ދުނިޔޭގެ އެކި ހިސާބުތަކުގައި އޭނާގެ ލޭ ހިއްސާ ކުރާ 600 އެއްހާ ދަރިންގެ ބައްޕަގެ މައްޗަށް ކޯޓު ޢަމުރެއް!
29 އެޕްރީލު 2023 | ހޮނިހިރު 10:54ޢަމުރާ ޚިލާފުވާ ކޮންމެ ފަހަރަކު، 1 ލައްކަ ޔޫރޯ ނުވަތަ 1 ލައްކަ 10 ހާސް އެމެރިކާ ޑޮލަރުން އޭނާ ޖޫރިމަނާ ކުރެވޭނެ
އެސްޓަރ ޑި ލޯ؛ ބޯޑް މެންބަރު
ދުނިޔޭގެ އެކި ކަންކޮޅުތަކަށް ދަރިފަނި ހަދިޔާ ކުރަމުން ދިޔަ މީހެއްގެ މައްޗަށް، ނެދަލަންޑްސްގެ ކޯޓަކުން، އެކަން އެގޮތަށް ނުކުރުމަށް އަންގާ ޢަމުރު ކޮށްފިއެވެ.
ކޯޓުގެ ފަނޑިޔާރުން ވިދާޅުވި ގޮތުގައި ދަރިފަނި ހަދިޔާ ކުރަމުން ދިޔަ މީހާގެ ދަރިންގެ ޢަދަދު އުޅެނީ 500 އާއި 600 އާ ދެމެދުގައެވެ. އެނާގެ ދަރިން ވަނީ ދުނިޔޭގެ އެކި ކަންކޮޅުތަކަށް ފެތުރިފައެވެ. ޓެލެގްރާފް ނޫހާ ހަވަލާދީ ރޮއިޓާޒްއިން ރިޕޯޓް ކޮށްފައި ވާ ގޮތުގައި ދަރިފަނި ހަދިޔާކޮށް އެތައް ސަތޭކަ ދަރިންނެއްގެ ބައޮލޮޖިކަލް ބައްޕަގެ މަޤާމުގައި ހުރި އެމީހަކީ ނެދަލަންޑްސްގެ ރައްޔިތެކެވެ. ޖޮނަތަން މޭޔާގެ ނަމުން މީޑިއާގައި މުޚާތަބު ކުރާ އެމީހާގެ ޢުމުރުން ވީ އަދި އެންމެ 41 އަހަރު ކަމަށްވެސް މަޢުލޫމާތު ލިބެއެވެ.
މޭޔާގެ މައްޗަށް ކޯޓުން ނެރުނު ޢަމުރުގައި ބުނެފައި ވަނީ ކުލިނިކުތަކަށް ދަރިފަނި ހަދިޔާ ކުރުން އޭނާގެ މައްޗަށް މިހިނދުން ފެށިގެން މަނާ ކޮށްފައި ވާ ކަމަށެވެ. އަދި ޢަމުރާ ޚިލާފުވާ ކޮންމެ ފަހަރަކު، 1 ލައްކަ ޔޫރޯ ނުވަތަ 1 ލައްކަ 10 ހާސް އެމެރިކާ ޑޮލަރުން އޭނާ ޖޫރިމަނާ ކުރެވޭނެ ކަމަށްވެސް ޢަމުރުގައި ބަޔާން ކޮށްފައި ވެއެވެ.
މިހާތަނަށް އޭނާ ދަރިފަނި ހަދިޔާ ކޮށްފައި ވާ ކުލިނިކުތަކުގައި އަދި ބޭނުން ނުކޮށްހުރި ދަރިފަނީގެ ސްޓޮކް ނައްތާލުމަށް، އެ ކުލިނިކުތަކަށް ލިޔުމަކުން އެންގުމަށްވެސް މޭޔާގެ މައްޗަށް ކޯޓުން ވަނީ ޢަމުރު ކޮށްފައެވެ. ނަމަވެސް، މޭޔާގެ ދަރިފަނި ބޭނުންކޮށްގެން ދަރިން ހޯދާފައިވާ ޢާއިލާތަކަށް ރިޒާވްކޮށްފައި ވާ ދަރިފަނީގެ ސްޓޮކް ވަނީ އިސްތިސްނާ ކޮށްފައެވެ.
