ބާ އިމްތިޙާނަށް ރަޖިސްޓަރީވުމުގެ ފުރުސަތު ހުޅުވާލައިފި

2023 ވަނަ އަހަރުގެ ބާ އިމްތިހާނުގައި ބައިވެރިވުމަށް އެދޭ ފަރާތްތަކުން އެ އިމްތިހާނުގައި ރަޖިސްޓްރީވުމުގެ ފުރުސަތު ހުޅުވާލައިފިއެވެ.

ބާ އިމްތިހާނުގައި ބައިވެރިވުމުގެ ޝަރުތުތަކުގެ ތެރޭގައި ހިމެނެނީ ދިވެހި ރައްޔިތެއްކަމުގައި ވުމާއި ބާ ކައުންސިލުން ކަނޑައަޅައިފައިވާ ޝަރުޠުތައް ފުރިހަމަވާ، އަދި ބާ ކައުންސިލުން އެކްރެޑިޓްކޮށްފައިވާ ކިޔަވައިދޭ މަރުކަޒެއްގައި، ޤާނޫނީ ރޮނގުން ފުރަތަމަ ޑިގްރީ ހާސިލުކޮށްފައިވާ މީހަކު ކަމުގައިވުމެވެ. އަދި އިމްތިޙާނުގެ ރަޖިސްޓްރޭޝަނަށް ބޭނުންވާ އެންމެހާ ކަންކަން ފުރިހަމަކޮށްފައިވުމާއި ބާ އިމްތިހާނުގެ ފީ ދެއްކުމަކީ ވެސް ޝަރުތެކެވެ.

ބާ އިމްތިހާނުގެ ފީ އަކީ 6،500 ރުފިޔާއެވެ. ފީ ދެއްކުމުގެ އެންމެ ފަހު ތާރީޚަކީ 7 ސެޕްޓެމްބަރެވެ. އިމްތިހާނުގެ ބައިވެރިންނަށް ފީ ދެއްކުމުގައި ދިމާވެދާނެ ދަތިތަކަށް ބަލާ އިމްތިހާނުގެ ފީ ދެ އިންސްޓޯލްމަންޓަށް ބަހާލައިގެން ދެއްކޭނެއެވެ.

ބާ އިމްތިހާނު އޮންނާނީ 21 އޮކްޓޯބަރުގައެވެ. ބާ އިމްތިހާނުގައި ރަޖިސްޓްރީވުމުގެ އެންމެ ތާރީޚަކީ 15 ޖުލައިއެވެ.