ފީއަލީ އެކުވެރި ޒުވާނުންގެ ގުޅުން (ފެޒްގ) އިން އިން އިންތިޒާމުކޮށްގެން ބޭއްވި އަންހެން ހޭންޑުބޯޅަ މުބާރާތުގެ ޗެމްޕިއަންކަން ލެޖެންޑްސް އިން ހޯދައިފި އެވެ.

މުބާރާތުގެ ޗެމްޕިއަންކަން ލެޖެންޑްސް އިން ހޯދީ ފައިނަލްގައި ވިނަރެސްގެ މައްޗަށް ކުރި ހޯދައިގެންނެވެ. ލެޖެންޑްސް އިން ވަނީ ފަސް ލަނޑު ތިން ލަނޑުން ވިނަރެސްގެ މައްޗަށް ކުރި ހޯދައިފަ އެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީ ލެޖެންޑްސްގެ އައިޝަތު އާޔާ މުޙައްމަދު އެވެ. ހަތަރު ޓީމު ވާދަކުރި މުބާރާތް ކުރިއަށް ގެންދިޔައީ ކޮންމެ ޓީމެއް ކޮންމެ ޓީމަކާ ވާދަކުރުމަށްފަހު، ޕޮއިންޓު ތާވަލްގެ އެއް ވަނަ ޓީމާއި، ދެ ވަނަ ޓީމު ފައިނަލަށް ދާ ގޮތަށެވެ. މުބާރާތުގައި ކުޅުނު ތިން މެޗުގެ ތެރެއިން ދެ މެޗުން މޮޅުވެ، އެއް މެޗުން އެއްވަރުވެގެން ޕޮއިންޓު ތާވަލްގެ އެއް ވަނަ ހޯދީ ވެސް ލެޖެންޑްސް އެވެ. ތާވަލްގެ ދެ ވަނަ ވިނަރެސް އިން ހޯދީ ކުޅުނު ތިން މެޗުގެ ތެރެއިން ދެ މެޗުން މޮޅުވެ، އެއް މެޗުން ބަލިވެގެންނެވެ. ޕޮއިންޓު ތާވަލްގެ ތިން ވަނަ އަށް ވީ ކިންގް ދިޔައީ ކުޅުނު އެެއް މެޗުން އެއްވަރުވެ، އަނެއް ދެ މެޗުން ބަލިވެގެންނެވެ. ތާވަލްގެ ފުލަށް ދިޔަ ވިންގްސް ވަނީ ކުޅުނު ހުރިހާ މެޗަކުން ވެސް ބަލިވެފަ އެވެ.

މުބާރާތުގެ އެންމެ މޮޅު ހަތަރު ކުޅުންތެރިންނަށް ހޮވުނީ ޗެމްޕިއަން ލެޖެންޑްސްގެ ލީމް އަޙުމަދު، ވިނަރެސްގެ ރިވާ ޖަލީލު، އައިމިނަތު ސިރާޖާ އަދި ވީ ކިންގުގެ އީޝަލް އަލީ އެވެ. މުބާރާތުގެ 19 އަހަރުން ދަށުގެ އެންމެ މޮޅު ކުޅުންތެރިޔަކަށް ހޮވުނީ ޗެމްޕިއަންސް ލެޖެންޑްސްގެ އާޔާ އެވެ. އެންމެ މޮޅު ކޯޗަކަށް ހޮވުނީ ލެޖެންޑްސްގެ އަލީ ޒާހިރު އެވެ.

މިއީ ފެޒްގ އިން އިސް ނަގައިގެން އެ ޖަމިއްޔާގެ އަންހެން މެމްބަރުންނަށް ޚާއްސަކޮށްގެން ބޭއްވި މުބާރާތެކެވެ. އަދި މިއީ ފ.ފީއަލީގައި ހޭންޑުބޯޅަ މުބާރާތެއް ވާދަވެރި ގޮތެއްގައި ބޭއްވި ފުރަތަމަ ފަހަރެވެ. އެ ރަށުން ވަނީ މިއަހަރު އޮތް އިންޓަ ސްކޫލް ހޭންޑް ބޯޅަ މުބާރާތުގައި ވެސް ވާދަކޮށް، ރަނގަޅު ނަތީޖާއެއް ހޯދައިފަ އެވެ. މީގެ އިތުރުން ފެޒްގ އިން ވަނީ ފިތުރު އީދާ ގުޅުވައިގެން ފިރިހެން ވޮލީ ބޯޅަ މުބާރާތެއް ވެސް ބާއްވައިފަ އެވެ. ކުރިއަށް އޮތް ޢަޟްޙާ ޢީދުގައި ވެސް އެ ޖަމިއްޔާ އިން ކުޅިވަރު މުބާރާތްތަކެއް ބާއްވާނެ ކަމަށް ފެޒްގ އިން މައުލޫމާތުދެ އެވެ.