ފާއިތުވި އަހަރު އެކަނި ވެސް 13،000 އަށް ވުރެ ގިނަ ޖިނާއީ މައްސަލަތައް ފުލުހުން ތަހުގީގުކޮށްފައިވާކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.

ފުލުހުންގެ 90ވަނަ އަހަރީ ދުވަސް ފާހަގަކުރުމުގެ ރަސްމިއްޔާތުގައި ވާހަކަދައްކަވަމުން ކޮމިޝަނަރ ވިދާޅުވީ ކޮންމެ އަހަރަކުވެސް މަސްތުވާތަކެތީގެ ވަބާގެ ތެރެއަށް އަލަށް ވަންނަ މީހުންގެ އަދު އުޅެނީ 400 އާއި 500އާ ދެމެދުގައި ކަމަށެވެ. އެ ވަބާގެ ތެރެއަށް އެކި އުމުރު ފުރައިގެ މީހުން ވަންނަމުންދާ ކަމަށް ވެސް ސީޕީ ވަނީ ވިދާޅުވެފައެވެ. އަދި މިއީ ކަންބޮޑުވެ ވަޑައިގަންނަވާ ކަމެއްކަން ފާހަގަކުރައްވާ ސީޕީ ވިދާޅުވީ އެފަދަ ކަންކަން ހައްލުކުރުމަށް ފުލުހުންގެންދަނީ އިދާރާތަކާއި އެކުގައި މަސައްކަތްކުރަމުން ކަަމަށެވެ.

ސީޕީ ހަމީދު ވިދާޅުވީ ޚިދުމަތުގައި 90 ވަރަކަށް އަހަރުވެފައި ވީނަމަވެސް ފުލުހުންނަށް ޤާނޫނީ ހައިސިއްޔަތެއް ލިބިފައި ވަނީ ދާދި ފަހުން ކަމަށެވެ. ޒަމާނީ ވަސީލަތްތަކާއި އުކުޅުތަކާއި އެކު ރައްޔިތުންނާއި ގާތުން ޚިދުމަތް ދިނުމަށް ފުލުހުން މަސައްކަތް ކުރާ ކަމަށް އޭނާ ވިދާޅުވިއެވެ. ފުލުހުންގެ ޚިދުމަތުން އާއްމުންނަށް ކޮށްދެވެނީ ކޮން ކަމެއްތޯ ސުވާލުކުރަން ޖެހޭ ކަމަށް ވެސް ސީޕީ ވިދާޅުވިއެވެ. ސަލާމަތާއި ރައްކާތެރިކަމާއި، ދާހިލީ ހަމަޖެހުމާއި ގުޅުން ހުރި ގިނަ މަސައްކަތްތަކެއް ފުލުހުން ދަނީ ކުރަމުން ކަމަށް ސީޕީ ވިދާޅުވިއެވެ.

އެއްވެސް ޤައުމަކުން އެއްކޮށް ކުށް ނައްތާލުމަކީ ކުރެވޭނެ ކަމެއް ނޫން ކަމަށާއި، ކުށް މަދު ކުރުމަށް ފުލުހުން ގިނަ މަސައްކަތްތަކެއް ކުރާ ކަމަށް ވެސް ސީޕީ ވިދާޅުވިއެވެ. ފުލުހުންނަކީ އެކި ބަދަލުތަކަށް ހޭލުންތެރި ބަޔަކަށް ވާން ޖެހޭ ކަމަށާއި އާއްމުންގެ އިތުބާރު ހޯދުމަށް ދެމިގެންދާ ޚިދުމަތްތަކެއް ކުރުން މުހިންމު ކަމަށް ސީޕީ ހަމީދު ވިދާޅުވިއެވެ.