ކުރިއަށް އޮތް ދެ ޖަލްސާ ދެން ބޭއްވޭކަށް ނެތް: ނަޝީދު

ރައްޔިތުންގެ މަޖިލީހުގެ ކުރިއަށް އޮތް ދެ ޖަލްސާ ދެން ބޭއްވޭކަށް ނެތްކަން ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިއުލާނުކުރައްވައިފިއެވެ.

ރައީސް ނަޝީދު މިކަން އިއުލާނުކުރެއްވީ ހޯމަ ދުވަހުގެ މަޖިލިސް ޖަލްސާއަށްފަހު ކުރިއަށްދިޔަ ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުންނެވެ.

ރައީސް ނަޝީދު ވިދާޅުވީ މަޖިލިސް ހުއްޓުވާލުވުމުގެ ނިޔަތުގައި ނޫނީ މަޖިލީހުގެ ރައީސްއާއި ނާއިބުރައީސްގެ އިތުބާރު ނެތްކަމުގެ މައްސަލަ މެމްބަރުން ހުށަނާޅުއްވާނެ ކަމަށެވެ. އެމަނިކުގާނުގެ ނިސްބަތްވެވަޑައިގަންނަވާ ޕާޓީގެ 54 މެމްބަރުންގެ ސޮޔާއެކު އެމަނިކުފާނުގެ އިތުބާރު ނެތްކަމުގެ މައްސަލައެއް ހުށަހެޅުއްވުމުން ބައިނަލްއަގުވާމީ ބެސްޓް ޕްރެކްޓިސްގައި މިކަން ކުރާ ގޮތް ބައްލަވާ ކަމަށާއި، އެގޮތަށް ބައްލަވާނަމަ އެމަނިކުފާނު ރިޔާސަތުގައި އިތުރަށް އިންނެވުމަކީ އެއްގޮތަކަށްވެސް ކަމުދާ ގޮތެއް ނޫން ކަމަށް ނަޝީދު ވިދާޅުވިއެވެ.

ނަޝީދު ވަނީ މަޖިލިސް ހުއްޓުވާނުލެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ އަރިހުން އެދިލައްވާފައެވެ. އަދި މިކަން ކުރަން އޮންނަ އުސޫލުގެ ތެރެއިން މިކަން ކުރެއްވުމަށް އެދިލައްވައި ނަޝީދު ވަނީ ފުރަތަމަ ނާއިބުރައީސްގެ އިތުބާރު ނެތްކަމުގެ މައްސަލަ ނެންގެވުމަށްފަހު ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށަހެޅުއްވުމަށް އެދިވަޑައިގެންފައެވެ.

މަޖިލީހުގެ ރައީސް މިހެން ވިދާޅުވެފައިވާއިރު މަޖިލީހުގެ އެމްޑީޕީ ބައެއް މެމްބަރުން ވަނީ މަޖިލީހުގެ މަސައްކަތްތައް ނިމެންދެން މަޖިލިސް ޗުއްޓީއަށް ނުގޮސް ކުރިއަށް ގެންދިއުމަށް އެދިވަޑައިގެންފައެވެ.

ހޯމަ ދުވަހު އޮތް މަޖިލިސް ޖަލްސާގައި އިހަވަންދޫ ދާއިރާގެ މެންބަރު މުހައްމަދު ޝިފާއު ވަނީ، މަޖިލީހުގައި ކުރަން ހުރި މުހިއްމު މަސައްކަތްތައް ނިންމާލެވެންދެން މަޖިލީހުގެ ވަގުތު އިތުރުކޮށްދިނުމަށް އެދިލައްވާފައެވެ. އެގޮތުން މަޖިލީހުގެ ރައީސާއި ނައިބްރައީސްގެ އިތުބާރު ނެތްކަމުގެ މައްސަލައާއި، ބަންޑާރަނައިބް އިބްރާހިމް ރިއްފަތުގެ އިތުބާރު ނެތްކަމުގެ މައްސަލައިގެ އިތުރުން، މަޖިލީހަށް ހުށައެޅިފައިވާ އިމްތިޔާޒުގެ މައްސަލަތައް ނިންމުމަށްޓަކައި، މަޖިލީހުގެ ވަގުތު އިތުރުކުރަންޖެހޭކަމަށް ޝިފާއު ވިދާޅުވިއެވެ.

އޭގެ އިތުރުން، އައްޑޫ މީދޫ ދާއިރާގެ މެމްބަރު ރޮޒެއިނާ އާދަމްވެސް ވަނީ ޝިފާއުގެ ހުށައެޅުމަށް ތާއީދު ކުރައްވާފައެވެ.

ރޮޒެއިނާ ވިދާޅުވީ، މަޖިލީހުގެ ޤަވާއިދަށް ބަލާއިރު، ހޯމަ ދުވަހަކީ މެމްބަރު އަފީފަށްވެސް ރިޔާސަތު ބެލެހެއްޓެވޭ ފަހު ދުވަސްކަމަށާއި، ދެން ހުރި ޖަލްސާތަކުގައި ކަންކަން ވާނެ ގޮތްވެސް މެމްބަރުންނަށް އެނގެން ޖެހޭ ކަމަށެވެ.

މަރަދޫ ދާއިރާގެ މެމްބަރު އިބްރާހިމް ޝަރީފާއި، ހެންވޭރު ދެކުނު ދާއިރާގެ މެމްބަރު ހުސައިން ޝަހީމްވެސް ވަނީ މަޖިލީހުގެ ދައުރު ދިގުކޮށްގެން ނަމަވެސް، މުހިއްމު މައްސަލަތައް ނިންމަންޖެހޭނެކަމަށް ވިދާޅުވެފައެވެ.

އޭގެ އިތުރުން، މަކުނުދޫ ދާއިރާގެ މެމްބަރު ރާއީވެސް ވަނީ، މަޖިލިސް ރިސެސްއަށް ދިއުމުގެ ކުރިން މަޖިލީހުގައި ކޮންމެހެންވެސް ނިންމަވަން ޖެހި، ނުނިމިފައި ހުރި ބިލުތައް ކުރިއަށް ގެންދެވުމަށް ރިޔާސަތުން ފުރުސަތު ދެއްވުމަށް އެދިލައްވާފައެވެ. ކޮންމެ ބަޔަކު ހުށައެޅިކަމުގައިވީނަމަވެސް، މުހިއްމު މަސައްކަތެއްނަމަ އެކަމެއް ކުރެވޭނެ ގޮތްތަށް ހަދަން ޖެހޭކަމަށް ރާއީ ވިދާޅުވިއެވެ.