ރޮނާލްޑޯގެ ޓީމު ރެލިގޭޓްވެއްޖެ

ބްރެޒިލްގެ މަޝްހޫރު ފޯވަޑް ރޮނާލްޑޯ ހިންގާ ސްޕޭނުގެ ރެއާލް ވަޔަޑޮލިޑް ރެލިގޭޓްވެއްޖެއެވެ.

އެއް ސީޒަނަށްފަހު އެ ޓީމު ރެލިގޭޓްވީ ރޭ ނިމުނު ސްޕެނިޝް ލީގުގެ އެންމެ ފުލުން ތިންވަނަ ލިބުމުންނެވެ. ޖުމުލަ 20 ޓީމު ވާދަކުރި ލީގުގެ 18 ވަނައަށް ވަޔަޑޮލިޑް ސޮއްސައިލީ، ރޭ ކުޅުނު ފަހު މެޗުގައި ގެޓާފޭއާ ވާދަކޮށް 0-0ން އެއްވަރުވުމާއެކު، ޗެމްޕިއަންސް ބާސެލޯނާއަތުން ސެލްޓަވީގޯ 2-1ން މޮޅުވުމެވެ.

ސްޕެނިޝް ލީގުގެ ފަހު ހަފުތާގެ މެޗުތަކަށް ދިޔައިރު ރެލިގޭޝަނުން ސަލާމަތްވުމަށް ހަ ޓީމެއް މަސައްކަތްކުރިއެވެ. ރެލިގޭޓްވީ ވަޔަޑޮލިޑްއާއި އެސްޕަނިޔޯލް އަދި އެލްޗޭއެވެ. ފުލަށް ދިޔަ މި ތިން ޓީމުގެ ކުރިއަށް ޖެހިގެން ސަލާމަތްވީ 15 ވަނަ ލިބުނު ގެޓާފޭއާއި 16 ވަނަ ލިބުނު ވެލެންސިއާއާއި 17 ވަނާގައި އޮތް އަލްމީރިއާއެވެ.

ކުޅުނު 38 މެޗުން ވަޔަޑޮލިޑަށް ލިބުނީ 11 މެޗުން މޮޅުވެ، ހަތް މެޗު އެއްވަރުވެ، 20 މެޗުން ބަލިވެގެން، 18 ވަނައެވެ.

ވޯލްޑްކަޕް ދެ ފަހަރު ކާމިޔާބުކޮށްފައިވާ ރޮނާލްޑޯ މި ޓީމު ގަތީ 2018 ވަނަ އަހަރުއެވެ. އަދި މިހާރު ކުލަބުގެ 82 ޕަސެންޓް ހިއްސާވެސް އޮތީ އޭނާގެ އަތުގައެވެ.

އެ ކުލަބުން ރޭގެ މެޗަށްފަހު ނެރުނު ބަޔާނުގައި ބުނެފައިވަނީ މިއީ ވަރަށް ހިތްދަތި ނަތީޖާއެެއް ކަމަށެވެ.