ރ ފުއްގިރި ޚިޔާނާތުގެ މައްސަލައިގައި ދައުވާ އުފުލާފައިވާ ފަރާތްތަކުގެ ޝަރީއަތުގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.

މި އަޑުއެހުމުގައި ދައުލަތުގެ ވަކީލު ވިދާޅުވީ، ޕެންޑޯރާ ޕޭޕާސް އާންމު ވުމާއި ގުޅިގެން ފުލުހުން ހިންގި ތަހުގީގުތަކަށްފަހު ލިބުނު އިތުރު ހެކިތައް އައު ހެކީގެ ގޮތުގައި ދައުލަތުން ހުށައަޅާފައިވާނެ ކަމަށެވެ.

އެ ލިއުންތަކުގެ ސައްޙަކަމާމެދު (ލީގާލިޓީއާމެދު) ސުވާލު އުފައްދަން ޖެހޭ ތަނެއް ނެތްކަމަށް ދައުލަތުގެ ވަކީލު ވިދާޅުވިއެވެ.

ދައުލަތުގެ ވަކީލު ވިދާޅުވީ، ޕެންޑޯރާ ޕެޕާސް ޕަބްލިޝް ކޮށްފައިވަނީ 2021 ވަނަ އަހަރުގެ އޮކްޓޯބަރު މަހު ކަމަށެވެ. އޭރު 11.9 މިލިއަން ލިއެކިއުން އާންމު ކުރިކަން ފާހަގަ ކުރައްވައި ދައުލަތުގެ ވަކީލު ވިދާޅުވީ، އެއީ އެތައް ޤައުމެއްގެ މައުލޫމާތު ކަމަށެވެ.

މި މައްސަލައާ ގުޅޭ ލިއުންތަކަކީވެސް އޭގެ ތެރެއިން ބައެއް ކަމަށާއި، އެއީ ތަހުގީގު މަރުޙަލާ ކުރިއަށް ދިޔައިރު އެނގެން އޮތް މައުލޫމާތެއް ނޫންކަމަށް ދައުލަތުގެ ވަކީލު ވިދާޅުވިއެވެ.

ތަހުގީގުގެ ތެރެއިން އާ ލިއެކިއުންތައް ފެންމަތިވީ އެއަށްފަހުކަމަށް ދައުލަތުގެ ވަކީލު ވިދާޅުވިއެވެ.

ޕެންޑޯރާ ޕޭޕާރސްގައި ބުނެފައިވަނީ، ފުއްގިރި ކުއްޔަށް ދިން މައްސަލައިގައި ޔާމީންގެ 1.1 މިލިއަން ޑޮލަރު ރިޝްވަތުގެ ގޮތުގައި ނަންގަވާފައިވާ ކަމަށެވެ. އަދި ރިޝްވަތުގެ ގޮތުގައި ފައިސާ ދީފައިވަނީ ބްރިޓިޝް ވަރޖިން އައިލެންޑް ކުންފުންޏެއް ކަމަށްވާ އޭ އެންޑް އޭ ހޯލްޑިންގސް ގްރޫޕް ލިމިޓެޑުން ކަމަށެވެ. އަދި އެފައިސާ ރައީސް ޔާމީނަށް ލިބިވަޑައިގަތީ ރައީސް ޔާމީންގެ ވެރިކަމުގައި، އެމަނިކުފާނުގެ އަރިސް ބޭފުޅެއް މެދުވެރިކޮށް ކަމަށެވެ.

ޕެންޑޯރާގައި ބުނެފައިވަނީ ފުއްގިރި ދޫކޮށްފައިވަނީ ޓެންޑަރ ކުރުމެއް ނެތި، ސެޕްޓެމްބަރ 2015ގައި 1.55 މިލިއަން ޑޮލަރަށް ކަމަށެވެ. އަދި ދީފައިވަނީ ދުބާއީގައި ގާއިމުވެފައިވާ ކްލާސިކް ސައިޓީ އައިލެންޑް ހޯލްޑިންގްސް ލިމިޓެޑް ކިޔާ ކުންފުންޏަކަށް ކަމަށެވެ. 

އެއަށްފަހު ވަނީ ޔާމީނުގެ ފަރާތުން ހުށައަޅާފައިވާ އިތުރު ހުށައެޅުންތަކަށް ދައުލަތުން ރައްދު ދީފައެވެ.

