ޕާކިސްތާން ޓީމު އިންޑިޔާ އަށް ދިއުމުގެ ހުއްދަދީފި
8 ޖޫން 2023 | ބުރާސްފަތި 07:15އެއް ގައުމު އަނެއް ގައުމަށް ދަތުރު ކުރެވެނީ ހާއްސަ ހުއްދައެއްގެ ދަށުން
ޕާކިސްތާން ޓީމުގެ ބައެއް ކުޅުންތެރިން: ސާފް ޗެމްޕިއަންޝިޕަށް އިންޑިޔާ އަށް ދާނެ
ސާފް ޗެމްޕިއަންޝިޕް ފުޓްބޯޅަ މުބާރާތަށް ޕާކިސްތާނުގެ ގައުމީ ޓީމު އިންޑިޔާ އަށް ދިއުމުގެ ހުއްދަ އިންޑިޔާއިން މިއަދު ދީފި އެވެ.
ސިޔާސީ އަދި ސަރަހއްދީ އަރައިރުންތަކާހުރެ ގުޅުން ގޯސްވެފައިވާ ދެ ގައުމަށް ދަތުރުކުރެވެނީ ހާއްސަ ހުއްދައެއްގެ ދަށުންނެވެ. މި ހުއްދަ ލިބިފައި ނެތުމުން ސާފް އެގްޒެކެޓިވް ކޮމިޓީގެ އެންމެ ފަހުގެ ބައްދަލުވުމުގައި ޕާކިސްތާން ބައިވެރިވީ ވެސް އޮންލައިންކޮށެވެ. މި ދެ ގައުމަކީ ފަހަރުގެ ސާފް ޗެމްޕިއަންޝިޕުގެ ފުރަތަމަ މެޗު ކުޅެންޖެހޭ ދެ ޓީމެވެ. ޖޫން 21 އިން ޖުލައި 4 އަށް އިންޑިޔާގެ ބެންގަލޫރުގައި ބާއްވާ މުބާރާތުގައި މި ދެޓީމާއެކު ގްރޫޕް އޭގައި ހިމެނެނީ ކުވޭތާއި ނޭޕާލެވެ. ރާއްޖެ އާއި ލެބަނަން އަދި ބަނގްލަދޭޝް އާއި ބޫޓާން ހިމެނެނީ ގްރޫޕް ބީގަ އެވެ.
އިންޑިޔާގެ ފޮރިން މިނިސްޓްރީން އެ ގައުމަށް ޕާކިސްތާން ކުޅުންތެރިން އެތެރެވުމުގެ ހުއްދަދިންކަން އަންގާފައިވަނީ ޕާކިސްތާނުގެ އެމްބަސީ އަށެވެ. އަދި ދެ ގައުމުގެ ފުޓްބޯޅަ ފެޑަރޭޝަނުން މިހާރު ވަނީ ދަތުރުކުރުމުގެ އެންމެހާ ލިޔެކިއުންތައް ބަދަލުކޮށްފަ އެވެ.
ޕާކިސްތާނާއި އިންޑިޔާގެ ގުޅުން ގޯސްވުމުގެ ސަބަބުން ދެ ގައުމުގެ ކްރިކެޓް ޓީމު އެއް ގައުމު އަނެއް ގައުމަކަށް ދަތުރެއް ނުކުރެ އެވެ. އަދި ދާދި ފަހުން ޕާކިސްތާނުގެ އެތްލެޓިކްސް ޓީމު އިންޑިޔާ އަށް ދާން އުޅުމުން އެކަމަށް ދެ ގައުމުން ވެސް ވަނީ ދެކޮޅު ހަދާފަ އެވެ.
ސާފް ޗެމްޕިއަންޝިޕަށް އިންޑިޔާ އަށް ޕާކިސްތާން ޓީމު އެތެރެވުމުގެ ހުއްދަ ލިބުނަސް ޕާކިސްތާނުން އެ ގައުމުގެ ކުޅުންތެރިންނަށް ދޭންޖެހޭ ހުއްދަތައް އަދި ނުލިބެ އެވެ.
