ރެއާލް ލަދު ގަންނުވާލައި ސިޓީ ގޮވައިގެން ފައިނަލަށް ގާޑިއޯލާ

ޗެމްޕިއަންސް ލީގު ފުޓްބޯޅަ މުބާރާތުގައި 4-0 އިން މޮޅުވެ، ޗެމްޕިއަން ރެއާލް މެޑްރިޑް ކަޓުވާލުމަށްފަހު ޕެޕް ގާޑިއޯލާ މެންޗެސްޓާ ސިޓީ މުބާރާތުގެ ފައިނަލަށް ދަތުރުކޮށްފި އެވެ.

އަންނަ މަހުގެ 10ގައި ތުރުކީގައި ކުޅޭ ފައިނަލްގައި ސިޓީއާ ދެކޮޅަށް ނުކުންނާނީ އިޓަލީގެ އިންޓަމިލާނެވެ. މުޅިން އަލަށް ސިޓީ މި މުބާރާތް ކާމިޔާބުކުރަން މަސައްކަތް ކުރާއިރު އިންޓަމިލާން ވަނީ މި ތަށި ތިން ފަހަރެއްގެ މަތީން ކާމިޔާބުކޮށްފަ އެވެ. އެ ޓީމު އެންމެ ފަހުން ތަށި ހޯދީ 2010 ވަނަ އަހަރު އެވެ. އެ އަހަރު އިންޓަ ފައިނަލަށް ދިޔައީ ގާޑިއޯލާ ކޯޗުކޮށްދެމުންދިޔަ ބާސެލޯނާ ބަލިކޮށްފަ އެވެ. ސިޓީއަށް ތަށި މިހާތަނަށް ނުލިބުނަސް އެ ޓީމު ވަނީ އެއްފަހަރު ފައިނަލް ކުޅެފަ އެވެ.

ސިޓީގެ އިއްތިހާދު ސްޓޭޑިއަމުގައި މިރޭ ކުޅުނު ސެމީގެ ފަހު މެޗުގައި ރެއާލް މެޑްރިޑަށް އެއްކަމެއް ވެސް ނުކުރެވުނެވެ. މުޅި މެޗު ސިޓީން ކޮންޓްރޯލްކޮށްގެން މޮޅަށް ކުޅުނުއިރު ފުރަތަމަ ހާފުގައި ދިޔައީ ރެއާލް އަށް އޮބިނޯވެގެންވެ. އާލިން ހާލަންޑް ބޮލުން ޖެހި ނުރައްކާތެރި ދެ ބޯޅަ ރެއާލްގެ ކީޕަރު ތިބައޫ ކޯޓުއާ ސަލާމަތްކުރި ފަހުން ފުރަތަމަ ދެ ގޯލު ވެސް ޖަހައިދިނީ ބެނާޑޯ ސިލްވާ އެވެ. އެއީ ފުރަތަމަ ހާފުގެ 23 ވަނަ މިނިޓާއި 37 ވަނަ މިނިޓްގަ އެވެ. އޭގެ ފަހުން ތިން ވަނަ ގޯލަކީ މިލިޓާއޯ އަތުން ބައިކޮޅަށް ވަން ގޯލެކެވެ. މެޗުގެ ފަހު މިނިޓްގައި ހަތަރުވަނަ ގޯލު ޖެހީ ހޫލިއަން އަލްވަރާޒެވެ. މިއާއެކު ދެމެޗުގެ އެގްރިގޭޓުން ސިޓީ މޮޅުވީ 5-1އިންނެވެ.

މުބާރާތުގެ އެންމެ ކާމިޔާބު ޓީމު ރެއާލް ސެމީ ފައިނަލުން މި ފަހަރުގެ މުބާރާތާ އަލްވަދާއު ކިޔާފައިވާއިރު އިންޓަމިލާނުގެ ސަޕޯޓަރުން މިހާރު ވަނީ ތުރުކީ އަށް ދިއުމަށް ޓިކެޓް ގަންނަން ފަށައިފަ އެވެ.