ލިޔެކިޔުންތައް ގެއްލުވާލި ކަމަށް ބުނެ ކުރާ ތުހުމަތަށް ސައުދު އިންކާރު ކުރައްވައިފި
9 ޖުލައި 2017 | އާދީއްތަ 08:22ލިޔެކިޔުންތައް ގެއްލުވާލި ކަމަށް ކުރާ ތުހުމަތުތަކަށް ސައުދު އިންކާރު ކުރޭ
ވިލިނގިލީ ދާއިރާގެ މެންބަރު ސައުދު ހުސެއިން
އެންޓިކޮރޮޕްޝަން ކޮމިޝަން (އޭސީސީ) ތަހުގީގު ކުރަމުންދާ މައްސަލައެއްގެ ލިޔެކިޔުންތަކެއް ގެއްލުވާލާފައިވާ ކަމަށް ބުނެ ފުލުހުން ކޮށްފައިވާ ތުހުމަތަށް ރައްޔިތުންގެ މަޖިލީހުގެ ވިލިނގިލި ދާއިރާގެ މެންބަރު ސައުދު ހުސެއިން އިންކާރު ކުރައްވައިފި އެވެ.
އާދީއްތަ ދުވަހު ފުލުހުންގެ އިދާރާ އަށް ހާޒިރުވެވަޑައިގަތުމަށްފަހު ނިކުމެވަޑައިގެން ރާއްޖެއެމްވީ އަށް މައުލޫމާތު ދެއްވަމުން ސައުދު ވިދާޅުވީ އޭނާގެ މައްޗަށް ކުރާ ތުހުމަތަކީ މީގެ ހަތަރު އަހަރު ކުރިން އޭނާ ވިލިނގިލީ ކައުންސިލް މެމްބަރެއްގެ ގޮތުގައި ހުންނަވަނިކޮށް އޭސީސީ އިން ތަހުގީގު ކުރަމުން ދިޔަ މައްސަލައަކާ ގުޅޭ ކައުންސިލް އިދާރާގެ ލިޔެކިޔުންތަކެއް ގެއެލުވާލުމުގެ ތުހުމަތު ކަމަށެވެ.
ސައުދު ވިދާޅުވީ އޭނާގެ މައްޗަށް އޭސީސީ އިން ކޮށްފައިވާ އެ ތުހުމަތުތަކަށް އިންކާރު ކުރާ ކަމަށެވެ. އެގޮތުން ސައުދު ވިދާޅުވީ އޭސީސީ އިން ހުށަހަޅައިގެން ފުލުހުން ތަހުގީގު ކުރަމުންދާ މި މައްސަލައަކީ އުފެދުމުގައި ވެސް ބާތިލް މައްސަލައެއް ކަމަށެވެ.
ސައުދު ވިދާޅުވީ އޭނާ ކައުންސިލް މެމްބަރެއްގެ ގޮތުގައި ހުންނެވީ މިގެ ހަތަރު އަހަރު ކުރިންކަމުން ހަތަރު އަހަރު ފަހުން ކައުންސިލްގެ ލިޔެކިޔުންތަކެއް އޭނާ ގެއްލުވާލާފައިވާ ކަމަށް ބުނެ އޭސީސީ އިން މައްސަލައެއް ފުލުހަށް ހުށަހަޅައިގެން ތަހިގީގު ކުރަމުން ދާތީ ކަންބޮޑުވާ ކަމަށެވެ.
ސައުދު ވިދާޅުވީ ކައުންސިލް އިދާރާގެ ލިޔެކިޔުންތައް ބެލެހެއްޓުމަކީ ކައުންސިލް މެމްބަރުންގެ ޒިންމާ އެއް ނޫން ކަމަށާއި ކައުންސިލް އިދާރާގެ ލިޔެކިޔުންތައް ބަލަހައްޓަނީ ސވިލް ސާވިސް ކޮމިޝަންއާއި ލޯކަލް ގަވަމެންޓް އޮތޯރިޓީ (އެލްޖީއޭ) ގެ ފަރާތުން ކަމަށެވެ.
