ފުލަމް ބަލިކޮށް ލިވަޕޫލް ގަދަ ހަތަރެއްގެ ތުންފަތްމަތީގައި
4 މެއި 2023 | ބުރާސްފަތި 02:26ލިވަޕޫލަށް ހަމައެކަނި ގޯލު ޖަހައިދިނީ ސަލާހް
ސަލާހް ގޯލު ޖަހާފައި އުފާ ފާޅުކުރަނީ
ފުލަމް 1-0އިން ބަލިކޮށް ޕްރެމިއާ ލީގުގެ ގަދަ ހަތަރެއްގައި ސީޒަން ނިންމާލުމުގެ އުއްމީދު ލިވަޕޫލް ދަމަހައްޓައިފި އެވެ.
މެޗުގެ ހަމައެކަނި ގޯލު ޖެހީ ލިބުނު ޕެނަލްޓީއަކުން މުހައްމަދު ސަލާހެވެ. ނަމަވެސް މި ޕެނަލްޓީއާމެދު ފުލަމްގެ ކޯޗު މާކޯ ސިލްވާހުރީ ވަރަށް ބޮޑަށް ނުރުހިފަ އެވެ.
މިއީ އޭނާގެ ޓީމު ޖެހިޖެހިގެން ބަލިވި ތިން ވަނަ މެޗެވެ. ނަމަވެސް ތާވަލުގައި ފުލަމް އޮތީ 45 ޕޮއިންޓާއެކު 10 ވަނާގަ އެވެ. ލިވަޕޫލް އޮތީ 59 ޕޮއިންޓާއެކު ފަސް ވަނާގަ އެވެ. މިއީ ހަތަރުވަނާގައިވާ މެންޗެސްޓާ ޔުނައިޓެޑަށްވުރެ ހަތަރު ޕޮއިންޓް މަދު އަދަދެކެވެ. ގަދަ ހަތަރެއް ނުލިބިއްޖެނަމަ ލިވަޕޫލަށް އަންނަ ސީޒަނުގެ ޗެމްޕިއަންސް ލީގުން ފުރުސަތު ގެއްލޭނެ އެވެ.
ނަމަވެސް ޖެހިޖެހިގެން ފަސް ވަނަ މެޗުން މޮޅުވެ ޓީމުގެ ފޯމު ދަމަހައްޓަމުންދާތީވެ ކޯޗު ޔާގެން ކްލޮޕް ހުރީ ހިތްހަމަޖެހިގެންނެވެ. ބުދަ ދުވަހުރޭގެ މެޗުގައި ސަލާހް ޖެހި ގޯލަކީ ލިވަޕޫލްގެ ދަނޑުކަމަށްވާ އެންފީލްޑްގައި އޭނާ ޖެހި 99 ވަނަ ގޯލެވެ.
ލިވަޕޫލްގެ ކޯޗު ޔާގެން ކްލޮޕް ބުނީ މެޗުގެ ކޮންޓްރޯލް ނެގުނީ ތަންކޮޅެއް ފަހުން ނަމަވެސް އެންމެ މުހިންމީ މޮޅުވުން ކަމަށާއި މިހެންވެ ނަތީޖާއާމެދު ހިތްހަމަޖެހޭ ކަމަށެވެ.
