މޫސުން ގޯސް ދުވަސްވަރު އެއްގަމު އުޅަނދުގެ އެކްސިޑެންޓްތައް ހިނގާ މިންވަރު އިތުރު: ފުލުހުން
ގިނަ އެކްސިޑެންޓްތައް ހިނގަނީ ދުއްވަންޖެހޭ ސްޕީޑަށް ވުރެ ބާރަށް ދުވުމުގެ ސަބަބުން
އެކްސިޑެންޓެއްގެ ސީން އެއް
މޫސުން ގޯސްދުވަސްވަރު އެއްގަމު އުޅަނދުގެ އެކްސިޑެންޓްތައް ހިނގާ މިންވަރު އިތުރު ކަމަށް ފުލުހުން ބުނެފިއެވެ.
ފަސްކާފު ޕްރޮގްރާމްގައި ވާހަކަދައްކަވަމުން އިންސްޕެކްޓަރ އޮފް ޕޮލިސް އިބްރާހިމް ހަލީލް ވިދާޅުވީ އާއްމު ދުވަސްތަކާއަޅާބަލާއިރު، މޫސުން ގޯސް ދުވަސްވަރު މާލެ ސަރަހައްދުގައި ގިނައިން އެކްސިޑެންޓްތައް ހިނގާ މިންވަރު އިތުރު ކަމަށެވެ.
އެގޮތުން ބްރިޖް ހައިވޭ ގައި ވަރަށް ގިނަ އެކްސިޑެންޓްތައް ހިނގާކަން އޭނާ ފާހަގަކުރެއްވިއެވެ.
އިބްރާހިމް ވިދާޅުވީ ގިނަ އެކްސިޑެންޓްތައް ހިނގަނީ ދުއްވަންޖެހޭ ސްޕީޑަށް ވުރެ ބާރަށް ދުވުމުގެ ސަބަބުން ކަމަށެވެ. އަދި ސައިކަލު މަޑުކުރުމުގެ ތެރޭގައި ކައްސާލައިގެން ދިއުމާއި، ހެލްމެޓް ރަނގަޅަށް ނޭޅުމުގެ ސަބަބުން ވިއްސާގެން ގޮސް އެހެން ދުއްވާ އުޅަނދެއްގައި ޖެހިގެން ވެސް އެކްސިޑެންޓް ހިނގާ ކަމަށެވެ. މީގެ އިތުރުން ވާރޭ ވެހޭ ދުވަސްތަކުގައި ބައެއް މީހުން ލައިގެން އުޅޭ ވިއްސާރަ ކޯޓު ނައްޓައިގެން ގޮސް ވެސް ބައެއް އެކްސިޑެންޓްތައް ހިނގާފައިވާ ކަމަށް އޭނާ ވިދާޅުވިއެވެ.
އިބްރާހިމް ވިދާޅުވީ އެކްސިޑެންޓެއްވުމުން އެކަން ފުލުހުންނަށް ރިޕޯޓު ކުރަންޖެހޭ ކަމަށެވެ. ދެފަރާތުގެ މައްސަލައެއް ނެތް ނަމަވެސް ރިޕޯޓު ކުރުމަށް އޭނާ އިލްތިމާސްކުރެއްވިއެވެ.
މީގެ އިތުރުން އިބްރާހިމް ވިދާޅުވީ ބައެއް ފަހަރު އެކްސިޑެންޓްވުމަށްފަހު ބައެއް ވެހިކަލްތައް މަޑުނުކޮށްދާ ކަމަށާއި، ބައެއް މީހުން ފިލުމަށް ވެސް މަސައްކަތް ކުރާ ކަމަށެވެ. އެއީ މައްސަލައެއް ކަމަށާއި، އެ މައްސަލަ ޖިނާއީ ކުށެއްގެ ގޮތުގައި ތަހުގީގު ކުރެވޭނެ ކަމަށް އިބްރާހިމް ވިދާޅުވިއެވެ.
މޫސުން ގޯސް ދުވަސްވަރު މާގިނައިން އެކްސިޑެންޓްތައް ހިނގަމުންދާތީ ދުއްވާ މީހުން އިތުރަށް ސަމާލުވުމަށް ވަނީ އިލްތިމާސްކުރައްވާފަ އެވެ.