މޭޔާގެ މައްޗަށް މިފަދަ ކޯޓު ޢަމުރެއް ނެރެފައި ވަނީ އޭނާގެ ދަރިފަނި ބޭނުންކޮށްގެން ދަރިން ހޯދި މީހުންގެ ފަރާތުން ކޯޓަށް ހުށަހެޅި މަދަނީ މައްސަލައަކާ ގުޅިގެންނެވެ. އެ ދަޢުވާގައި ބުނެފައި ވަނީ، މޭޔާ ދަރިފަނި ހަދިޔާ ކުރަމުން ދިއުމުގެ ސަބަބުން، އެ ދަރިފަނިން އުފަންވާ ދަރިންގެ ޒާތީ ދިރިއުޅުމަށް ހުރަސްތަކެއް އެޅެމުން ދާ ކަމަށެވެ. އަދި އެކުދިންނަށް ލޯބީގެ ގޮތުން އެހެން މީހަކާ ގުޅުމުގެ މިނިވަންކަމަށް ހުރަސް އެޅޭ ކަމަށާ، އެހެނީ، ލޭގެ ގުޅުން އޮތް މީހަކާއެކު އެފަދަ ގުޅުމެއް ހިންގިދާނެ ކަމުގެ ބިރު އޮތުން ކަމަށްވެސް ދަޢުވާގައި ފާހަގަ ކޮށްފައިވެއެވެ.
ދަޢުވާ ހުށަހެޅި ފަރާތުން ވަނީ، ދަރިފަނި ހަދިޔާ ކުރި މީހުންގެ ޤައުމީ އަދި ބައިނަލްއަޤުވާމީ ޑޭޓާބޭސްއެއް، ނެދަލަންޑްސްގެ ސަރުކާރުން އެކުލަވާލަން ޖެހޭނެ ކަމަށް ބުނެފައެވެ.
އެތައް ބަޔަކަށް މޭޔާ ދަރިފަނި ހަދިޔާ ކުރަމުން ދާ މައްސަލަ އެންމެ ފުރަތަމަ ފެންމަތިވީ 2017 ވަނަ އަހަރުގެ ތެރޭގައެވެ. ދަރިމައިވުމާ ގުޅޭ ނެދަލަންޑްސްގެ ކުލިނިކުތަކަށް މޭޔާ ދަރިފަނި ހަދިޔާ ކުރަމުން ދިޔަ އިރު، އޭރު އޭނާއަށް 100 އަށް ވުރެ ގިނަ ދަރިން ވަނީ ލިބިފައެވެ. އޭރުވެސް އެކަން އެގޮތަށް ނުކުރުމަށް މޭޔާގެ މައްޗަށް ވަނީ ޢަމުރު ކޮށްފައެވެ. ނަމަވެސް އޭނާ ދިޔައީ ބޭރުގެ އެކި ކުލިނިކުތަކަށްވެސް ދަރިފަނި ހަދިޔާ ކުރަމުންނެވެ. ބައެއް ހާލަތްތަކުގައި އޭނާ ދަރިފަނި ހަދިޔާ ކޮށްފައި ވަނީ ނަންވެސް އޮޅުވާލައިގެންނެވެ.
މިކަމާ ބެހޭ ގޮތުން އެއްޗެއް ބުނުމަށް މޭޔާ ވަނީ އިންކާރުކޮށްފައެވެ. ޒަވާޖީ ޙަޔާތެއްގެ ބޭރުން ދަރިން ހޯދުމަކީ އެއްވެސް ހާލެއްގައި އިސްލާމް ދީން ހުއްދަ ކުރާ ކަމެއް ނޫނެވެ. އަސްލާއި ނަސްލު ސަލާމަތްކޮށް، އިންސާނީ ކަރާމާތާ ޙައްޤުތައް ހިމާޔަތް ކުރުމަށްޓަކާ، އިސްލާމް ދީން ދައްކައިދީފައިވާ ސީދާ މަގުގައި ސާބިތުވެ ތިބުމަކީ، މިފަދަ ހުރިހާ ކަމަކުން ނަފުސު ސަލާމަތްކޮށްދޭނެ ކަމެކެވެ.
