އަންނަ މަހު އިންޑިޔާގައި ބާއްވާ ސާފް ޗެމްޕިއަންޝިޕް ފުޓްބޯޅަ މުބާރާތުގައި ބައިވެރިވާނެކަމުގެ ޔަގީންކަން ކުވޭތުންދީފި އެވެ.

މިއީ ސާކް ސަރަހައްދުގެ އެންމެ ބޮޑު ފުޓްބޯޅަ މުބާރާތުގައި ސަރަހައްދުން ބޭރުގެ ގައުމަކުން ވާދަކުރާ ފުރަތަމަ ފަހަރެވެ. މުބާރާތް ބާއްވާ އިންޑިޔާއިން މަސައްކަތް ކުރަމުންދަނީ ސާކުން ބޭރުގެ ދެ ގައުމު ލައްވައި މުބާރާތުގައި ކުޅުވުމަށެވެ. މި ގޮތުން މުބާރާތުގެ ދައުވަތު ސިންގަޕޫރާއި ޖޯޑަންއާއި ބަހުރޭނާއި އިންޑޮނީޝިއާގެ އިތުރުން ސައޫދީ އަރަބިއާއަށް ވެސް ވަނީ ދީފަ އެވެ.

ސާކުން ބޭރުން ދެ ގައުމު ބައިވެރިކުރަން އިންޑިޔާއިން މަސައްކަތް ކުރަމުންދަނީ ފީފާއިން ސްރީލަންކާ ސަސްޕެންޑްކޮށްފައިވާތީ އެވެ. ސާކުގެ ހަތް ގައުމުގެ ތެރެއިން އެންމެ ފަހުގެ ޗެމްޕިއަން އިންޑިޔާ އާއި ދިވެހިރާއްޖެ އަދި ޕާކިސްތާނާއި ބަނގްލަދޭޝްގެ އިތުރުން ނޭޕާލާއި ބޫޓާން މުބާރާތުގައި ބައިވެރިވާނެ އެވެ.

ސާފް ޗެމްޕިއަންޝިޕުގައި ވާދަކުރާގެ ބިދޭސީ ދެ ވަނަ ގައުމު ވަރަށް އަވަހަށް ސާފުން އިއުލާނުކުރާނެ އެވެ. ޖޫން 21 އިން ޖުލައި 3 އަށް ބެންގަލޫރުގައި ބާއްވާ މުބާރާތުގައި ވާދަކުރާ ކުވޭތަކީ ފީފާ ރޭންކިންގެ 143 ވަނަ ގައުމެވެ. މި މުބާރާތުގައި ބިދޭސީ ގައުމުތަކުން ބައިވެރިކުރަން އިންޑިޔާއިން ބާރު އަޅަމުންދަނީ މުބާރާތުގެ ވާދެވެރިކަން ބޮޑުކުރުމަށެވެ. މި މުބާރާތުގެ ތަށި މިހާތަނަށް އިންޑިޔާއިން ވަނީ އަށް ފަހަރު ހޯދައިފަ އެވެ. ދެވަނަ އަށް އެންމެ ގިނަ ތަށި ހޯދީ ދިވެހިރާއްޖެ އެވެ. އެއީ އެންމެ ދެ ތައްޓެވެ.