ބެލްޖިއަމްގެ މިޑްފީލްޑަރު އަކްސެލް ވިޓްސެލް ގައުމީ ޓީމަށް ކުޅުން ހުއްޓާލައިފި

ބެލްޖިއަމް ގައުމީ ޓީމަށް ކުޅެމުން އައި އަކްސެލް ވިޓްސެލް، ގައުމީ ޓީމަށް ކުޅުން ހުއްޓާލިކަން އިއުލާންކޮށްފިއެވެ.

އުމުރުން 34 އަހަރުގެ މިޑްފީލްޑަރު އެކަން ހާމަކޮށްފައި މިވަނީ އޭނާގެ ރަސްމީ ޓުވިޓަރ އެކައުންޓް މެދުވެރިކޮށެވެ. އޭނާ ބުނީ ގައުމީ ޓީމަށް ކުޅުން ހުއްޓާލަން ނިންމީ އެކަމާމެދު ވަރަށް ބޮޑަށް ވިސްނާފައި ކަމަށެވެ. ގައުމީ ޓީމުގައި އޭނާ ހޭދަކުރި 15 އަހަރުގެ ތެރޭގައި ގައުމު ތަމްސީލުކުރަން ފުރުސަތު ލިބުމަކީ ލިބުނު ބޮޑު އުފަލެއް ކަމަށްވެސް ވިޓްސެލް ވަނީ ބުނެފައެވެ.

ވިޓްސަލް ބުނީ މިވަގުތު އޭނާއަށް ދެން އެންމެ މުހިންމީ އާއިލާއާއި އޭނާގެ ކުލަބަށް ވަގުތު ދިނުން ކަމަށެވެ. އެހެންކަމުން ބެލްޖިއަމްގެ ޖަރޒީގައި ވިދާލުމުގެ ފުރުސަތު އޭނާއަށް ދިން އެންމެހައި ފަރާތްތަކަށް ޝުކުރު އަދާކުރާ ކަމަށްވެސް ވަނީ ބުނެފައެވެ. އޭނާ ވަނީ ގައުމީ ޓީމުގައި އޭނާއަށް އިރުޝާދު ދިން ކޯޗުންނާއި، ޓީމުގެ އެހެނިހެން ކުޅުންތެރިން، އަދި މެޑިކަލް ސްޓާފުންނަށް ޚާއްސަ ޝުކުރެއް އަދާކޮށްފައެވެ. މީގެ އިތުރުން، ގައުމީ ޓީމަށް އޭނާ 130 މެޗު ކުޅެދިންއިރު ސަޕޯޓަރުން ދިން ސަޕޯޓަށްޓަކައި ޝުކުރު އަދާކުރާކަން ފާހަގަކުރަމުން އޭނާ ބުނީ، ގައުމީ ޓީމުގެ އައު ޖީލުންވެސް އުފާވެރިކަން ހޯދިދާނެކަން ޔަގީންކުރާކަމަށެވެ.

ބެލްޖިއަމްގެ ޒުވާން ގައުމީ ޓީމުތަކަށްވެސް ކުޅެފައިވާ ވިޓްސެލްއަށް ސީނިއަރ ޓީމުން ޖާގަ ލިބުނީ 2018 ވަނަ އަހަރުއެވެ. އޭގެ ފަހުން އޭނާ ވަނީ މިހާތަނަށް ގައުމީ ޓީމަށް 130 މެޗު ކުޅެދީ، 12 ލަނޑު ޖަހާފައެވެ. ގައުމީ ޓީމާއެކު އޭނާގެ ކާމިޔާބިީއަކީ 2018 ވަނަ އަހަރު ރަޝިޔާގައި އޮތް ފީފާ ވޯލްޑް ކަޕްގެ ތިންވަނަ ހޯދުމެވެ. ވިޓްސެލް މިހާރު ކުޅެމުން އަންނަނީ ސްޕެއިންގެ އެތުލެޓިކޯ މެޑްރިޑަށެވެ. ޖަރުމަނުގެ ބޮރޫޝިއާ ޑޯޓްމަންޑު ދޫކޮށް އޭނާ އެތުލެޓިކޯއަށް ބަދަލުވީ މިދިޔަ އަހަރުއެވެ. އޭގެކުރިން އޭނާ ވަނީ އިތުރު ހަތަރު ކުލަބަށްވެސް ކުޅެފައެވެ. ގައުމީ ޓީމަށް ވިޓްސެލް އެންމެ ފަހުން ކުޅުނު މުބާރާތަކީ މިދިޔަ އަހަރު ގަތަރުގައި އޮތް ފީފާ ވޯލްޑްކަޕެވެ. އެ މުބާރާތަށް ބެލްޖިއަމުން އެކުލަވައިލި ސްކޮޑުން އޭނާއަށް ވަނީ ޖާގަ ދީފައެވެ.