ކަނޑުތައް ގަދަވެ ވިއްސާރަކުރާނެކަމަށް ލަފާކޮށް ބޮޑުބަޔަކަށް ވައިޓް އެލާޓް
ނ އަތޮޅުން ފެށިގެން އައްޑޫ ސިޓީއަށް އަދި ހއ އަތޮޅުން ފެށިގެން ބ އަތޮޅަށް ވަނީ އެލާޓް ނެރެފައި
މާލެއަށް ބޯކޮށް ވާރޭވެހެނީ
މޫސުން ގޯސްވާނެ ކަމަށް ލަފާކޮށް ރާއްޖޭގެ ބޮޑު ބަޔަކަށް ވައިޓް އެލާޓް ނެރެފިއެވެ.
މޫސުމާއި ބެހޭ ގައުމީ އިދާރާއިން ބުނީ ހޯމަ ދުވަހުގެ ރޭ 7ން މެންދަމު 1ށް ނ އަތޮޅުން ފެށިގެން އައްޑޫ ސިޓީއަށް ވައިޓް އެލާޓް ނެރޭކަމަށެވެ. މިސަރަހައްދަށް އެލާޓް ނެރެފައިވަނީ ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައި ޖެހޭނެކަމަށް ލަފާކޮށެވެ. އަދި ވިލާގަނޑުގައި ގަޑިއަކު 45 މޭލަށް ވައިގަދަވެ ކަނޑުތައް ގަދަވާނެކަމަށްވެސް ވަނީ ލަފާކޮށްފައެވެ.
މީގެއިތުރުން ހއ އަތޮޅުން ފެށިގެން ބ އަތޮޅަށްވެސް ވަނީ ވައިޓް އެލާޓް ނެރެފައެވެ. މިސަރަހައްދަށް ވައިޓް އެލާޓް ނެރެފައިވަނީ ހޯމަ ދުވަހުގެ ރޭ 8ން ފެށިގެން މެންދަމު 2 ޖެހުމާ ހަމައަށެވެ. މެޓް އޮފީހުން ބުނީ ބޯކޮށް ވާރޭވެހިމާއެކު މިސަރަހައްދަށް ގުގުރާނެކަމަށެވެ. އަދި ވިލާގަނޑުގައި ގަޑިއަކު 45 މޭލަށް ވައިގަދަވާނެކަމަށް ލަފާކުރެވޭކަމަށެވެ.
