އަތޮޅުތަކަށް ދިރުން އައީ އިޚްލާސްތެރިކަމާއެކު، ރައްޔިތުންގެ އިހުސާސްތައް ދަންނަ ވެރިއަކު ހުރުމުން: ނިޒާރު
ފަތުރުވެރިކަން ތަރައްގީކުރުމަށް އައްޑޫ ސިޓީން ފަސް ރަށެއް ހިއްކަނީ
އަލީ ނިޒާރު
ރާއްޖޭގެ އަތޮޅުތަކަށް ދިރުން އައީ އިޚްލާސްތެރިކަމާއެކު، ރައްޔިތުންގެ އިހްސާސްތައް ދަންނަ ވެރިއަކު ހުރުމުން ކަމަށް އައްޑޫ ސިޓީގެ މޭޔަރ އަލީ ނިޒާރު ވިދާޅުވެއްޖެއެވެ.
ގަން އިންޓަރނޭޝަނަލް އެއަރޕޯޓް ތަރައްގީކުރުމުގެ މަޝްރޫއުގެ މަސައްކަތް އިފްތިތާހުކުރުމުގެ ގޮތުން ބޭއްވި ރަސްމިއްޔާތުގައި ވާހަކަފުޅުދައްކަވަމުން ނިޒާރު ވިދާޅުވީ މަޝްރޫއުތަކުގައި ކުލަ ނުޖެހި، މިހާ ދުވަސްވީ އެއްވެސް ޕްލޭނެއް ނެތުމުން ކަމަށާއި، ނަމަވެސް މިހާރު ފެނިގެން މިދަނީ ފުރިހަމަ ޕްލޭންތަކަކާއެކު ރާއްޖޭގެ އެއްރަށަށްފަހު އަނެއް ރަށް ތަރައްގީވެގެންދާ މަންޒަރު ކަމަށެވެ.
މިޕްލޭންތަކުގައި ކުލަޖެހެމުންދާ ވަރަކަށް ރާއްޖޭގެ އަތޮޅުތަކަށް ދިރުން އަންނަމުންދާ މަންޒަރު މިއަދު ފެންނަމުންދާކަން ފާހަގަކުރައްވަމުން، މިއީ އިޚްލާސްތެރިކަމާއެކު، ރައްޔިތުންގެ އިހްސާސްތައް ދަންނަ ވެރިޔަކު ކަންކަން ކުރަން ނިންމުމުން އަންނަ ހެޔޮ ބަދަލުތަކުގެ ނަތީޖާކަމަށް ނިޒާރު ވިދާޅުވިއެވެ. އައްޑޫ ސިޓީއަށް މިއަންނަ ތަރައްގީއަކީ އިގްތިސާދެއް ބިނާކުރުމަށްޓަކައި ހުރިހާ އަސާސީ ވަސީލަތްތަކާއެކު، ފެށިގެން ކުރިއަށްގެންދާ މަޝްރޫއުތަކެއްކަންވެސް އޭނާ ފާހަގަކުރެއްވިއެވެ.
6 ބިލިއަން ރުފިޔާއަށްވުރެ ބޮޑެތި މަޝްރޫއުތައް މިސަރުކާރުން އައްޑޫ ސިޓީގައި ކުރިއަށް ގެންދާކަމަށް ވިދާޅުވަމުން ނިޒާރު ވަނީ، ރައީސް އިބްރާހީމް މުހައްމަދު ސޯލިހަކީ އައްޑޫ ސިޓީގެ ރައްޔިތުންނަށް ލިބުނު ނަސީބެއް ކަމަށް ވިދާޅުވެފައެވެ.
އަދި ރައީސް ޔާމީންގެ ވެރިކަމަށް ފާޑު ވިދާޅުވެ، އެއިރު ހިންގާފައިވާ ބައެއް ކަންކަން ފާހަގަކުރައްވަމުން، މިސަރުކާރުން ގެންނަމުންދާ ތަރައްގީގެ ކުރިއެރުންތަކާ ހުރި ތަފާތުތައް ވިދާޅުވެދެއްވިއެވެ.
މި އެއަރޕޯޓް ތަރައްގީކުރަނީ އަހަރަކު 1.5 މިިލިއަން މީހުންނަށް ޚިދުމަތްދެވޭ ގޮތަށެވެ. އެގޮތުން ޒަމާނީ ފެންވަރަށް ޓަރމިނަލް ތަރައްގީކޮށް، ޑިއުޓީ ފްރީ ފިހާރަތަކާއި ރެސްޓޯރެންޓުތަކާއި ލައުންޖުތަކުގެ އިތުރުން، އައު ކޮންޓްރޯލް ޓަވަރަކާއި ފަޔަރ ސްޓޭޝަނެއް ގާއިމުކުރަން ވަނީ ހަމަޖެހިފައެވެ. މީގެ އިތުރުންވެސް އިތުރު ގިނަ ޚިދުމަތްތައް ތަރައްގީކުރުމަށް ވަނީ ނިންމާފައެވެ.
ގަން އެއާޕޯޓުގެ ތަރައްގީގެ މަޝްރޫއަކީ ދެކުނުގެ އިގްތިސާދުގެ މައި ހަބެއްގެ ގޮތުގައި ރައީސް ސޯލިހުގެ ސަރުކާރުން ކުރިއަށްގެންދާ މުހިންމު މަސައްކަތެކެވެ. މި މަޝްރޫއުގެ މަސައްކަތް ނިންމަން ހަމަޖެހިފައިވަނީ 2025 ވަނަ އަހަރުއެވެ.
