އިނގިރޭސި އެފްއޭކަޕް ފައިނަލްގައި މެންޗެސްޓަރ ސިޓީއާއި މެންޗެސްޓަރ ޔުނައިޓެޑް ވާދަކުރަން ޖެހިއްޖެއެވެ.

ފައިނަލްގެ ދެވަނަ ޖާގަ މެންޗެސްޓަރ ޔުނައިޓެޑުން ހޯދީ ސެމީފައިނަލްގައި ޕެނަލްޓީ ޖަހައިގެން ބްރައިޓަންގެ މައްޗަށް ކުރިހޯދައިގެންނެވެ. ސެމީފައިނަލް މެޗުގެ ފުރިހަމަ ވަގުތު ހަމަވީ ދެޓީމްގެ ކުރެ ޓީމަކަށް ލަނޑެއް ނުޖެހިއެވެ. ނަތީޖާ ނެރުމަށް ކުޅުނު އިތުރު ވަގުތުގައިވެސް ނަތީޖާއަށް ބަދަލެއް ނައުމުން ޖެހި ޕެނަލްޓީގައި މެންޗެސްޓަރ ޔުނައިޓެޑުން ކުރިހޯދީ 7-6 ނެވެ. ދެޓީމުންވެސް ފުރަތަމަ ފަސް ޕެނަލްޓީ ކާމިޔާބުކުރިއެވެ. އަދި ހަވަނަ ޕެނަލްޓީވެސް ކާމިޔާބުކުރިއެވެ. ބްރައިޓަންއަށް ނާކާމިޔާބުވީ ސޮލީ މާޗް ޖެހި ހަތްވަނަ ޕެނަލްޓީއެވެ. އޭނާއަށް ޕެނަލްޓީ ފޮނުވާލެވުނީ ހުރަސް ދަނޑި މަތިން ބޭރަށެވެ. ޔުނައިޓެޑުން ވަނީ ހަތް ޕެނަލްޓީވެސް ކާމިޔާބުކޮށްފައެވެ. ޔުނައިޓެޑަށް ފައިނަލް ޔަޤީންކޮށްދިން ޕެނަލްޓީ ކާމިޔާބުކުރީ ވިކްޓަރ ލިންޑެލޯފްއެވެ.

މިއީ ކޯޗު އެރިކް ޓެން ހާގާއެކު ޔުނައިޓެޑް ދަތުރުކުރި ދެވަނަ ފައިނަލެވެ. ފެބްރުއަރީ މަހު ޔުނައިޓެޑުން ވަނީ ކަރަބާއޯ ކަޕް ކާމިޔާބުކޮށްފައެވެ. މެންޗެސްޓަރ ޑާބީގެ ވާދަވެރި ފައިނަލް މެޗު ކުޅޭނީ ޖޫން މަހުގެ ތިންވަނަ ދުވަހުއެވެ. މެންޗެސްޓަރ ސިޓީ ފައިނަލުން ޖާގަހޯދީ 3-0 ން ޝެފީލްޑް ޔުނައިޓެޑް ބަލިކޮށްގެންނެވެ.