ހާތާ ބާލިން ބަލިކޮށް ބަޔާން އަލުން އެއް ވަނަ އަށް

ޖަރުމަނު ލީގުގައި ހާތާ ބާލިންއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބަޔާން މިއުނިކް އަލުން ލީގު ތާވަލްގެ އެއް ވަނަ އަށް ޖެހިލައިފި އެވެ.

ބާލިންއާ ދެކޮޅަށް ބަޔާން ނުކުތްއިރު، ލީގު ތާވަލްގެ އެއް ވަނައިގައި އޮތީ ބޮރޫޝިއާ ޑޯޓްމަންޑު އެވެ. އެއީ ލީގުގައި އެންމެ ފަހުން ބޮކުމްއާ ދެކޮޅަށް ޑޯޓްމަންޑުން ކުޅުނު މެޗު އެއްވަރުވުމުން، އެއް ޕޮއިންޓުގެ ލީޑަކުންނެވެ. ލިބުނު ފުރުސަތުގައި އަމިއްލަ ދަނޑުގައި 2-0 އިން ބާލިން ބަލިކޮށް ބަޔާން މި ވަނީ އަނެއްކާ ވެސް އެއް ވަނަ އަށް ޖެހިލައިފަ އެވެ.

އާދިއްތަ ދުވަހުގެ ރޭ ކުޅުނު މެޗުގައި ބަޔާންގެ ދެ ލަނޑު ވެސް ފެނުނީ ދެ ވަނަ ހާފުގަ އެވެ. މެޗުގެ ފުރަތަމަ ހާފުގައި ދެ ޓީމަށް ވެސް ވަނީ ލަނޑު ޖަހާނެ ފުރުސަތު ލިބި ބޭކާރު ވެފަ އެވެ. މެޗުގެ 69 ވަނަ މިނެޓުގައި ބަޔާނަށް ލީޑު ނަގައިދިނީ ސާޖް ގްނަބްރީ އެވެ. ޔޯސުއާ ކިމިކް ހުރަސްކޮށްދިން ބޯޅައެއް ބޮލުން ގޯލަށް ފޮނުވާލައިގެންނެވެ. އޭގެ ދިހަ މިނެޓު ފަހުން ބަޔާނަށް ލީޑު ފުޅާކޮށްދިނީ ކިންގްސްލީ ކޯމަން އެވެ. މި ލަނޑު ޖެހުމަށް ކޯމަން އަށް ވެސް ފުރުސަތު ތަނަވަސްކޮށްދިނީ ކިމިކް އެވެ.

މޮޅާއެކު ބަޔާން އެއް ވަނައިގައި އޮތީ ޕޮއިންޓެެއްގެ ލީޑަކުންނެވެ. ކުޅުނު 30 މެޗުން އެ ޓީމަށް ލިބެނީ 62 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް ވާދަވެރި ޑޯޓްމަންޑަށް ލިބެނީ 61 ޕޮއިންޓެވެ. މިއީ ލީގު ދިފާއު ކުރުމަށް މަސައްކަތް ކުރާ ބަޔާނަށް ހަމަޖެހިލެވޭނެ ވަރުގެ ލީޑެެއް ނޫނެވެ.