ރައްޔިތުންގެ މަޖިލީހުގެ ނާއިބުރައީސް އީވާ އަބްދުﷲގެ އިތުބާރު ނެތްކަމުގެ މައްސަލަ ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާއަށް އެޖެންޑާކުރުމަށް ރައްޔިތުންގެ މަޖިލީހުގެ ގަވާއިދުން ލާޒިމްކުރާކަމަށް އެމްޑީޕީ ޕީޖީ ގްރޫޕުގެ ލީޑަރު މުހައްމަދު އަސްލަމް ވިދާޅުވެއްޖެއެވެ.
އީވާގެ އިތުބާރު ނެތްކަމުގެ މައްސަލަ އެޖެންޑާނުކޮށް އެހެން މައްސަލަ އެއް އެޖެންޑާ ނުކުރެވޭނެ ކަން ފާހަގަކުރައްވައި އަސްލަމް ވަނީ ރައްޔިތުންގެ މަޖިލީހުގެ އަމީން އާއްމު ފާތިމަތު ނިޔުޝާއަށް ސިޓީފުޅެއް ފޮނުއްވާފައެވެ. އެ އެ ސިޓީފުޅަށް އަމީން އާއްމު ވަނީ ހޮނިހިރު ދުވަހު ޖަވާބުދެއްވާފައެވެ.
އަމީން އާއްމުގެ ޖަވާބާއި ގުޅިގެން އަސްލަމް ވަނީ އާދިއްތަ ދުވަހު އަނެއްކާވެސް އަމީން އާއްމަށް ސިޓީފުޅެއް ފޮނުއްވާފައެވެ. މި ސިޓީފުޅުގައި ވަނީ ރައްޔިތުންގެ މަޖިލީހުގެ ގަވާއިދުގެ 205 ވަނަ މާއްދާގެ (ނ) ގައި ރައްޔިތުންގެ މަޖިލީހުގެ ރައީސް އަދި ނާއިބު ރައީސްގެ އިތުބާރު ނެތްކަމުގެ ގަރާރެއް މަޖިލީހަށް ލިބުމުން، އެ ގަރާރުގެ ލިޔުންލިބޭތާ މަދުވެގެން 3 ދުވަހުގެ ތެރޭގައ،ި އެ ގަރާރުގެ ނޯޓިސް އަމީން ޢާންމު މެންބަރުންނަށާއި މަޖިލީހުގެ ރައީސަށް ނުވަތަ ނާއިބު ރައީސަށް ދިނުމަށްފަހު އެ ނޯޓިހުގެ ތާރީހުން ފެށިގެން 14 ދުވަހުގެ މުއްދަތު ދިނުމަށްފަހު އެއްމެ އަވަހަށް އަންނަ ރަސްމީ ބަންދުނޫން ދުވަހަކު ބާއްވާ ޖަލްސާއަށް އެ ގަރާރު ހުށަހަޅަންވާނެ ކަމަށް ކަނޑައެޅިގެން ބަޔާންކޮށްފައިވާ ކަމަށެވެ.
އެހެންކަމުން، 12 ޖޫން 2023 ވާ ހޯމަ ދުވަހު އޮންނަ ޖަލްސާއަށް ރައްޔިތުންގެ މަޖިލީހުގެ ނާއިބު ރައީސްގެ އިތުބާރު ނެތްކަމުގެ މައްސަލަ އެޖެންޑާކުރުން ގަވާއިދު ލާޒިމުކުރާކަމުގައި އަސްލަމް ވިދާޅުވިއެވެ. އަދި ރައްޔިތުންގެ މަޖިލީހުގެ ގަވާއިދުގައި އެ މައްސަލަ އެޖެންޑާކުރުން އިސްތިސްނާކުރެވޭ އެއްވެސް ހާލަތެއް ބަޔާކޮށްފައިނުވާތ،ީ ގަވާއިދުގައި ބަޔާންކޮށްފައިވާ މުއްދަތުގައި ރައްޔިތުންގެ މަޖިލީހުގެ ނާއިބުރައީސްގެ އިތުބާރު ނެތްކަމުގެ މައްސަލަ އެޖެންޑާކޮށްދެއްވުމަށް އަސްލަމްގެ ސިޓީފުޅުގައި ވަނީ އެދިވަޑައިގެންފައެވެ.
މީގެ އިތުރުން ކޮމިޓީތަކަށް ގެންނަ ބަދަލުތައް ފާސްކުރަން ވޯޓަށް އެހުން މަޑުޖައްސާލީ އެދިވަޑަައިގެންފައިވާތީ ކަމަށް މަޖިލީހުގެ އަމީން އާންމު ފާތުމަތު ނިޔުޝާ ވިދާޅުވުމާއި ގުޅިގެން އަސްލަމް ވިދާޅުވީ އެ ނިންމުން ނިންމެވީ އެމްޑީޕީގެ 64 އިންސައްތަ މެޖޯރިޓީ މަޖިލީހުގައި އޮވެމެ، މަޖިލީހުގެ ކޮމިޓީތަކުގެ މެޖޯރިޓީ އެމްޑީޕީއަށް ގެއްލޭގޮތަށް އޮތުމުން ކަމަށެވެ. އެހެންނަމަވެސް އެއީ މަޖިލީހުގެ ކޮމިޓީތައް ހުއްޓުވާލަން ބޭނުންކުރައްވާ އުޒުރުކަމަށް އަމީންއާންމުގެ ސިޓީފުޅުގައި ފާހަގަކުރައްވާތީ ހިތާމަކުރައްވާކަމަށް އަސްލަމް ވިދާޅުވިއެވެ. 23 މެއި 2023 ވަނަ ދުވަހަށް ފަހު ދިގު މުއްދަތެއް ފާއިތުވެގެން ދިޔައިރު، މަޖިލީހުގެ ގަވާއިދާ އެއްގޮތަށް މަޖިލީހުގެ ރައީސް ކޮމިޓީތަށް ތަރުތީބުކުރުމުގެ މަސައްކަތް ކުރިއަށް ގެންގޮސްފައިނުވާކަން ވެސް އަސްލަމް ވަނީ ފާހަގަކުރައްވާފައެވެ.
އަސްލަމް ވިދާޅުވީ ރައްޔިތުންގެ މަޖިލީހުގެ އާންމު ކޮމިޓީގެ މަސައްކަތްތައް ކޮމިޓީގައި މިވަގުތު ތިއްބެވި މެންބަރުންނާއެކު ކުރިއަށް ގެންދަންޖެހޭނެ ކަމަށް ގަބޫލުކުރައްވާކަމަށެވެ. އަދި މަޖިލީހަށް ހުށަހަޅާފައިވާ ފޮރިން މިނިސްޓަރު އަބްދުﷲ ޝާހިދުގެ އިތުބާރު ނެތްކަމުގެ މައްސަލައާއި، ރައްޔިތުންގެ މަޖިލީހުގެ ނާއިބުރައީސް ގަލޮޅު އުތުރު ދާއިރާގެ މެންބަރު އީވާ އަބުދުاللهގެ އިތުބާރު ނެތްކަމުގެ ގަރާރަށް ބަހުސްކުރާނެ ވަގުތު ރައްޔިތުންގެ މަޖިލީހުގެ ގަވާއިދުގެ 108 ވަނަ މާއްދާ އާއި 207 ވަނަ މާއްދާގެ(ށ) ގައިވާގޮތުގެ މަތީން ކަނޑައަޅައި ދެއްވުމަށް އަސްލަމް ވަނީ އެދިވަޑައިގަންނަވާފައެވެ.
