ރާއްޖެ-ޗާގޯސް މައްސަލަ: ރައީސްގެ ސިޓީފުޅާއި އިޓްލޮސްގެ ނިންމުމާއި ގުޅުމެއް ނެތް، ހުކުމަށް ވާސިލްވުމުގައި ވެސް އެ ވާހަކައެއް ނެތް - ރިފްޢަތު
އޮގަސްޓް 2022ގައި މޮރިޝަސްގެ ބޮޑުވަޒީރަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ފޮނުއްވި
ބަންޑާރަ ނާއިބު އިބްރާހީމް ރިފްއަތު
އިންޓަރނޭޝަލް ޓްރައިބިއުނަލް ފޯރ ދަ ލޯ އޮފް ދަ ސީ (އިޓްލޮސް)އިން ރާއްޖެ އާއި ޗާގޯސްގެ އިގްތިޞާދީ ސަރަހައްދާއި މެދު ނިންމި ނިންމުމާއި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މޮރިޝަސްގެ ބޮޑުވަޒީރަށް ފޮނުއްވި ސިޓީފުޅާއި ގުޅުމެއް ނެތް ކަމަށް ބަންޑާރަ ނާއިބު އިބްރާޙީމް ރިފްޢަތު ވިދާޅުވެއްޖެއެވެ.
ރިފްޢަތު އެފަދައިން ވިދާޅުވީ ހޯމަ ދުވަހު މަޖިލީހުގެ ޖަލްސާގައި އެ މަނިކުފާނުގެ އިތުބާރު ނެތްކަމުގެ މައްސަލައިގައި ވާހަކަފުޅު ދައްކަވަމުންނެވެ. އެގޮތުން 22 އޮގަސްޓް 2022ގައި މޮރިޝަސްގެ ބޮޑުވަޒީރަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ފޮނުވި ސިޓީފުޅާއި ގުޅުވައިގެން ދައްކަނީ ހަގީގަތާއި ޚިލާފު ދޮގު ވާހަކަތައް ކަމަށް ރިފްޢަތު ވިދާޅުވިއެވެ. އެ ސިޓީގައި ދެކުނުގެ އީއީޒެޑާ މެދު ރާއްޖެއިން ދެކޭ ގޮތް ބަދަލުކޮށްފައިވާ ކަމަށް ބުނެ ދައްކަމުން ދަނީ ވެސް ދޮގު ވާހަކަތަކެއް ކަަމަށާއި އެ ސިޓީގައި އެފަދަ އެއްވެސް ވާހަކައެއް ނެތް ކަމަށް ރިފްޢަތު ވިދާޅުވިއެވެ. އަދި އިޓްލޮސްގެ 9 ފަނޑިޔާރުންގެ އިއްތިފާގުން ނިންމު ނިންމުމަށް ވާސިލްވި އެއްވެސް ކަމެއްގައި އެ ސިޓީ އަށް ރިއާޔަތްކުރައްވާފައި ނުވާ ކަަމަށް ވެސް ރިފްޢަތު ވިދާޅުވިއެވެ.
އަދި އެ މައްސަލައިގައި ކިތާބީ ހެކީގެ ތެރޭގައި ވެސް އެ ސިޓީ ނުހިމެނޭ ކަމަށް ރިފްޢަތު ވިދާޅުވިއެވެ. ދެކުނުގެ އީއީޒެޑްގެ މައްސަަލައިގައި ރާއްޖޭގެ ސްޓޭންޑް ބަދަލުނުކުރައްވާކަން ކަޅާއި ހުދުން އެ ސިޓީފުޅުގައި ބަޔާންކުރައްވާފައިވާ ކަމަށް ވެސް އޭނާ ވިދާޅުވިއެވެ.
ރިފްޢަތު އެފަދައިން ވިދާޅުވެފައިވާއިރު ރައީސްގެ އެ ސިޓީފުޅުގެ ސަބަބުން ރާއްޖޭގެ އިގްތިޞާދުން ބައެއް ގެއްލިފައިވާ ކަމަށް ބުނެ އިދިކޮޅު ފަރާތްތަކުން ގެންދަނީ އެ ސިޓީ ހާމަކުރުމަށް ގޮވާލަމުންނެވެ. މީގެ އިތުރުން އެ ސިޓީ އަކީ އިޓްލޮސްގެ ނިންމުމުގައި ރިޢާޔަތްކުރައްވާފައިވާ ކަމެއް ކަމަށް ކުރީގެ ބަންޑާނައިބު އާޒިމާ ޝަކޫރު ވަނީ މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފައެވެ.
ރާއްޖެއާއި މޮރިޝަސްގެ ކަނޑުގެ ސަރަހައްދުން ފުށުއަރާ ސަރަހައްދުގެ އިން ވަކިކުރުމުގެ މައްސަލާގައި އިޓްލޮސްއިން ގޮތް ނިންމަވާފައިވަނީ ރާއްޖޭން ފާހަގަކުރި ނުކުތާތަކަށް ތާއީދުކޮށް، ރާއްޖެއަށް ފައިދާވާގޮތަށެވެ. އަދި މި ނިންމުމާ ގުޅިގެން، ފުށުއަރާ ސަރަހައްދުން ރާއްޖެއަށް 47232 އަކަކިލޯމީޓަރުގެ ސަރަހައްދެއް ވަނީ ލިބިފައެވެ.
