އަލް ހިލާލް ބަލިކޮށް އޭޝިއަން ޗެމްޕިއަންސް ލީގު އުރާވާ އިން ކާމިޔާބުކޮށްފި

ސައުދީ އަރަބިއްޔާގެ އަލް ހިލާލް ބަލިކޮށް އޭއެފްސީ އޭޝިއަން ޗެމްޕިއަންސް ލީގު ޖަޕާނުގެ އުރާވާ ރެޑްސް އިން ކާމިޔާބުކޮށްފި އެވެ.

މި ދެ ޓީމު ބައްދަލު ކުރި ފުރަތަމަ ލެގު ނިމުނީ ދެ ޓީމު 1-1 އިން އެއްވަރުވެގެންނެވެ. ހޮނިހިރު ދުވަހު ކުޅުނު ދެ ވަނަ ލެގުގައި އުރާވާ އިން އަލް ހިލާލްގެ މައްޗަށް ކުރި ހޯދީ 1-0 އިންނެވެ. މެޗުގެ ހަމައެކަނި ލަނޑަކީ އަލް ހިލާލްގެ އަންދްރޭ ކެރިލޯ އަތުން 48 ވަނަ މިނެޓުގައި ބައިކޮޅަށް ވަތް ލަނޑެވެ. އެހެންކަމުން ދެ ލެގުގެ އެގްރިގޭޓު 2-1 އިން ކުރި ހޯދައިގެން އުރާވާ އިން ވަނީ ތިން ވަނަ ފަހަރަށް އޭޝިއަން ޗެމްޕިއަންސް ލީގު ކާމިޔާބުކޮށްފަ އެވެ. މީގެ ކުރިން އުރާވާ އިން ވަނީ 2007 ވަނަ އަހަރާއި 2017 ވަނަ އަހަރު ވެސް އޭޝިއަން ޗެމްޕިއަންސް ލީގު ކާމިޔާބުކޮށްފަ އެވެ.

މެޗަސް އަލް ހިލާލް އިން ކުރިމަތިލީ ސަލީމް އަލް ދައުސާރީ އާއި އަނިޔާގައި ހުރި ސަލްމާން އަލް ފަރަޖް ނުލަ އެވެ. ދައުސަރީ އަށް މެޗުގައި ނުކުޅެވުނީ ސަސްޕެންޑުކޮށްފައި ހުރުމުންނެވެ. ސަލްމާން އަލް ފަރަޖަށް ނުކުޅެވުނީ އޭނާ އަށް ލިބިފައިވާ އަނިޔާ އިން މުޅިން ރަނގަޅު ނުވާތީ އެވެ. ނަމަވެސް މެޗުގެ ފުރަތަމަ ހާފުގައި ޑޮމިނޭޓުކޮށްގެން ކުޅުނީ އަލް ހިލާލް އިންނެވެ. އެ ޓީމަށް ވަނީ ލަނޑު ޖަހާނެ ފުރުސަތު ލިބި، ބޭކާރުވެފަ އެވެ. އަލް ހިލާލްގެ އޮޑިއަން އިގަލޯ ފޮނުވާލި ބޯޅަ ގޯލަށް ވަންނަން ދަނިކޮށް، އެ ބޯޅަ ސަލާމަތް ކުރީ އުރާވާގެ ޑިފެންޑަރު އެލެގްޒެންޑާ ޝޮލްޒް އެވެ. މީގެ އިތުރުން އަލް ހިލާލަށް ކުޅެމުން އަންނަ ބްރެޒިލްގެ ވިންގާ މައިކަލް އާއި ކެރިލޯ ފޮނުވާލި ނުރައްކާތެރި ދެ ބޯޅަ މަތަކުރީ އުރާވާގެ ގޯލް ކީޕަރު ޝުސާކު ނިޝިކާވާ އެވެ.

އަލް ހިލާލް އާއި އުރާވާ ބައްދަލު ކުރި މެޗު ބަލަން 53،574 މީހުން ވަނީ ދަނޑަށް ވަދެފަ އެވެ.