ވެމްކޯއިން ބިން ލައިނަރ ވިއްކަން ފަށައިފި
ޑަސްބިން ކޮތަޅު މިހާރު މާލެއިން ލިބެން ހުންނާނީ މަޖީދީ މަގު ލަގްޒަރީ ފިހާރައާއި ސޯސަން މަގު، ތޫރި ފިހާރައާއި އަދި އަލިކިލެގެފާނު މަގުގައި ހުންނަ އެޗްސީޔޫ މާޓުން
ވެމްކޯ މުވައްޒަފުން ކުނި ނެގުމުގެ މަސައްކަތުގައި
ވޭސްޓް މެނޭޖްމަންޓް ކޯޕަރޭޝަން (ވެމްކޯ)އިން ޑަސްބިން ކޮތަޅު ވިއްކަން ފަށައިފިއެވެ.
ކުނި މެނޭޖް ކުރުމުގެ ގާނޫނުގެ ދަށުން، މި މަހުގެ 18 ވަނަ ދުވަހުން ފެށިގެން ޕްލާސްޓިކް ކޮތަޅުން ދެ ރުފިޔާ ނަގަން ވަނީ ފަށައިފައެވެ. އެއާއެކު އާންމުންގެ އެންމެ ބޮޑު ޝަކުވާއަކަށް ވެގެންގޮސްފައިވަނީ ކުނި އަޅާ ކޮންމެ ކޮތަޅަކަށް 2 ރުފިޔާ ދައްކަންޖެހޭތީއެވެ. ނަމަވެސް ގާނޫނު ބުނާގޮތުން، ޕްލާސްޓިކް ކޮތަޅުން ދެ ރުފިޔާގެ ފީއެއް ނެގިނަމަވެސް، ކުނި މެނޭޖްކުރުމާ ގުޅޭ އިދާރާއިން ފޯރުކޮށްދޭ ބިންލައިނަރއިން ފީ ނެގުން އިސްތިސްނާވާނެއެވެ. އަދި ރޯ މަސް އެޅުމަށް ބޭނުންކުރާ ކޮތަޅުންނާއި ޑިއުޓީ ފްރީ ފިހާރަތަކުން ދޫކުރާ ކޮތަޅުންވެސް ދެ ރުފިޔާގެ ފީ ދައްކާކަށް ނުޖެހެއެވެ.
ވެމްކޯއިން ބުނީ އެ ކުންފުނީގެ ކަސްޓަމާ ފްރަަންޓް އޮފީސްތަކުން ކޮތަޅު ވިއްކަން ފަށައިފައިވާ ކަމަށެވެ. އަދި, މާލޭގެ ވޭސްޓް ޓްރާންސްފާ ސްޓޭޝަންތަކާއި، ކަސްޓަމާ ފްރަންޓް އޮފީސްތަކުން ވެސް ކޮތަޅު ބޮނޑިތައް ލިބެން ހުންނާނެ ކަމަށް ވެމްކޯއިން ބުނެއެވެ. މީގެއިތުރުން ވެމްކޯގެ ވެބްސައިޓް މެދުވެރިކޮށް ކޮތަޅަށް އެދި އޯޑަރުވެސްކުރެވޭނެއެވެ.
ޑަސްބިން ކޮތަޅު މިހާރު މާލެއިން ލިބެން ހުންނާނީ މަޖީދީ މަގު ލަގްޒަރީ ފިހާރައާއި ސޯސަން މަގު، ތޫރި ފިހާރައާއި އަދި އަލިކިލެގެފާނު މަގުގައި ހުންނަ އެޗްސީޔޫ މާޓުންނެވެ. މީގެއިތުރުން ހުޅުމާލެއިން ކޮތަޅު ލިބެން ހުންނާނީ ހުވަނދުމާ ހިނގުމުގައި ހުންނަ ފަހި ޕްލާޒާއިންނެވެ.
ވެމްކޯއިން ދެ ކުލައެއްގެ ކޮތަޅު ވިއްކާނެއެވެ. އެއީ ކަޅުކުލައާއި ފެހިކުލައިގެ ކޮތަޅެވެ. ކުނި އުކާލުމުގައި، ކުނިވާ ޒާތުގެ ކުނި ނުވަތަ އަމިއްލައަށް ފަނާވެދާ ޒާތުގެ ކުނި، ފެހި ކޮތަޅުގައި ބަންދުކުރުމަށާއި، އަދި އެހެނިހެން ކުނި ކަޅު ކޮތަޅުގައި ބަންދުކުރުމަށް ވެމްކޯއިން އެދެއެވެ. ވެމްކޯއިން ވިއްކަނީ އާއްމު ސައިޒު ނުވަތަ L ސައިޒު [17 އިންޗީ ދިގު] ގެ ބޮނޑިއެއްގައި 100 ކޮތަޅު އޮންނާނެއެވެ. އޭގެ އަގަކީ 35ރ އެވެ. ސައިޒު XXL [27 އިންޗި ދިގު]ގެ 100 ކޮތަޅު ބޮނޑިއާއި XXXL [48 އިންޗީގެ] ގެ 50 ކޮތަޅު ބޮނޑި ވިއްކަން ހަމަޖައްސާފައިވަނީ 165ރ އަށެވެ.
އަދި ވެމްކޯއިން ތައާރަފުކުރާ ކޮތަޅު ހަމައެކަނި ކުނި އުކާލުމުގައި ބޭނުންކުރުމަށްވެސް ވަނީ އިލްތިމާސްކޮށްފައެވެ.
