައްސަލައެއް އެއްފަހަރާ ހުށަހެޅޭ ހާލަތުގައި އަމަލުކުރާނެ ގޮތް ބަޔާންކޮށްފައިވާކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ އެ އިސްލާހު އެޖެންޑާކޮށްދިނުމަށް މަޖިލީހުގެ ރައީސްގެ އަރިހުން އެ އިދާރާއިން އެދިފައިވާކަމަށެވެ. އެހެންނަމަވެސް މިދިޔަ ބުދަ ދުވަހުގެ ޖަލްސާއަށްވެސް މި މައްސަލަ ހުށަހެޅިފައިނުވާކަން ފާހަގަކުރައްވައި އަސްލަމް ވިދާޅުވީ، އެ އިސްލާހުތައް އެޖެންޑާކޮށްދިނުމަށް އަމިއްލަފުޅަށްވެސް މަޖިލީހުގައި އެދިވަޑައިގެންފައިވާކަމަށެވެ. މިގޮތަށް އެދިވަޑައިގަތުމުން ހޯމަ ދުވަހުގެ ޖަލްސާއަށް މި މައްސަލަ އެޖެންޑާކޮށްދެއްވާނެ ކަމަށް، މަޖިލިސް ރައީސްގެ މެސެޖެއްގެގޮތުގައި އަމީންއާންމު ވިދާޅުވިކަމަށް އަސްލަމް ވިދާޅުވިއެވެ. އެހެންނަމަވެސް ހޯމަ ދުވަހުގެ އެޖެންޑާއިން އެ އައިޓަމް ފެނިގެން ނުދިޔަކަމަށް އަސްލަމް ވިދާޅުވިއެވެ.

ރައްޔިތުންގެ މަޖިލީހުގެ ރައީސާއި ނައިބުރައީސްގެ އިތުބާރު ނެތްކަމުގެ މައްސަލައެއް މަޖިލީހަށް ވައްދާފައިވާއިރު، މަޖިލީހުގެ ރައީސް ވަނީ މިތަނުން ކޮންމެވެސް އެއް މައްސަލައެއް ނެންގެވުމަށް އެދިވަޑައިގެންފައެވެ. ހޯމަ ދުވަހު މަޖިލީހުގެ ރައީސް މުހައްމަދު ނަޝީދު ބޭއްވެވި ނޫސްވެރިންގެ ބައްދަލުވުމުގައި ވަނީ، މިތަނުން އެއް މައްސަލައެއް ނުނަންގަވާހާ ހިނދަކު މަޖިލިސް ކުރިއަށް ނުގެންދެވޭނެކަމަށް ވިދާޅުވެފައެވެ. އަދި އަންގާރަ ދުވަހުގެ ޖަލްސާ ކުރިއަށްގެންދަވާފައެއް ނުވެއެވެ.