ފިތުރު އީދު ކުޑަގިރި ޕިކްނިކް އައިލެންޑްގައި ކުލަގަދަކޮށް ފާހަގަކުރުމަށް އަރބަންކޯއިން ނިންމައިފިއެވެ.

ކުޑަގިރި ޕިކްނިކް އައިލެންޑުގައި މިފަހަރު ޢީދު ފާހަގަކުރުމަށް ހަމަޖައްސާފައި ވަނީ ކުޑަގިރި ޢީދު ފެސްޓުގެ ނަމުގައެވެ. ހުރިހާ ޢުމުރެއްގެ މީހުންނަށްވެސް ބައިވެރިވެވޭ ގޮތަށް އީދު ދުވަހުގެ ހެނދުނުން ފެށިގެން ރޭގަނޑާ ހަމައަށް ތަފާތު އެކި ޙަރަކާތްތައް ހިންގުމަށް ވަނީ ރާވާފައެވެ. މި ޙަރަކާތްތަކުގައި ބައިވެރިވުމަށް އެ ދުވަހުގެ ހެދުނު 8:30 އިން ފެށިގެން އިރުއޮއްސި 7:30 އާ ހަމައަށް ކުޑަގިރިއަށް ހިލޭ އަރާ ފޭބޭނެއެވެ. އަރބަންކޯއިން ބުނާގޮތުގައި އީދު ފެސްޓުގައި ކުލަ ޖެހުމާއި، ކްރޮސްނެޓް ވޮލީބޯޅަ އާއި، ކުޑަކުދިންގެ ކައިޓް ސެޝަނެއް ކުރިއަށްދާނެއެވެ. އަދި ރޮބޯމޭންގެ ޙަރަކާތްތަކާއި، ބޮޑުމަސް، ކޯޑި ކެނޑުން، އަދި މާލި ޙަރަކާތްތަކާއި، ބޮޑުބެރު، ދަފިނެގުން، ދަނޑިޖެހުމާއި މާފަތި އަދި ބަނޑިޔާ ހަރަކާތްތައްވެސް ހިމެނެއެވެ. ބިދަބިން ބޮޑުބެރު ގްރޫޕުގެ ހުނަރުވެރިކަން ފެނިގެންދާނެއެވެ.

ހެނދުނާއި ހަވީރުގެ ކުޅިވަރު ޙަރަކާތްތަކަށްފަހު ކުޑަގިރި ޢީދު ފެސްޓު ނިންމާލަން ހަމަޖެހިފައި ވަނީ ގާލާ ނައިޓަކުން ކަމަށް އަރބަންކޯއިން ބުނެއެވެ. ގާލާގައި ބައިވެރިވުމަށް ކޮންމެ މީހަކު ވެސް 150 ރުފިޔާ ދައްކަން ޖެހޭނެއެވެ. މީގެތެރޭގައި ޢީދު ސްޕެޝަލް ގާލާ ޑިނާއެއްގެ އިތުރުން ޑި ޓިއުން ބޭންޑާއި، ބިދަބިން ބޮޑުބެރު ގްރޫޕް ޙަރަކާތްތަކާއި، ލޯކަލް އަދި އިންޓަނޭޝަނަލް އާޓިސްޓުންގެ އެކި ޙަރަކާތްތައް ހިމެނިގެންދާނެއެވެ.