ރިޔާސީ އިންތިޚާބުގެ ދެވަނަ ބުރަށް 18 އަހަރު ވާ މީހުންނަށް ވެސް ވޯޓު ލެވޭނެކަމަށް ރިޔާސީ އިންތިޚާބުގެ ގަވާއިދުގައި ބުނެފިއެވެ.

ހޮނިހިރު ދުވަހު އާއްމުކޮށްފައިވާ މި ގަވާއިދުގައި ބުނެފައިވަނީ ރިޔާސީ އިންތިޚާބުގެ ދެވަނަ ބުރުގައި ވޯޓުލުމަށް ރަޖިސްޓަރީކުރަން ޖެހޭނ،ީ ފުރަތަމަ ބުރުގައި ވޯޓުލުމަށް ހަމަޖެހިފައިވާ ފޮށި ނޫން އެހެން ފޮށްޓަކަށް ވޯޓުލާން ބޭނުންވާ މީހުން ކަމަށެވެ. އަދި 18 އަހަރު ފުރިގެން އަލަށް ވޯޓުލާ މީހުންގެ ތެރެއިން ރަށްވެހިވެފައިވާ ރަށް ނޫން އެހެން ރަށެއްގައި ވޯޓުލުމަށް ބޭނުންވާ މީހުން ވެސް ރަޖިސްޓްރީވާން ޖެހޭ ކަމަށް ބުނެފައިވެއެވެ.

އެގޮތަށް ރަޖިސްޓަރީކުރާނީ އިލެކްޝަންސް ކޮމިޝަނުން އާންމުކޮށް އިއުލާނުކުރާ ގޮތެއްގެ މަތީންނެވެ.

އެހެން ތަނެއްގައި ދިރިއުޅޭ މީހުން ވޯޓުދިނުމަށް ރީރަޖިސްޓަރީކުރަންޖެހޭކަން ފާހަގަކޮށް ގަވާއިދުގައި ބުނެފައިވަނީ ރަށްވެހިވެފައިވާ ރަށް ނޫން އެހެން ރަށެއްގައި ނުވަތަ ތަނެއްގައި ތިބޭ މީހުން ވޯޓުލުމަށް ރަޖިސްޓަރީވާން ބޭނުންނަމަ އެކަމަށް ކޮމިޝަނުން އާންމުކޮށް އިއުލާނުކޮށް އަންގާ ގޮތެއްގެ މަތީން އެ މީހެއްގެ މައުލޫމާތު ކޮމިޝަނަށް ނުވަތަ ކޮމިޝަނުން ކަނޑައަޅާ ތަނަކަށް ކަނޑައަޅައިފައިވާ މުއްދަތުގައި "ރަށްވެހިވެފައިވާ ތަން ނޫން އެހެން ތަނެއްގައި ވޯޓުލުމަށް ޓަކައި ރަޖިސްޓަރީވުމަށް އެދޭ ފޯމު" އިން ނުވަތަ ކޮމިޝަނުން ކަނޑައަޅާ ނިޒާމުގެ ތެރެއިން ހުށަހަޅަންޖެހޭ ކަމަށެވެ.

އެގޮތުން އީމެއިލުން ސީދާ އިލެކްޝަންސް ކޮމިޝަނަށް ނުވަތަ ކޮމިޝަނުން ފޯމު ބަލައިގަތުމަށް ކަނޑައަޅައިފައިވާ ފަރާތްތަކަށް ނުވަތަ އިދާރާއަކަށް ފޮނުވާ ފޯމުގެ ސައްހަކަން ކަށަވަރުކުރަން ދަތިވާނެތީ އެފަދަ ވަސީލަތްތައް މެދުވެރިކޮށް ފޮނުވާ ފޯމު ބަލައެއް ނުގަނެވޭނެ ކަމަށް ވެސް ބުނެފައިވެއެވެ.

މީގެ އިތުރުން ގަވާއިދުގައި ބުނެފައިވަނީ ދައުލަތުގެ ބެލުމުގެ ދަށުން ބަންދުކޮށްފައިވާ މީހުން ރީރަޖިސްޓަރީ ކުރުމަކީ އެ ބަޔަކު ބަލަހައްޓާ މުއައްސަސާއެއްގެ ޒިންމާއެއް ކަމަށެވެ. އަދި ރ-ީރަޖިސްޓަރީވުމަށް އެދިފައިވާ ފަރާތުގެ މައުލޫމާތުގެ ސައްހަކަން ކަށަވަރުކުރުމަށް އެ ފަރާތުގެ މަންމަގެ ނަމާއ،ި ދިވެހި ރައްޔިތެއްކަން އަންގައިދޭ ކާޑު ނަންބަރު ހޯދުމަށް ނޭޝަނަލް ރަޖިސްޓްރޭޝަނާ ގުޅޭ ކަންކަން ބެލެހެއްޓުމުގެ މަސްއޫލިއްޔަތު ހަވާލުވެފައިވާ ދައުލަތުގެ އިދާރާގައި އެދިއްޖެ ހާލަތެއްގައ،ި އެ މައުލޫމާތު އިލެކްޝަންސް ކޮމިޝަނަށް ފޯރުކޮށްދޭންޖެހޭ ކަމަށް ބަޔާންކޮށްފައިވެއެވެ.