ފުއްގިރި މައްސަލަ: ޔާމީނުގެ ފަރާތުން ސުޕްރީމް ކޯޓަށް އިސްތިއުނާފީ ނުކުތާތައް ހުށައަޅައިފި

ރ. ފުއްގިރި ހިޔާނާތުގެ މައްސަލައިގައި ޝަރީއަތުގެ ކުރީގެ ހުށަހެޅުންތަކާ ގުޅިގެން ކުރީގެ ރައީސް އަބްދުﷲ ޔާމީނުގެ ފަރާތުން ސުޕްރީމް ކޯޓުގައި އިސްތިއުނާފު ކޮށްފައިވާ މައްސަލައިގެ ފުރަތަމަ އަޑުއެހުން ސުޕްރީމް ކޯޓުގައި ކުރިއަށް ގެންގޮސްފިއެވެ.

ސުޕްރީމް ކޯޓުގައި މި މައްސަލަ ކުރިއަށް ގެންދަނީ އަހުމަދު ކްރިކް ރިޒާގެ ފަރާތުން ހުށައަޅާފައިވާ މައްސަލައާވެސް އެކުއެކީގައެވެ.

ސުޕްރީމް ކޯޓުގައި މި މައްސަލަ ބައްލަވާ ބެންޗުގެ ރިޔާސަތުގައި އިންނަވަނީ ފަނޑިޔާރު ހުސްނުއްސުއޫދެވެ.

އާދިއްތަ ދުވަހުގެ އަޑުއެހުމުގައި އެންމެ ފުރަތަމަ ވަނީ ޔާމީނުގެ ފަރާތުން އިސްތިއުނާފީ ނުކުތާތައް ހުށައަޅުއްވާފައެވެ.

އެއީ ޝަރީއަތުގެ ކުރީގެ ހުށައެޅުންތަކާ ގުޅޭގޮތުން ދަށު ކޯޓުން ނިންމި ނިންމުންތައް ޔާމީނުގެ ފަރާތުން ހައިކޯޓުގައި އިސްތިއުނާފު ކުރުމުން ހައިކޯޓުންވެސް ދަށު ކޯޓުގެ ނިންމުމަށް ތާއީދު ކޮށްފައިވާތީ އިސްތިއުނާފު ކުރި ނުކުތާތަކެވެ.

ޔާމީނުގެ ފަރާތުން ހައިކޯޓަށް 3 ނުކުތާއެއް ހުށައެޅިއިރު، އޭގެ ތެރެއިން އެއް ނުކުތާއަކީ ދައުލަތުން ހުށައަޅާފައިވާ ބައެއް ހެކިތައް ޝަރީއަތަށް ބަލައިނުގަތުމަށް ޔާމީނުގެ ފަރާތުން އެދިފައިވާއިރު، އެ ހެކިތައް ބަލައިނުގަންނަން ޖެހޭ ސަބަބެއް އޮތްކަމަށް ނުފެންނަކަމަށް ދަށު ކޯޓުން ނިންމުމާއި ގުޅިގެން އިސްތިއުނާފު ކުރި ނުކުތާއެކެވެ.

އޭގެ ތެރޭގައި އަދީބާއި ޒިޔަތުވެސް ހިމެނޭއިރު، ރިޔާސީ ލޯންޗުކޮޅު ގޮއްވާލި މައްސަލައިގައިވެސް ތުހުމަތު ކުރެވުނު ފަރާތްތަކަށް ކުރި ދައުވާތައް އަނބުރާ ގެންގޮސްފައިވާކަން ޔާމީނުގެ ވަކީލު ފާހަގަ ކުރެއްވިއެވެ.

މި އަޑުއެހުމުގައި ފަނޑިޔާރު ހުސްނުއްސުއޫދު ވަނީ ރިޔާސީ ލޯންޗުކޮޅު ރޯކޮށްލި މައްސަލައާ ގުޅޭގޮތުން ދައުލަތާ ސުވާލު ކުރައްވާފައެވެ. އެކަމާ ގުޅިގެން ދައުލަތުގެ ވަކީލު ވިދާޅުވީ، އެ މައްސަލައިގައި ކޮށްފައިވާ ދައުވާތައް މިހާރު އަނބުރާ ގެނެސްފައިވާ ކަމަށެވެ.

ޔާމީނުގެ ފަރާތުން ވިދާޅުވީ، މައްސަލައާ ގުޅުންހުރި ހެއްކާއި، ގުޅުން ނެތް ހެއްކަކީ ކޮބައިކަންވެސް ކޯޓުން ރިއާޔަތްކޮށްފައިނުވާ ކަމަށެވެ.

ދެވަނަ އިސްތިއުނާފީ ނުކުތާއަކީ ހެއްކާބެހޭ ޤާނޫނުގައި ހެކި ބަލައިގަތުމާއި ގުޅޭގޮތުން އިސްތިއުނާފު ކުރާ ފަރާތަށް މަސްލަޙަތު ބޮޑު ފުރުސަތުތަކެއް އޮތްއިރު، އަލަށް އަމަލު ކުރަން ފެށި ޤާނޫނުގައިވާ ގޮތުގެ މަތިން ހެކި ބަލައިގަތުމާއި ގުޅޭ ހުށައެޅުންތައް ހުށައެޅުމަށް ފުރުސަތު ލިބިދީފައި ނުވާކަމަށް ބުނެ ހުށައެޅި ނުކުތާއެކެވެ.

ތިންވަނަ ނުކުތާއަކީ ހެކި ހާމަކޮށްދިނުމަށް އެދި ހުށައެޅުމާ ގުޅޭގޮތުން ގޮތް ނިންމުމުގައި ޖިނާއީ އިޖުރާއަތުގެ ޤާނޫނުގެ 129 ވަނަ މާއްދާ ނުބައިކޮށް މާނަކޮށްފައިވާކަމަށް ބުނެ ހުށައެޅި ނުކުތާއެކެވެ.

ޔާމީނުގެ ފަރާތުން ވަނީ އަދީބާއި ޒިޔަތަކީ ޔާމީނާމެދު އަދާވަތްތެރިކަން އޮތް ފަރާތްތަކެއްކަން ބަޔާންކޮށް، އެމީހުންގެ ހެކިބަސް ބަލައިނުގަތުމަށް އެދިފައެވެ.

ދެން ހުރި ހެކިތަކާމެދު އަލުން ގޮތެއް ނިންމަން ޖެހޭކަމަށް ކަނޑައަޅައިދިނުމަށްވެސް ޔާމީނުގެ ފަރާތުން ވަނީ އެދިފައެވެ.

އޭގެ އިތުރުން، ސުޕްރީމް ކޯޓުން މި އިސްތިއުނާފުގައި ގޮތެއް ކަނޑައެޅެންދެން މި މައްސަލައިގެ ދަށު ކޯޓުގެ އަޑުއެހުންތައް މަޑުޖައްސާލުމަށް އަމުރެއް ނެރެދިނުމަށްވެސް ޔާމީނުގެ ފަރާތުން އެދިފައިވެއެވެ.

އެއަށްފަހު ދައުލަތުން ވަނީ އިސްތިއުނާފީ ނުކުތާތަކަށް ޖަވާބުދިނުން ކުރިއަށް ގެންގޮސްފައެވެ.