ދައުލަތަށް ގިނަ ދުވަހު ޚިދުމަތްކުރެއްވި ޢަބްދުﷲ ޖަމީލް ރަސްމީ އިއްޒަތުގައި ފަސްދާނުލައިފި
ޖޫން 12 ވާ ހޯމަ ދުވަހުގެ މެންދުރު ފަހު 1:00 އިން ފެށިގެން ޖޫން 15 ވާ ބުރާސްފަތި ދުވަހުގެ މެންދުރު ފަހު، 1:00 އާއި ހަމައަށް ތިންދުވަސް ވަންދެން ދިވެހި ޤައުމީ ދިދަ ބައިދަނޑިއަށް ތިރިކުރެވޭނެ
ދައުލަތަށް ގިނަ ދުވަހު ޚިދުމަތްކުރެއްވި ޢަބްދުﷲ ޖަމީލް ގެ ޖަނާޒާގައި ރައީސް އާއި ނާއިބް ރައީސް ބައިވެރިވެ ވަޑައިގަންނަވަނީ
ނިޝާން ޢިއްޒުއްދީނުގެ ޢިއްޒަތުގެ ވެރިކަމުގެ ލަޤަބް އަރުވައިފައިވާ، ޢަބްދުﷲ ޖަމީލް ރަސްމީ އިއްޒަތުގައި ފަސްދާނުލައިފިއެވެ.
އެމަނިކުފާނު އަވަހާރަވީ އާދިއްތަ ދުވަހުގެ ހެނދުނުގެ ވަގުތެއްގައި މާފަންނު ދޫރެސްގައެވެ. އަވަހާރަވިއިރު ޢުމުރުފުޅުން 87 އަހަރެވެ.
އެމަނިކުފާނުގެ މޫނުފުޅު ދެއްކުން އޮތީ އިސްލާމީ މަރުކަޒުގައެވެ. އަދި ކަށުނަމާދު ބާާއްވާފައި ވަނީ މިއަދުގެ ޢަޞްރު ނަމާދަށްފަހު އިސްލާމީ މަރުކަޒުގައެވެ. އެމަނިކުފާނުގެ ކަށުނަމާދުގައި ރައީސް އިބްރާހިމް މުހައްމަދު ޞާލިހު އާއި ނައިބު ރައީސް ފައިސަލް ނަސީމްގެ އިތުރުން ދައުލަތުގެ އިސް މަޤާމްތައް ފުރުއްވާފައިވާ ބޭފުޅުންނާއި، ރައްޔިތުންގެ މަޖިލީހުގެ އެކި ދައުރުތަކުގައި މެމްބަރުކަން ކުރައްވާފައިވާ ބޭފުޅުން ބައިވެރިވެވަޑައިގެންނެވިއެވެ.
މަރްހޫލް އަބްދުﷲ ޖަމީލް ދެމިއޮތުމުގެ ޢާލަމަށް ދަތުރުކުރެއްވުމުގެ ހިތާމައިގައި، ތިން ދުވަސް ވަންދެން ދިވެހި ދިދަ ބައިދަނޑިއަށް ތިރިކުރުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަނީ ނިންމަވާފައެވެ. އެގޮތުން ޖޫން 12 ވާ ހޯމަ ދުވަހުގެ މެންދުރު ފަހު 1:00 އިން ފެށިގެން ޖޫން 15 ވާ ބުރާސްފަތި ދުވަހުގެ މެންދުރު ފަހު، 1:00 އާއި ހަމައަށް ތިންދުވަސް ވަންދެން ދިވެހި ޤައުމީ ދިދަ ބައިދަނޑިއަށް ތިރިކުރުމަށް ވަނީ ހަމަޖައްސަވާފައެވެ.
އެމަނިކުފާނު ފުރުއްވާފައިވާ މަޤާމްތަކުގެ ތެރޭގައި ކުރީގެ ރައީސް މައުމޫން އަބްދުލް ޤައްޔޫމްގެ ޒައާމަތުގައި ރައީސުލްޖުމްހޫރިއްޔާގެ އެގްޒެކެޓިވް ސެކެޓްރީގެ މަޤާމާއި މިނިސްޓަރ އޮފް ސްޓޭޓް ފޯ ޕްރެޒިޓެންޝަލް އެފެއާޒްގެ މަޤާމާއި މިނިސްޓަރ އޮފް ހެލްތުގެ މަޤާމާއި މިނިސްޓަރ އޮފް ފިޝަރީޒް އެންޑް އެގްރިކަލްޗަރގެ މަޤާމާއި މިނިސްޓަރ އޮފް އެޓޯލްސް އެޑްމިނިސްޓްރޭޝަންގެ މަޤާމާއި މިނިސްޓަރ ހޯމް އެފެއާޒް އެންޑް ހައުސިންގެ މަޤާމާއި މިނިސްޓަރ އޮފް ހޯމް އެފެއާޒްގެ މަޤާމުގެ އިތުރުން ޓުއަރިޒަމް މިނިސްޓަރުގެ މަޤާމް އަދާކުރައްވާފައިވެއެވެ.
މީގެ އިތުރުން ކުރީގެ ރައީސް އިބްރާހީމް ނާސިރުގެ ދައުރުގައި ޕަބްލިކް ހެލްތު ޑިވިޝަން އާއި ދައުލަތުގެ އެހެން އިދާރާތަކުގައި ވެސް އަބްދުﷲ ޖަމީލް ޚިދުމަތްކުރައްވާފައިވެއެވެ. އަބްދުﷲ ޖަމީލަކީ، ރައްޔިތުންގެ މަޖިލީހުގައިވެސް ތިރީސް އަހަރު ޚިދުމަތް ކުރައްވާ ވަރަށް މުހިންމު ދައުރެއް އަދާކުރައްވައިފައިވާ ބޭފުޅެކެވެ.
ޢަބްދުﷲ ޖަމީލަށް ވަނީ މިނިވަން 25ގެ ޢާންމު ޚިދުމަތުގެ އިނާމު ވެސް ލިބިވަޑައިގެންފައެވެ. އަދި އެ މަނިކުފާނަށް ނިޝާން ޢިއްޒުއްދީނުގެ ޢިއްޒަތުގެ ވެރިކަމުގެ ލަޤަބް އަރުވައިފައި ވަނީ 10 ނޮވެންބަރު 2008 ގައެވެ.
