މެޗެއް ނުކުޅެ ގައުމީ ޓީމުން ޖަޕާން ކޭމްޕް ނިންމާލައިފި

ސާފް ޗެމްޕިއަންޝިޕަށް ތައްޔާރުވަމުން އަންނަ ރާއްޖޭގެ ގައުމީ ޓީމު ޖަޕާނުގައި ފެށި ޓްރޭނިން ކޭމްޕް މެޗެއް ނުކުޅެ އިއްޔެ ނިންމާލައިފި އެވެ.

މި މަހުގެ 6 ވަނަ ދުވަހު ޖަޕާނަށް ދިޔަ ޓީމު ދެން ދާނީ ސްރީލަންކާ މަގުން އިންޑިޔާގެ ބެންގަލޫރަށެވެ. ސާފް ޗެމްޕިއަންޝިޕް ފަށާނީ އަންނަ ބުދަ ދުވަހު އެވެ.

ރާއްޖެއިން މިދިޔަ މަހު ދިވެހި ޕްރެމިއާ ލީގު މެދުކަނޑާލައި، ސާފް ޗެމްޕިއަންޝިޕަށް ފަރިތަކުރަން ފެށި ނަމަވެސް މިހާތަނަށް އެކުވެރިކަމުގެ މެޗެއް ނުކުޅެ އެވެ. ކުޅުނު ހަމައެކަނި މެޗަކީ ރާއްޖޭގެ ޕެލޭ ސްޓޭޑިއަމް ހުޅުވަން އދ. މަހިބަދޫން ހޮވާލެވުނު ޓީމަކާ ދެކޮޅަށް ކުޅުނު މެޗު އެކަންޏެވެ.

ގައުމީ ޓީމު މެޗެއް ނުކުޅެ މުބާރާތަށް ދަތުރުކުރަން ފެށިއިރު ކުރިއަށް އޮތް މިއޮތް ހަ ދުވަހުގެ ތެރޭގައި އެއްވެސް މެޗެއް ކުޅޭނެ ކަމުގެ ޔަގީންކަމެއް ވެސް ނެތެވެ. ނަމަވެސް ވާދަވެރި އެހެން ގައުމުތަކުން ދަނީ މުބާރާތަށް ތައްޔާރުވުމަށް ވަރުގަދަ މެޗުތަކެއް ކުޅެމުންނެވެ.

ސާފް ޗެމްޕިއަންޝިޕަށް ގައުމީ ޓީމު ތައްޔާރުވާން ފެށި ނަމަވެސް ޓީމާ ބެހޭ އެކަށީގެންވާ މައުލޫމާތެއް މިހާތަނަށް އެފްއޭއެމުން ދީފައިނުވެ އެވެ.

ޖޫން 21ން ޖުލައި 4ށް ބާއްވާ މުބާރާތުގައި ރާއްޖެ ހިމެނެނީ ލެބަނަން އާއި ބަނގްލަދޭޝް އަދި ބޫޓާންއާއެކު ގްރޫޕް ބީގަ އެވެ. އޭ ގްރޫޕުގައި ހިމެނެނީ އިންޑިޔާ އާއި ކުވޭތާއި ނޭޕާލް އަދި ޕާކިސްތާނެވެ.