އޭނާ ވިދާޅުވީ ކައުންސިލްތަކުގެ ދައުރު ބަދަލު ވުމަށް ކުރިއަށް ގެންދަން ޖެހޭ ކަންތައްތައް ވެސް ކުރިއަށް ގެންދަނީ އެލްޖީއޭއާއި ސިވިލް ސާވިސްގެ ބެލުމުގެ ދަށުން ކަމަށާއި އަދި ހުރިހައި ލިޔެކިޔުންތަކެއް ބަދަލުކޮށް ކައުންސިލްތަކުގެ އިންތިގާލީ މަރުހަލާ ވެސް ކުރިއަށް ގެންދަނީ އެގޮތަށް ކަމަށް ސައުދު ވިދާޅުވިއެވެ. އެހެން ކަމުން ކައުންސިލް މެމްބަރެއް ނުވަތަ ކައުންސިލް އިދާރާގެ ރައީސް އެއްވެސް ލިޔެކިޔުމެއް ނުބަލަހައްޓާނެ ކަމަށާއި ކައުންސިލް މެމްބަރެއްގެ އަތުން ލިޔެކިޔުމެއް ގެއްލޭނެ ގޮތެއް ނޮއޮންނާނެ ކަމަށް ސައުދު ވިދާޅުވިއެވެ.
ސައުދު ވިދާޅުވީ އެއްވެސް އިދާރާއެއްގެ ލިޔެކިޔުމެއް ގެއްލިއްޖެނަމަ އެކަމެއް ތަހުގީގު ކުރަން ޖެހޭނެ ކަމަށެވެ. ނަމަވެސް މައްސަލަތައް ތަހުގީ ކުރުމުގައި ގިނަ ދުވަސް ވެގެން ނުވާނެ ކަމަށް ސައުދި ވިދާޅުވިއެވެ. އަދި މީގެ ހަތަރު އަހަރު ކުރިން ގެއްލިގެން އުޅޭ ލިޔެކިޔުންތަކާ ބެހޭ ގޮތުން އޭނާ މިއަދު ފުލުހަށް ހާޒިރު ކޮށް ސުވާލު ކުރުމުން އޭސީސީގެ މެމްމބަރުންގެ މިނިވަން ކަމައި އިހުލާސްތެރި ކަމާ މެދު ސުވާލު އުފެދޭ ކަމަށް ސައުދު ވިދާޅުވިއެވެ. އަދި ވިދާޅުވީ ދައުލަތުގެ މުއައްސަސާތަކުން ކުރާ މިފަދަ ތަހުގީގުތައް އެއްވެސް މޫހެއްގެ ނުފޫޒެއް ނެތި މިނިވަން ކަމާއެކު އަވަހަށް ތަހުގީ ކުރަން ޖެހޭ ކަމަށެވެ.
މީގެއިތުރުން ސައުދު ވިދާޅުވީ އޭނާގެ މައްޗަށް ތަފާތުއެކިއެކި ތުހަމތުތައް ކޮށް ފުލުހުންގެ އިދާރާ އަށް ހާޒިރު ކޮށް ސުވާލު ކުރި ނަމަވެސް އޭނާ ކުރަމުންދާ މަސައްކަތަށް އެއްވެސް ބަދަލެއް ނައަންނާނެ ކަމަށެވެ. އަދި ސަރުކާރުގެ ތެތޭގައި ހުރި ކޮރޮޕްންގެ މައްސަލަތަކާ ސަރުކާރުން ގޯސް ކޮށް ކުރަމުންދާ ކަންތައްތަކާ ދެކޮޅަށް އަޑު އުފުލާނެ ކަމަށާއި އިދިކޮޅު ފަރާތްތަކާ ގުޅީގެން ކުރާ މަސައްކަތް ހުއްޓާ ނުލާނެ ކަމަށެވެ.
