މޯލްޑިވްސް އޯޕަން ކާމިޔާބު ކުރީ ކޯ ޕިން ޗަން

ރާއްޖޭގައި ކުރިއަށް ގެންދިޔަ މޯލްޑިވްސް އޯޕަން 10 ބޯލް ޗެމްޕިއަންޝިޕްގެ ޗެމްޕިއަންކަން ކޯ ޕިން ޗަން ހޯދައިފި އެވެ.

ކޯ ޕިން ޗަން މުބާރާތުގެ ޗެމްޕިއަންކަން ހޯދީ ބުދަ ދުވަހުގެ ރޭ ކުޅުނު ފައިނަލްގައި ޔޯހާން ޗުއާ ބަލިކޮށްގެންނެވެ. އޭނާ މެޗު ކާމިޔާބުކޮށްފައި ވަނީ 10-8 ގެ ފްރޭމަކުންނެވެ. މުބާރާތުގެ ތިން ވަނަ ހޯދީ ލުއޮންގް ޑުކް ތިއެން އަދި ޖޯޝުއާ ފިލާ އެވެ. ފައިނަލް މެޗު ޝަރަފުވެރިކޮށްދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އެވެ. ފައިނަލް މެޗަށްފަހު ރައީސް ޞާލިޙު ވަނީ މުބާރާތް ނިންމުމުގެ ރަސްމިއްޔާތުގައި ބައިވެރިވެ ވަޑައިގެން، ވަނަ ވަނަ އަށް ދިޔަ ކުޅުންތެރިންނަށް އިނާމު ހަވާލުކޮށްދެއްވައިފަ އެވެ.

މިއީ ރައްޖޭގައި ބިލިއާޑްގެ ބައިނަލްއަޤުވާމީ މުބާރާތެއް ބޭއްވި ފުރަތަމަ ފަހަރެވެ. މުބާރަތުގައި ދިވެހި ކުޅުންތެރިން ވެސް ވަނީ ކާމިޔާބުތަކެއް ހޯދައިފަ އެވެ. މުބާރާތުގެ ގްރޫޕް ސްޓޭޖުގެ ކުޅުމުން ރާއްޖޭގެ ޙުސެއިން ޝާޒް، މުހައްމަދު ޝަރީފް، އަހުމަދު ޝިހާދު، އިސްމާއިލް ޖީހާން އަދި ހަސަން ޝާޒް މުޙައްމަދު ވަނީ ކާމިޔާބުކޮށްފަ އެވެ. މީގެ ތެރެއިން ޝާޒްް ވަނީ މުބާރާތުގެ ނޮކްއައުޓް ބުރުން ވެސް ޖާގަ ހޯދައިފަ އެވެ.

މުބާރާތުގައި ވަނީ ޖުމުލަ 64 ކުޅުންތެރިން ވާދަކޮށްފަ އެވެ. އޭގެ ތެރެއިން 16 ކުޅުންތެރިންނަކީ ދުނިޔޭގެ ރޭންކިންގެ ކުރީގައި ކުޅޭ ކުޅުންތެރިންނެވެ. މީގެ އިތުރުން ރާއްޖޭގެ 16 ކުޅުންތެރިން ވެސް ވަނީ ވާދަކޮށްފަ އެވެ. ބާކީ 32 ކުޅުންތެރިންނަކީ އެކި އެކި ޤައުމުގެތަކުގެ މަތީ ފަންތީގެ ކުޅުންތެރިންނެވެ. މި މުބާރާތަކީ ދުނިޔޭގެ ރޭންކިންގެ އިތުރުން އޭޝިއާގެ ރޭންކިން އަށް ޕޮއިންޓު ލިބޭ މުބާރާތެވެ.