އިނގިރޭސިވިލާތުގެ ލަންޑަނުގެ ޑިސްޓްރިކްޓް ލީގުގެ ސެންޗަނަރީ ކަޕްގެ ޗެމްޕިއަންކަން ރާއްޖޭގެ ކުރީގެ ޓުއަރިޒަމް މިނިސްޓަރު އަލީ ވަހީދު (ބަލަކް) ކޯޗުކޮށްދިން އިނގިރޭސިވލާތުގެ ސްޕޯޓިން ލަންޑަން ކާމިޔާބުކޮށްފި އެވެ.
މިރޭ ކުޅުނު ފައިނަލް މެޗު އޭނާގެ ޓީމު ކާމިޔާބުކުރީ ލަންޑަނުގެ ގަދަ ޓީމެއް ކަމަށްވާ ރޭންސްޕާކް 1-0އިން ބަލިކޮށްގެންނެވެ. މެޗުގެ ހަމައެކަނި ލަނޑު ޖެހީ ފުރަތަމަ ހާފުގައި ޖެކް ލޭކީ އެވެ.
މިއީ ދިވެއްސަކު ބައިނަލް އަގްވާމީ ފުޓްބޯޅަ ކޯޗް ކޮށް ދިނުމުގައިގައި މިހާތަނަށް ހޯދި އެންމެ ބޮޑު ކާމިޔާބީ އެވެ. އަލީ ވަހީދަކީ ކޯޗިން އަށް ވަރަށް ޒުވާން އެކަމަކު ފުޓްބޯޅައިގެ ތަޖުރިބާކާރެކެވެ. ރާއްޖޭގައި ކޯޗުކޮށްދިނުމުގެ ފުރުސަތު ލިބިފައިނެތި އޭނާ މިހާތަނަށް ކޯޗުކޮށްދެމުން ދިޔައީ އިނގިރޭސިވިލާތުގަ އެވެ. 2015 ވަނަ އަހަރުން ފެށިގެން 2018ގެފަހުކޮޅާ ހަމައަށް އަދި 2020 ވަނަ އަހަރުން ފެށިގެން އިނގިރޭސިވިލާތުގައި ދިރިއުޅެމުން އަންނަ ބަލަކްގެ އަތުގައި އިނގިރޭސި ކޯޗިން ލައިސަންސްގެ ލެވެލް 2ގެ ފާސް އެބައޮތެވެ.
ކޯޗިން ކެރިއަރުގައި ފުރަތަމަ ފަހަރަށް ތައްޓެއް ހާސިލްކުރެވުނުއިރު މިހާތަނަށް އޭނާ ވަނީ ތިން ފައިނަލްގައި ކުޅެފަ އެވެ. މީގެ ކުރިން ކުޅުނީ ވިމްބަލްޑަން ކަޕާއި ގްރެންފެލް މެމޯރިއަލް ކަޕްގެ ފައިނަލްގަ އެވެ. މީގެ ތެރެއިން ފުރަތަމަ ފައިނަލްގައި އޭނާގެ ޓީމު ބަލިވީ 5-0ގެބޮޑު ތަފާތަކުންނެވެ.
"އެއީ ހަޔާތުގައި ކޯޗިންގައި އެންމެ ދެރަވި ދުވަސް. އެކަމަކު ތިން ވަނަ ފައިނަލާ ހިސާބަށް އައިއިރު ބަލަކް މިހުރީ ވަރަށް ބޮޑު ޔަގީންކަމަކާއެކު. އިރާދަކުރެވިއްޔާ މިއީ ކޯޗިންގެ މުޅިން އައު ފެށުމަކަށްވާނެ. އަޅުގަނޑުގެ ކޮންމެ ކާމިޔާބީއަކީ ދިވެހި ފުޓްބޯޅައަށް އޭގެ ފައިދާކުރާނެ ކާމިޔާބީއެއް،"ބަލަކް ބުންޏެވެ.
އަލީ ވަހީދު ރާއްޖޭގައި ހޯދި ކާމިޔާބީތައް
ބަލަކް އަކީ އޭނާގެ މަދުރަސީ ހަޔާތުގައި މޮޅު ޑިފެންޑަރެކެވެ. ޖަމާލުއްދީން ސްކޫލުގެ ފުޓްބޯޅަ ޓީމުގެ ކެޕްޓަނެވެ. އޭގެ ފަހުން ޒުވާން ގައުމީ ޓީމަށް ވެސް ކުޅުނެވެ. އެކަމަކު މަތީ ތައުލީމަށް ރާއްޖޭން ބޭރަށް ދާން ޖެހުމުން ސީނިއާ ގައުމީ ޓީމް އަށް ނުފޯރި އެވެ. އެހިތިކަން އޭނާ ފިލުވާނީ ގައުމީ ފުޓްބޯޅަ ޓީމުގެ މެނޭޖަރުގެ މަގާމުންނެވެ. ސާފް ޗެމްޕިއަންޝިޕާއި އިންޑިއަން އޯޝަން އައިލެންޑް ގޭމްސް ފަދަ މުބާރާތްތަކުގައި މެނޭޖަރުކަން ކުރުމަށްފަހު، ބަލަކް ކުލަބު ފުޓްބޯޅަ އަށް އެނބުރިގަތީ ރާއްޖޭގެ އެންމެ ވިދުންގަދަ ކުލަބު ނިއުރޭޑިއަންޓްގެ ޗެއާމަންގެ ގޮތުގަ އެވެ. 2012 ވަނަ އަހަރު ފެށިގެން ޖެހިގެން އައި ހަތަރު އަހަރު ރާއްޖޭގެ އެންމެ ކާމިޔާބު ކުލަބުގެ މަގާމަށް ނިއުރޭޑިއަންޓް ވާސިލްވީ ބަލަކްގެ ވަރަށް ބޮޑު ގުރުބާނީތަކަކާއެކުގަ އެވެ. ތައުމީ ތަށި މިލްކުކޮށް ދިވެހި ލީގު ޖެހިޖެހިގެން ތިން ފަހަރު ހޯދައި، ނިއުރޭޑިއަންޓަށް ޒަމާނީ ބޮޑެތި ބަދަލުތަކެއް ގެނެސްދިނެވެ.
ގަދަ ޕޮލިޓީޝަނެއްގެ ގޮތުގައި ވެސް މަޝްހޫރުކަން ހޯދި، ބަލަކް މިހާރު ފަށާފައިމިވަނީ ފުޓްބޯޅައިގެ މުޅިން އައު ސޮފުހާއެކެވެ. ކޯޗެއްގެ ގޮތުގައި ރާއްޖޭގެ އެންމެ އުހަށް ޒަމާނީ ފޯމިއުލާއަކާއެކު ވާސިލްވުމަކީ އޭނާގެ ވަރަށް ބޮޑު އުއްމީދެކެވެ. ސްޕޯޓިން ލަންޑަނުން މިފެށި ދަތުރު އަދި އޮތީ ކުރިއަށެވެ. އަމުދުން ތާރީހީ މިކާމިޔާބީއާއެކު އޭނާއަށް ދިވެހި ފުޓްބޯޅައިގައި އޮތް "އިތުބާރު" ވަރަށް ބޮޑަށް އިތުރުވާނެ އެވެ.