ގދ ޖުޑީޝަލް ދާއިރާގެ ކޯޓުތައް އެއް އުސޫލަކުން ހިންގުމަށް ހާއްސަ ތަމްރީންތަކެއް
3 ޖޫން 2023 | ހޮނިހިރު 14:11މި ޕްރޮގްރާމްގެ ދަށުން ޖުމްލަ 35 ބައިވެރިން ތަމްރީންކުރުމަށް ހަމަޖެހިފައިވޭ
ގދ. ތިނަދޫގައި ކުރިއަށްގެންދާ ތަމްރީނުތައް
ގދ ޖުޑީޝަލް ދާއިރާގެ ކޯޓުތައް އެއް އުސޫލަކުން ހިންގުމަށް ބޭނުންވާ ތަމްރީންތައް ދިނުމުގެ މަގުސަދުގައި، ދާއިރާގެ މެޖިސްޓްރޭޓުންނާއި މުވައްޒަފުންނަށް އަމާޒުކޮށްގެން ކުރިއަށްގެންދާ ތަމްރީނުތައް ފަށައިފިއެވެ.
ޖޫން މަހުގެ 3ން 8ށް ގދ ތިނަދޫގައި ކުރިއަށްގެންދާ ތަމްރީން ޕްރޮގްރާމް ފަށާފައިވަނީ ހޮނިހިރު ދުވަހުއެވެ.
ޖުޑީޝަރީން ބުނީ މި ޕްރޮގްރާމްގައި ގދ ޖުޑީޝަލް ދާއިރާގެ މެޖިސްޓްރޭޓުންނާއި ޗީފް އެޑްމިނިސްޓްރޭޓުންނާއި ލީގަލް އޮފިސަރުން، އަދި އިދާރީ މުވައްޒަފުން ހިމެނޭހެން ޖުމްލަ 35 ބައިވެރިން ތަމްރީންކުރުމަށް ހަމަޖެހިފައިވާކަމަށެވެ.
މި ޕްރޮގްރާމްގައި މަދަނީ އަދި ޖިނާއީ އިޖުރާއަތްތަކުގެ ގާނޫނާއި ގަވާއިދަށް އަހުލުވެރިކުރުމުގެ އިތުރުން، ޝަރީއަތްތަކާގުޅޭ މަސައްކަތްތަކާއި އިދާރީ މަސައްކަތްތައް ދާއިރާގެ ކޯޓުތަކުގެ މެދުގައި އެއްގޮތްކުރުމާ ގުޅޭގޮތުން މައުލޫމާތު ދިނުމަށް ވަނީ ހަމަޖެހިފައެވެ.
