ގޭއްގެއަށް ޑެލިވާ ކޮށްދެމުން ދިޔަ ބިން ލައިނާގެ ޚިދުމަތް ހުއްޓާލަން ވެމްކޯއިން ނިންމައިފި

ޕްރީ އޯޑަރު ނަގައިގެން ގޭއްގެއަށް ޑެލިވާ ކޮށްދެމުން ދިޔަ ބިން ލައިނާގެ ޚިދުމަތް ހުއްޓާލަން ނިންމާފައިވާ ކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ)އިން ބުނެފިއެވެ.

ވެމްކޯއިން ބުނީ ޕްރީ އޯޑޮރކޮށް ޑަސްބިން ކޮތަޅު ޑެލިވަރކޮށް ދިނުމުގެ ޚިދުމަތް 10 މޭ ވާ ބުދަ ދުވަހުން ފެށިގެން މެދުކަނޑާލާނެ ކަމަށެވެ.

ނަމަވެސް އަމިއްލަ ވިޔަފާރިތަކުން ވެމްކޯގެ ކޮތަޅު ވިއްކުމުގެ ފުރުސަތު ވަނީ ހުޅުވާލާފައެވެ. އެއީ މާލޭގެ ހަތް ފިހާރަ، ހުޅުމާލޭގެ އެއް ފިހާރައިގެ އިތުރުން ވިލިމާލެ ފިހާރައަކުންނެވެ. އޭގެ އިތުރުން ވެމްކޯގެ ފްރޮންޓް އޮފީސްތަކުން ވެސް ބިން ލައިނާ ގަންނަން ލިބޭނެއެވެ. އަދި އިންޑސްޓްރިއަލް ވިލެޖް، ހުޅުމާލެ ޓްރާންސްފަރ ސްޓޭޝަން އަދި ވިލިމާލެ ސްޓްރާންސްފަރ ސްޓޭޝަން ކޮތަޅު ލިބޭނެ ކަމަށެވެ.

ޕްރީ އޯޑަރު ނަގައިގެން ވެމްކޯއިން ގޭގެއަށް ޑެލިވާ ކޮށްދެމުން ދިޔަ ބިން ލައިނާގެ ޑެލިވަރީ ހުއްޓާލަން ނިންމި ސަބަބެއް ވެމްކޯއިން ހާމަކޮށްފައިނުވެއެވެ. ނަމަވެސް ވެމްކޯއިން އެ ޚިދުމަތް ފޯރުކޮށްދެމުން ދިޔަ ގޮތާމެދު ގިނަ އަދަދެއްގެ އާއްމު ރައްޔިތުން ކަންބޮޑުވުންފާޅުކޮށްފައިވެއެވެ. އެއީ ބިން ލައިނާ ޕްރީ އޯޑަރަށް މަދުވެގެން 24 ބޮނޑި އޯޑަރު ކުރަން ކުރަންޖެހުމާއި ގުޅިގެންނެވެ. މި އަދަދަށް ޕްރީއޯޑާ ކުރާނަމަ އަތުން ބޮޑު ހޭދައެއްދާ ކަމަށް އާއްމުން ބުނެފައިވެއެވެ.

ވެމްކޯއިން ދެ ކުލައެއްގެ ކޮތަޅު ވިއްކައެވެ. އެއީ ކަޅުކުލައާއި ފެހިކުލައިގެ ކޮތަޅެވެ. ކުނި އުކާލުމުގައި، ކުނިވާ ޒާތުގެ ކުނި ނުވަތަ އަމިއްލައަށް ފަނާވެދާ ޒާތުގެ ކުނި، ފެހި ކޮތަޅުގައި ބަންދުކުރުމަށާއި، އަދި އެހެނިހެން ކުނި ކަޅު ކޮތަޅުގައި ބަންދުކުރުމަށް ވެމްކޯއިން އެދެއެވެ. ވެމްކޯއިން ވިއްކަނީ އާއްމު ސައިޒު ނުވަތަ L ސައިޒު [17 އިންޗީ ދިގު] ގެ ބޮނޑިއެއްގައި 100 ކޮތަޅު އޮންނާނެއެވެ. އޭގެ އަގަކީ 35ރ އެވެ. ސައިޒު XXL [27 އިންޗި ދިގު]ގެ 100 ކޮތަޅު ބޮނޑިއާއި XXXL [48 އިންޗީގެ] ގެ 50 ކޮތަޅު ބޮނޑި ވިއްކަނީ 165ރ އަށެވެ.