އަލް ވެހްދާ އަތުން ބަލިވެ، ކިންގް ކަޕުން އަލް ނަސްރު ކަޓައިފި

ސައުދީ ކިންގް ކަޕް އޮޗް ޗެމްޕިއަންސްގެ ސެމީ ފައިނަލްގައި އަލް އެހްދާ އަތުން ބަލިވެ، އަލް ނަސްރު މުބާރާތުން ކަޓައިފި އެވެ.

ހޯމަ ދުވަހުގެ ރޭ ކުޅުނު މެޗުގައި އަލް އެހްދާ އިން އަލް ނަސްރުގެ މައްޗަށް ކުރި ހޯދީ 1-0 އިންނެވެ. މެޗު ފަށައިގެން ދެ ޓީމުން ވެސް ވަނީ ލަނޑު ޖެހުމަށް މަސައްކަތްކޮށްފަ އެވެ. އަލް އެހްދާގެ އަންސެލްމޯ، ޢަބްދުލް ކަރީމް ޔޮޑާ އަށް ލިބުނު ފުރުސަތުގެ ބޭނުން އެންމެ ރަނގަޅު ގޮތުގައި ނުހިފުނެވެ. އަލް ނަސްރަށް ކުޅެމުން އަންނަ ބްރެޒިލްގެ ޓަލިސްކާ އަށް ވެސް ވަނީ ލަނޑު ޖެހުމަށް ރަނގަޅު ފުރުސަތު ލިބި، ބޭކާރުވެފަ އެވެ. އޭގެ ފަހުން އެ ޓީމަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ފޮނުވާލި ހަމަލާ ވެސް ގޯލަށް އަމާޒުވެފައެއް ނުވެ އެވެ. މެޗުގައި އަލް ނަސްރަށް ލީޑު ނެގުމަށް ވެސް އެންމެ އެކަށީގެންވާ ފުރުސަތެއް ލިބުނީ ރޮނާލްޑޯ އަށެވެ. އަރިމަތިން ގިސްލައިން ކޮނާން ހުރަސްކޮށްދިން ބޯޅައެއް، އަލް ވެހްދާގެ އޭރިޔާ ތެރޭ ހުރެ ބޮލުން ފޮނުވާލުމަށް ރޮނާލްޑޯ މަސައްކަތް ކުރި ނަމަވެސް އެ ޓީމުގެ ގޯލް ކީޕަރު މުނީރް ވަނީ ހުށިޔާރުކަމާއެކު މަތަކޮށްފަ އެވެ. މެޗުގައި އަލް އެހްދާ އިން ލަނޑު ޖަހައި ލީޑު ނެގީ 23 ވަނަ މިނެޓުގަ އެވެ. އެއީ އަލް ނަސްރުގެ އޭރިޔާ ތެރެއިން ބޯ މައްޗަށް ލިބުނު ބޯޅައެއްގައި ބައިސިކަލް ކިކަކުން ބޯޅަ ގޯލަށް ވައްދާލައިގެންނެވެ.

މެޗުން ބަލިވެ އަލް ނަސްރު ކިންގް ކަޕުން ކެޓިއިރު، އަލް ވެހްދާ އޮތީ ސައުދީ ޕްރޯ ލީގުގެ 13 ވަނައިގަ އެވެ. އަނެއްކޮޅުން އެ ޓީމަށް ވަނީ ސައުދީ ޕްރޯ ލީގުގެ އެއް ވަނަ މަގާމު ވެސް ގެއްލިފަ އެވެ. ކުޅުނު 24 މެޗުން އެ ޓީމަށް ލިބެނީ 53 ޕޮއިންޓެވެ. ނަމަވެސް އަލް ނަސްރަށްވުރެ އެއް މެޗު މަދުން ކުޅެގެން އެއް ވަަނައިގައި އޮތް އަލް އިއްތިހާދަށް ލިބެނީ 56 ޕޮއިންޓެވެ. މެެޗުގެ ގޮތުން އަލް ނަސްރާ އެއްވަރުކޮށް، އެއް ވަނައިގައި ލީޑު ނެގުމުގެ ފުރުސަތު ވެސް އަލް އިއްތިހާދަށް އެބަ އޮތެވެ.