ލީގު ކާމިޔާބު ކުރުމަށްފަހު ސްޕަލެޓީ ނަޕޯލީ ދޫކޮށްލަނީ

މި ސީޒަނުގައި އިޓަލީ ލީގުގެ ޗެމްޕިއަންކަން ހޯދި ނަޕޯލީގެ ކޯޗު ސްޕަލެޓީ ކުރިޔަށް އޮތް ސީޒަނުގައި ޓީމުގައި ނުހުންނާނެކަމަށް ބުނެފިއެވެ.

1990 ވަނަ އަހަރުގެ ފަހުން ނަޕޯލީއަށް ލީގު ކާމިޔާބުކޮށްދިން ފުރަތަމަ ކޯޗަކީ ސްޕަލެޓީއެވެ. އޭނާ ވަނީ އެއް އަހަރު ދުވަހުގެ ބްރޭކެއް ބޭނުންވާ ކަމަށް ޓީމުގެ އޯނަރު ކައިރީ ބުނެފައެެވެ. އޭނާ ބުނި ގޮތުގައި އެއީ ވަރުބަލިވުމާއި އަދި ދަރިފުޅާއެކު ވަގުތު ހޭދަކުރުމަށް ނިންމި ނިންމުމެކެވެ.

ނަޕޯލީގެ އޯނަރު، ޑި ލޮރެންޓިސް ވިދާޅުވީ، ސްޕަލެޓީއަކީ މޮޅު ކޯޗެއް ކަމަށާއި، އޭނާ ކޮށްދީފަހުރި ކަންކަން ގިނަވުމުން އެކަމަށް އިހުތިރާމްކޮށް އޭނާގެ ނިންމުމަށް އިހުތިރާމްކުރާކަމަށެވެ. މީޑިއާ ރޮޕޯޓްތަކުން ދައްކާގޮތުން ނަޕޯލީ އާ ހަވާލުވުން އެންމެ ގާތީ ސްޕެއިންގެ ކުރީގެ ކޯޗު، ލުއިސް އެންރީކޭއެވެ.

ސްޕަލެޓީ ވަނީ ރޯމާ އާއި އިންޓަ މިލާން ހިމެނޭހެން ގިނަ ޓީމުތަކަކަށް ކޯޗުކަން ކޮށްދީފައެވެ.