ފައިނަލަށް އިންޓަމިލާނާއި ފިއޮރެންޓީނާ
ފައިނަލް މެޗު އޮންނާނީ އަންނަ މަހުގެ 24 ވަނަ ދުވަހު ރޯމްގައި
ފިއޮރެންޓީނާ އާއި ކްރެމެނީސް ކުޅުނު މެޗުގެ ތެރެއިން
އިޓާލިއަން ކަޕްގައި ފައިނަލުގައި އިންޓަމިލާނާ ވާދަކުރާނެ ޓީމަކަށް ފިއޮރެންޓީނާ ހޮވިއްޖެ އެވެ.
އެ ޓީމު ފައިނަލަށްދިޔައީ ކްރެމެނީސް ރޭ ވާދަކުރި މެޗު 2-0އިން ކާމިޔާބުކޮށްގެންނެވެ.
މަދު ފުރުސަތުތަކެއް ލަނޑު ޖަހަން ލިބުނު މެޗުގައި ފިއޮރެންޓީނާ އަށް ގޯލު ޖަހައިދިނީ ކަބްރަލް އާއި ގޮންޒާލޭޒް އެވެ.
ފިއޮރެންޓީނާ ވަނީ މީގެ ކުރިން ހަ ފަހަރެއްގެ މަތީން މި މުބާރާތް ކާމިޔާބުކޮށްފަ އެވެ. އަނެއްކޮޅުން އެ ޓީމަށް ބޮޑު މުބާރާތަކުން ތައްޓެއް އެންމެ ފަހުން ލިބުނީ 2001ގަ އެވެ.
ފައިނަލްގައި ވާދަކުރާ އެންމެ ފަހުގެ ޗެމްޕިއަން އިންޓަމިލާން ފައިނަލަށް ދިޔައީ ބުދަ ދުވަހުގެ ރޭ ކުޅުނު ސެމީ ފައިނަލް މެޗުގައި ޔުވެންޓަސް ބަލިކޮށްގެންނެވެ. އިންޓަމިލާން ވަނީ މި މުބާރާތް އަށް ފަހަރު ކާމިޔާބުކޮށްފަ އެވެ.
ފައިނަލް މެޗު އޮންނާނީ އަންނަ މަހުގެ 24 ވަނަ ދުވަހު ރޯމްގެ އޮލިމްޕިކް ސްޓޭޑިއަމްގަ އެވެ.