އޭގެ ތެރޭގައި ބައެއް ޝަފަހީ ހެކިން ބަލައިނުގަތުމަށް އެދި ހުށައަޅުއްވާފައިވާ ހުށައެޅުމެއް ހިމެނެއެވެ. އެގޮތުން އޭގެ ތެރޭގައި ހިމެނެނީ އަދީބާއި ޒިޔަތު ގެ އިތުރުން، ފިނިފެންމާ ލޯންޗު ގޮއްވާލި މައްސަލައިގައި ތުހުމަތުވި އަހުމަދު އާމިރު، އަދި ސިޔާސީ ގޮތުން އެއް ފަޅިއެއްގައި މަސައްކަތް ނުކުރާކަމަށް ބުނެ ހުށައަޅާފައިވާ އަހުމަދު ރިޔާޒު މުޙައްމަދާއި އަލީ މައުރޫފު ކިޔާ މީހެކެވެ.

ދައުލަތުގެ ވަކީލު ވިދާޅުވީ، ފިނިފެންމާ ލޯންޗު ގޮއްވާލި މައްސަލައިގެ ތަހުގީގާއި ޙުކުމް ގޯސްކަމަށް ދިވެހިރާއްޖޭގެ ހައިކޯޓުން ކަނޑައަޅާފައިވާ ކަމަށާއި، ވުމާއެކު، އެ މައްސަލައިގައި ކުށް ސާބިތުވީކަމަށް ނުބުނެވޭނެ ކަމަށެވެ.

އޭރު އަދީބު މަސައްކަތް ކުރެއްވީ ޔާމީނުގެ ބަދަލުގައި ވެރިކަމަށް އައުމަށްކަމަށް އޭރު މީހުން ދީފައިވާ ބަޔާންތަކުގައިވާ ކަމަށާއި، ނަމަވެސް މިހާރު ޔާމީނަކީ ރާއްޖޭގެ ރައީސްއަށް ނުވާއިރު، އެ ފަދަ އަދާވަތްތެރިކަމެއް އޮންނާނެ ފަރާތެއްކަމަށް ބެލެވޭނެ ސަބަބެއް ނޫންކަމަށް ދައުލަތުގެ ވަކީލު ވިދާޅުވިއެވެ.

އޭގެ އިތުރުން ދައުލަތުގެ ވަކީލު ވިދާޅުވީ، ނައިބްރައީސްކަމުން ވަކި ކުރެއްވި ނަމަވެސް ޑރ ޖަމީލު މިއަދު ހުންނެވީ ޔާމީނުގެ ދިފާއީ ވަކީލުގެ ގޮތުގައި ކަމަށާއި، ހަތުރުން މިތުރުންނަށްވެ، މިތުރުން ހަތުރުންނަށް ވުމަކީ ސިޔާސީ ގޮތުން އަބަދުވެސް ފެންނާނެ މަންޒަރުތައް ކަމަށެވެ.  

މި އަޑުއެހުމުގައި ޔާމީނު ވިދާޅުވީ، އެމަނިކުފާނަކީ އެމްއެމްޕީއާރްސީ މުޅި މައްސަލައިގެ ތުހުމަތު ކުރެވޭ ފަރާތެއް ނޫން ކަމަށާއި، އެމަނިކުފާނުގެ މައްޗަށް ތުހުމަތުކޮށް ދައުވާ އުފުލާފައިވަނީ ގއ ވޮޑަމުލާ، ވ އާރަށް އަދި ރ ފުއްގިރި ހިޔާނާތުގެ މައްސަލައިގައި ކަމަށެވެ.

ހުށައެޅުންތަކާމެދު ގާޒީ ވަނީ މި އަޑުއެހުމުގައި ގޮތް ނިންމަވާފައެވެ. އެގޮތުން ހެއްކާބެހޭ ޤާނޫނާ ޙަވާލާދީ ހުށައަޅާފައިވާ ހުށައެޅުންތައް ފިޔަވައި ދެން ހުރި ހުށައެޅުންތައް ޝަރީއަތަށް ބަލައިނުގަތުމަށް ގާޒީ ނިންމެވިއެވެ.

ބަލައިގަތުމަށް ނިންމެވީ ހެއްކާބެހޭ ޤާނޫނާ ޙަވާލާދީ ޔާމީނުގެ ފަރާތުން ހުށައަޅާފައިވާ 2 ހުށައެޅުމެކެވެ. ނަމަވެސް އެ ހުށައެޅުންތަކަށް އަލިއަޅުވާލައްވާނީ ޙުކުމް ކުރައްވާއިރުކަން ފާހަގަ ކުރައްވައި ގާޒީ ވަނީ ޔާމީނާއި ކްރިކް ރިޒާގެ ފަރާތުން ހުށައެޅުއްވި ހުށައެޅުންތައް ބަލައިގަނެ، މިވަގުތަށް ގޮތް ނިންމަންޖެހޭ ތަނެއް ނެތްކަމަށް ކަނޑައަޅުއްވާފައެވެ.