ދިރާގަށް މޮބައިލް މަނީގެ ލައިސަންސް

ރާއްޖޭގެ މާލީ މައި އިދާރާ ކަމަށްވާ މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ދިރާގަށް މޮބައިލް މަނީގެ ހިދްމަތް ދިނުމުގެ ލައިސަންސް ދޫކޮށްފި އެވެ.

ދިރާގުން ބުނީ މޮބައިލް މަނީގެ ހިދްމަތް ދިނުމުގެ ލައިސަންސް ދިރާގަށް ދޫކޮށްފައިވަނީ މިހާރު ހިނގަމުންދާ މޯލްޑިވްސް ފައިނޭންޝަލް އެކްސްޕޯ ހުޅުވުުގެ ރަސްމިއްޔާތުގެ ތެރެއިން ކަމަށެވެ. އެ ރަސްމިޔާތުގައި އެމްއެމްއޭގެ ފަރާތުން ދިރާގަށް އެ ލައިސަންސް ހަވާލުކޮށްދެއްވީ އެމްއެމްއޭގެ ގަވަރުނަރ އަޒީމާ އާދަމް އެވެ. ދިރާގުން އެ ލައިސަންސާ ހަވާލުވެ ލެއްވީ ދިރާގުގެ ސީއީއޯ އަދި މެނޭޖިންގ ޑިރެކްޓަރ އިސްމާއީލް ރަޝީދު އެވެ.

ފައިނޭންޝަލް އެކްސްޕޯގައި ދިރާގު މޮބައިލް މަނީގެ ހިދްމަތާ ގުޅޭ މައުލޫމާތު ދީ އަދި އެކަމާގުޅޭ ބައެއް މައުލޫމާތު ހިއްސާކުރި އެވެ.

ދިރާގުން ބުނީ މި ލައިސަންސް ލިބުމާއި ގުޅިގެން އެ ހިދްމަތް ރައްޔިތުންނަށް ފޯރުކޮށްދިނުމަށްޓަކައި ވާންޖެހޭ ތައްޔާރީތައް ވަމުންދާ ކަމަށެވެ.

މޯބައިލް މަނީގެ ހިދުމަތަކީ ވޮލެޓުގައި ފައިސާ ގެންގުޅުމުގެ ބަދަލުގައި ފޯނު މެދުވެރިކޮށް ފައިސާގެ މުއާމަލާތް ކުރުމާއި ފޯނު މެދުވެރިކޮށް ވިޔަފާރީގެ މުއާމަލާތް އަދާކުރެވޭ ޚިދުމަތެކެވެ.

ދިރާގުން ދޭ މޮބައިލް މަނީގެ ހިދްމަތަށް ކިޔަނީ "ދިރާގު ޕޭ" އެވެ. ދިރާގު އެކަމަށް ހާއްސަ މޯބައިލް އެޕްލިކޭޝަނެއް ތައާރަފު ކުރުމުގެ މަސައްކަތް ދަނީ ކުރަމުންނެވެ.