އައްޑޫ ސިޓީގައި ކުރިއަށްދާ ބިޔަ މަޝްރޫއުތަކުން، މި ސިޓީ ސަރަހައްދީ އިގްތިސާދުގެ މައި ހަބަކަށް ބަދަލުވާނެ: ޝަރީފް
3 ޖޫން 2023 | ހޮނިހިރު 14:05އައްޑޫ ސިޓީގެ ބިން ހިއްކުމުގެ އަމަލީ މަސައްކަތް ރައީސުލްޖުމްހޫރިއްޔާ ވަނީ ފައްޓަވައިދެއްވާފައި
މަރަދޫ ދާއިރާގެ މެންބަރު އިބްރާހީމް ޝަރީފް
އައްޑޫ ސިޓީގައި ކުރިއަށްދާ ބިޔަ މަޝްރޫއުތަކުގެ ސަބަބުން، އެ ސިޓީއަކީ ސަރަހައްދީ އިގްތިސާދުގެ މައި ހަބަކަށް ބަދަލުވެގެންދާނެ ކަމަށް، މަރަދޫ ދާއިރާގެ މެމްބަރު އިބްރާހީމް ޝަރީފް ވިދާޅުވެއްޖެއެވެ.
އައްޑޫ ސިޓީގައި ކުރިއަށްދާ އެންމެ ބޮޑު މަޝްރޫއު ކަމަށްވާ ބިން ހިއްކުމުގެ މަޝްރޫއުގެ މަސައްކަތް އަމަލީ ގޮތުން ފައްޓަވައިދެއްވުމުގެ ގޮތުން ބޭއްވި ރަސްމިއްޔާތުގައި ވާހަކަފުޅުދައްކަވަމުން ޝަރީފް ވިދާޅުވީ، ރައްޔިތުން މިއަދުގެ ސަރުކާރު ބަލައިގެންފިކަމަށާއި މިއީ ކުޑަ ރަށެއް ބޮޑު ރަށެއް އަދި ވަކި ސިޓީއަކަށް ނުބަލައި ތަރައްގީގެ ގިނަ މަޝްރޫއުތައް ރައްޔިތުންނާ ހަމައަށް ގެނެސްދެމުން އަންނަ ސަރުކާރެއް ކަމަށެވެ. އެގޮތުން އައްޑޫގައި މި ފެށިގެންދިޔަ ބިން އިތުރުކުރުމުގެ މަޝްރޫއުގެ ސަބަބުން މި ސިޓީ، މިސަރަހައްދުގެ ތަރައްގީގެ ހަބަކަށް ވެގެންދާނީ ފަތުރުވެރިކަމަށް ތަރައްގީކުރާ ރަށްތަކާއެކު، 7000 އެނދު ތަރައްގީކުރެވިގެން ކަމަށެވެ.
އެގޮތުން ގަން އިންޓަރނޭޝަން އެއަރޕޯޓް ތަރައްގީކުރުމުގެ މަޝްރޫއުގެ އަމަލީ މަސައްކަތް މާދަމާ ފެށިގެންދާއިރު، މީގެ ސަބަބުން އެތަކެއް ފައިދާއެއް އެ ސިޓީގެ ރައްޔިތުންނަށް ލިބިގެންދާނެ ކަމަށެވެ.
އަދި އައްޑޫ ސިޓީގައި ހިއްކާ 194.3 ހެކްޓަރުގެ ބިމުގެ ހަގީގީ ފައިދާ ކުރާނީ، ފަތުރުވެރިކަމާއެކު އުފެދޭ ވަޒީފާތަކުގެ ސަބަބުން ކަމަށް ވާއިރު، ރައީސް އިބްރާހީމް މުހައްމަދު ސާލިހަށް އިތުރު ދައުރެއް ދިނުމަކީ އެ ސިޓީގެ ރައްޔިތުން މިއަދު ވިސްނަމުން ދާ ކަމެއް ކަމަށް ޝަރީފް ވިދާޅުވިއެވެ.
އައްޑޫ ސިޓީ މަރަދޫގައި އިތުރުކުރެވޭ ބިމުގައި 300 ރޯހައުސް ތަރައްގީކޮށްދެއްވުމަށް ރައީސް ސާލިހަށް ދަންނަވާނެ ކަމަށާއި، މިއީ މަރަދޫ ރައްޔިތުން ބޭނުންވެފައިވާ ކަމެއް ކަމަށްވެސް ޝަރީފް ވިދާޅުވިއެވެ. މީގެ އިތުރުންވެސް އައްޑޫ ސިޓީއަކީ (ވަކިން ހާއްސަކޮށް މަރަދޫއަކީ) މަސްވެރި ރަށެއްކަމުން އެ ސިޓީގައި 3000 ޓަނުގެ ޖާގައިގެ މަސް ފެކްޓަރީއެއް ހައްދަވައިދެއްވުމަށްވެސް ރައީސް އަރިހުގައި ދަންނަވާނެ ކަމަށްވެސް ޝަރީފް ވިދާޅުވިއެވެ. އަދި އައްޑޫ ރައްޔިތުންގެ އުއްމީދުތައް ފުރިހަމަ ކޮށްދެއްވާނެ ކަމުގެ ޔަގީންކަންވެސް އެބައޮތް ކަމަށް ޝަރީފް ވިދާޅުވިއެވެ.
ރައީސް ސާލިހު އައްޑޫ ސިޓީއަށް ކުރައްވާ ތިން ދުވަހުގެ ރަސްމީ ދަތުރުފުޅެއް މިއަދު ވަނީ ފައްޓަވާފައެވެ. އެގޮތުން މިއަދު ހަވީރު އެމަނިކުފާނު ވަނީ ބިން ހިއްކުމުގެ މަޝްރޫއުގެ އަމަލީ މަސައްކަތް ފައްޓަވައިދެއްވާފައެވެ. މި ދަތުރުފުޅުގައި ރައީސުލްޖުމްހޫރިއްޔާގެ އަރިހުގައި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަވައެވެ.
އައްޑޫ ސިޓީގެ ތަރައްގީއަށް ބޮޑެތި ބަދަލުތަކެއް ގެނައުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.
