އިންޑިއާއިން ރާއްޖޭގެ ސަލާމަތީ ބާރުތަކުގެ ރެކްރޫޓުންގެ ސައިކޮލޮޖިކަލް ޕްރޮފައިލެއް ހެދުމުގެ އެއްވެސް މަޝްވަރާއެއް ކުރިއަށް ނުދާ ކަމަށް އެމްއެންޑީއެފުން ބުނެފިއެވެ.
އެމްއެންޑީއެފުން މިހެން ބުނީ ރާއްޖޭގެ ސަލާމަތީ ބާރުތަކާއި ތަންފީޒީ ބާރުތަކުގެ ވަޒީފާއަށް އަލަށް ނަގާ މީހުންގެ ނަފްސާނީ ހާލަތު ދެނެގަތުމަށްޓަކައި (ސައިކޮލޮޖިކަލް ޕްރޮފައިލިންގް) ހެދުމަށްޓަކައި އިންޑިއާގެ ޔުނިވާސިޓީއަކާއެކު މަސައްކަތްތަކެއް ކުރަން ފަށާފައިވާ ކަމަށް ރާއްޖޭގައި ނޫހެއްގައި އާންމުކޮށްފައިވާ ޚަބަރަކާއި ގުޅިގެންނެވެ.
އެ ނޫހުގައި ބުނެފައިވަނީ އިންޑިއާގެ ހަބަރު ފަތުރާ ވަސީލަތްތަކުގައި ޝާއިއުކޮށްފައިވާގޮތުން، ދިވެހިރާއްޖޭގެ ސަލާމަތީ މަސައްކަތްތަކަށް ހޮވޭ މުވައްޒަފުންގެ ސައިކޮލޮޖިކަލް ޕްރޮފައިލް ކުރުމުގެ މަސައްކަތްތައް ކުރަމުންދަނީ އިންޑިއާގެ ގުޖުރާތުގެ ގާނދީނަގަރުގައި ހުންނަ ގައުމީ ފޮރެންސިކް ޔުނިވާސިޓީ އާއިއެކުއެވެ. އެކަން ކުރަމުންދަނީ ސަލާމަތީ އަދި ތަންފީޒީ ބާރުތަކަށް ނަގާ މުވައްޒަފުންގެ ތެރޭގައިކަމަށް ބުނެފައިވާއިރު، މި މަސައްކަތްތަކަކީ ވަޒީފާއަށް ނަގާ މީހެއްގެ ކިބައިގައި ހުރި ސިފަތަކާއި އޭނާ ނިކަމެތިވެ ރިޝްވަތެއްގައި ޖެހިދާނެ ފަދަ ހާލަތްތަކަކީ ކޮބައިކަންވެސް ދެނެގަތުމަށް ކުރެވެމުންދާ މަސައްކަތްތަކެއްކަމަށެވެ.
އެންފްއެސްޔޫގެ މައުލޫމާތުތައް ނޫސްތަކާއި ހިއްސާކުރި ފަރާތަކުން ބުނެފައިވާގޮތުން، ރާއްޖޭގެ ސަރުކާރުން ބޭނުންވަނީ ސަލާމަތީ ބާރުތަކުގެ އެންމެ މަތީ ފަޑީގައި ތިބި 187 ސެކިއުރިޓީ އޮފިޝަލެއްގެ ސައިކޮލޮޖިކަލް ޕްރޮފައިލިންގް ހެދުމަށް ކަމަށް އެ ނޫހުގައި ބުނެފައިވެއެވެ. އަދި އެ މަގުސަދު ހާސިލު ކުރުމަށް އެންއެފްއެސްޔޫ އާއިއެކު އެއްބަސްވުންތަކެއް ގާއިމުކޮށްފައިވާއިރު، އެ އެއްބަސްވުުގެ ދަށުން އެންމެހާ އެފަދަ މަގާމުތަކުގައި ތިބޭ ފަރާތްތަކުގެ ޕްރޮފައިލެއް ހެދުމުގެ މަސައްކަތްތައް ކުރުމަށް ކަނޑައެޅިފައިވާކަމަށް ވެސް ވެއެވެ.
